Read NQAARIIT NE ROOG A ƭomatax ake 2 Bible Online

A ƭomatax ake 2 - NQAARIIT NE ROOG bible

A ƭomatax ake 2

¹Xar oo kene? Kam fuux um o Yaal oxe a muura a Siyoŋ o ndoog onqe fo o niɓaan. A maafa junjang o ndam onqe Isra’el cuqoogna a asamaan. Ye fuux le ten a biltooxanna a Siyoŋ, wetandooxee yee ten reeƭu me ta doonaa a caf um.

²O Yaal oxe a yaqa kenand ke Yakoob fop too yirmiran. Kam fuux ɗomu le ten a jiƭta saŋe ke no saax le Yudaa, o ndoog onqe, a bereng a den a lanq, a maasand maat ne fo kelfa ke ten.

³Kam ngañak um a ɓola o rand ole Isra’el. A ŋooka a ñamaak um, ye o pañ oxe a garna. A heƥanda kam Yakoob aal fiɗel laa raaɓuuna o saax oo saax.

⁴A ɗaaya a qali um nen o pañ, a ñamaak um ee pec, a waajaa o xaƴ. A wara fop we mbel’ina o nga’el, a bilit fuux um nen fiɗel took ƭiif ke Siyoŋ, o ndoog onqe.

⁵O Yaal oxe kaa reeƭu nen o pañ. A gefa a Isra’el tuƈ, a yaq pind no maad ke ten, a jiƭit saŋe ke ten, a mayƭand a Yudaa fo ƭomatax fo xa iin.

⁶A bayta Mbind ne ten fo o saɗaxand ole, a yaq o mbiñ onqe ta xetteel. O Yaal oxe a weecnoora toofeen ke fo pes a ñootnax ke kam Siyoŋ, soo kam fuux ɗomu le ten ta deɓ maad oo saasadax oo.

⁷O Yaal oxe a sibda o sadaxand ole ten, a pilid Mbind tedu ne ten. A ɓoxota na xa ƥay no pañ oxe saŋe ke fo pind mosu ke Siyoŋ. Combol a jibta kam Mbind ne no Yaal oxe nen na bes ndoofeen.

⁸O Yaal oxe kaa heboox’u o yaq saŋe ne Siyoŋ, o ndoog onqe. A letna o ƥaak o liiƥir ole, too dam’ee o ɓay um, boo neen a yaqun pic. A ɓeka no ñaawax ɓit le fo saŋe ne, ndefatna den fop a pec a yuɗnooxu.

⁹Begax ke ten a yena a lanq. A ɓola a kinglir ake soo a yaq a den. O maad um fo kelfa ke ten owey a ndeer qeet lakas ke. Kebil ndefatee meen, too duleer we ndaawtatee no Yaal oxe mbeeñil leng.

¹⁰Maak we Siyoŋ, o ndoog onqe, owe moofa a lanq, a naang muƥa. A yipooxa lanq no xoox, a nderoox xa saaku, soo mboƥ ndoog ne Yeerusaleem a lupandoox.

¹¹A kid es kaa nqooɗat yaam xa lool, laaw ke mi a mbaƴaa kam es, o soylaar es a ɓaxooxaa a lanq, yaam o njakad onqe dalna xeet es, fo xa caaƈ axe fo bax ke na patooxaa no ped ke na teeru fee.

¹²Kaa layaa ya ke den ee: «Mam ñaamel fo yerel a njegu?» Kaa yenaa no ped ke na teeru fee nen waa ngaañeena, a ƥuttaa na xa ƥay ya den.

¹³Xar waroong o lay? Ndi xar um nandanditkang, wo Yeerusaleem, o ndoog onqe? An um ga’kaa ta nand fa wo, fo a yaal alum um cooxkang, wo Siyoŋ, o ndoog onqe? Yaam o njakad onqe wo kaa magnit nen o maag ole. An na waagkang o wodand?

¹⁴Duleer we wo peeñil naanaxir fo tefee ndigil a njegu na wo. Ngultee njofaƭar of, ndax da mbinqanong muj fa mbaaxeer of. Ke da yegnoonga xa maaƥ fo naanaxir ƥor oo.

¹⁵We na njoonaa fop kaa mboxwanang, a nqaadnooxang. Kaa mbuuƴaa, a mbulanang a qoox, wo Yeerusaleem, o ndoog onqe, a ndamtin ee: «Ndax kene refee teeru fee xoyoogeena o mosel o jegee sik fo o ɗaay no lanq ke fop?»

¹⁶Fañ of fop a kaañanaang xa ton, a mbuuƴaa, a ƈaxrandaa a ñiiñ, a ndamtin ee: «I ƭuudaan salquƈ! Bes fee i cungoogna a fadiida, too i nga’aan!»

¹⁷O Yaal oxe a fi’a ke ta yuuɓ’ina. A fadna ke ta lay’ina, ke ta fosoox’ina, yaa o leng a andeerna: A yaqa too yirmee dara. A fi’a boo o pañ of a ɗaay, a ci ñaañagadil of o ndam.

¹⁸Saŋe ne Siyoŋ, falalooxi farna fo o Yaal oxe! Fat xa kooniit of a nqaar nen a ƈufnand ñaal fo o yeng! Ba o ɓutnoox sen, too ba a kid of a mbeer!

¹⁹Inooxi, jibin xa iin no ndokand ne na yetax ake no yeng ole! Caari ke refna kam of nen foofi mbaambir no Yaal oxe! Letni xa ƥay of farna fo ten yaam o ñis na xa ƥeef xa tutuuñ axe na nqonaa fo nqeex no kooñ ke no ped ke fop!

²⁰O Yaal oxe, ɗeetangi too ga oxe o fesoortaa neene. Rew a ndeta boo a ñaam xa ƥiy axe ngatna no laaw den, xa caaƈ axaa da njeg’ina o liir na den. Saasadax fo duleer a mbarte kam Mbind tedu ne no Yaal oxe.

²¹Xa caaƈ axe fo nogoy we we luuñaa a lanq no ped ke. Laƥ ne a luƈta fo njaaƈ fo ndoog ne mi fo mbes ke mi. A koom ale fo fuux le wo, waraa, xiris too yirmiro dara.

²²Xoyaa me mi fop we saɗarooguuma, ndax da mbumbaay. Na bes fee no fuux le wo, wo o Yaal oxe, jegee oxaa mucna mbaat oxaa ɓostooxna. We waadin’uuma soo yar a den, o pañ oxe mi a saŋka a den.