Read NQAARIIT NE ROOG A ƭomatax ake 1 Bible Online

A ƭomatax ake 1 - NQAARIIT NE ROOG bible

A ƭomatax ake 1

¹Xar oo kene? Yeerusaleem oxey a moofa koƭoŋ-a-koƭoŋin, teeru feene suxoogna fo wiin. Kaa nandtataa o ñaaw, ten fee moƴ’ina o magin a ndeer qeet ke. Ten fee reeƭna lingeer fee no maat ke, a dame mbaƭ.

²Kaa loolaa o yeng ole fop, xa ƭek um a nqaaraa fo xa kooniit. No we mbex’uuna fop, jegee oxaa yaaluuna, qaariit ke ten fop a ngodaan, a ndefat fañ um.

³Xeet fee Yudaa a ɓise gilaa saax took o hup doole, a toroxandel soo a ref no mbaƭ ƭomu. Kaa genat a ndeer qeet ke, too jegee me den a ñootnax a leng. Ñaañagadil we ten fop a mbetaan, too jegee maa ta daɗitna.

⁴A ƭat ake Siyoŋ owey no ñaawax, yaam toofeen ke ngarataand. Tokand ke ten fop kaa mbootat, saasadax we ten a iinaa. Mboƥ ndoog ne ten kaa naqadiloox, soo kam um a fag tak.

⁵Fañ we ten a njega ne mbugna, ñaañagadil we ten a ndef na jam, yaam ne o Yaal oxe a fi’uuna ƭomu, o ngar fo pakaad pagkatar ke ten. We nqawuuna a tañtañna mboƥ ne ten, da ndet no mbaƭ naa.

⁶Siyoŋ, o ndoog onqe, a ñaka o ndam onqe ten fop. Kelfa ke ten kaa nand fo caf kaa nga’eerna o suufand soo a ƈufaa fo o ñak doole mbaambir no xe na xawlooxaa a den.

⁷No ñaal ke na naqad um fo no ñaat um, Yeerusaleem oxe wetandooxaa o neq ole ten sax’ina. Ye xeet fee ten a yenna na xa ƥay no pañ oxe too jegee o leng oxaa ƴufguuna, fañ we ten a nga’aan soo a njalaa njom ne ten.

⁸Yeerusaleem a bakaada ƭomu. Ten taxu ta refat sibdel. Fop we niw’uuna a nqeefataan, yaam ne da nga’na cer um ƥor. Ten fa xoox um kaa iinaa soo a xuun.

⁹Ndoƭ ke kaa ndeeƭu na xa noflax axe no ndoki ne ten, too yiif um galag’ee muj um. Njom ne ten kaa betin, too o leng yaaliran. Kaa layaa yee: «Ey, o Yaal oxe, ga’i o ñaat es, yaam o pañ oxe xe fakooxaa!»

¹⁰O pañ oxe a doona o ɓay um no kalal ke ta jeg’ina fop. Yeerusaleem a ga’a qeet lakas ke a ndokiidaa no Mbind tedu ne, qeet keene xañit’oona da mbog no mbokatax ne wo.

¹¹Xeet fee ten fop owe iinaa, a mbaaƭaa ñaamel, a cooxtaa kalal ke den, ndax da njeg kaa da ñaamna, a njokoox. Oxe damtin na: «O Yaal oxe, ga’i ne xeefteema rek!»

¹²«Nuun um laytaa, nuun fop we na njoonaa mene! Ƭeetyo too ngoroox a paax! Ndax a jega o ƭomel olaa nandna fo ole mi, fodna fo ole fadeema? O Yaal oxe a fi’axam ƭomu a koom alaa fo fuux ɗomu le ten.

¹³A heblitiida na asamaan fiɗel, ta rok boo kam xa kiiƈ es. A letna mbaal na caf es, a nomtaam a cinj. A ɓekaxam no woot, um gen no coono’aa ñaal oo ñaal.

¹⁴O ɓay um a ŋaƭa kadoor ke no njofaƭar es. Kaa da laxasoor, a iroox no cok es. O Yaal oxe a leeƈa cer es fop, a ɓoxotaam na xa ƥay axaa waageeruuma o xuƈtoox.

¹⁵O Yaal oxe a deɓa xir say we mi fop ndeeƭna a ndeer es. A fokatanaxam a yaj no xiixire, ndax ta saŋik mbes ke mi. Ne xa biiñ a nduutteel no nirir, neene o Yaal oxe a duguñtaxam, mi Yeerusaleem fee o ƥiy o ndew Yudaa.

¹⁶Ten taxu um loolaa, a kid es a nqaaraa fo xa kooniit. Oxe war’axama o yaal kaa goƭaam, ten oxe nomtiidkoogaxama no ñoow ole. Xa ƥiy axe mi a njaqa lool, yaam o pañ oxe hupu a den doole.»

¹⁷Siyoŋ a letna xa ƥay, ndaa o leng yaaliran. O Yaal oxe a hebliida took Yakoob fañ we mbiduuna. Yeerusaleem a refata sibdel a ndeer den.

¹⁸«O Yaal oxe ɓuru a xawaam, yaam kaam nanaƭaran’u kebil um. Nuun qeet ke fop, nan-gilooxyo too nga ɗom es. Mboƥ ndoog ne mi fo mbes ke mi a ƥise no mbaƭ.

¹⁹Xoyaam we mbex’axama, ndaa a ngodaxam. Saasadax we mi fo maak we mi a nqona faq kam teeru fee, ye da mbaaƭaa ñaamel ndax da njokoox.

²⁰O Yaal oxe, ga’angi naqad fee reftuuma! Laaw ke mi owe mbaƴaa, xeeñ es a nootoox taa kam es, yaam kaam siiknoor’u fa wo. Laƥ ne xe waraa xa ƥees no ped ke, soo a seel a fi’aa sabab no mbind ne.

²¹Xa iin axe mi a nane, ndaa o leng yaaliraam. Fañ es fop a yega taamaala fee mi. A mbelakinooxa, yaam ne garoona fo ten. Fadnaa ñaal ne maƭooxoogoona a in. Yaasam muj den a nand fa fee mi!

²²Yaasam kañaan den fop a feeñ mbaambir of, soo o fesoor fa den ne fesoortoona fa mi yaam tooñ ke mi fop! Xa iin axe mi a maya lool, too jegaam ɗom no xeeñ es.»