Read NQAARIIT NE ROOG A ƭomatax ake 3 Bible Online

A ƭomatax ake 3 - NQAARIIT NE ROOG bible

A ƭomatax ake 3

¹Kaam ref o koor oxaa andna o torox, ñim xa yar axe no fuux le no Yaal oxe.

²A ɗoxaxam, ɓakandiraam na qoolaand, ndaa kam o niɓaan.

³Kaa xawaxam, a xawatinaxam ñaal oo ñaal.

⁴A ŋeesa cer es fo ƭool es, a ɓol xa kiiƈ es.

⁵A maxa a uum lanq a songir me widaxama, a ɗingtaam daŋat fo o ƭomel.

⁶A gennooraxam kam o niɓaan ole nen waa nqonna yaaga.

⁷Kaa widnaam saŋe, ndax sutooxkiim, a iraam ceen meɗu dis.

⁸Wuuqaam a wuuq soo ƴufginoox boo torox, ndaa nan-gilooxee a qeƭ es.

⁹Kaa wegit a qal es a ƥil a maak, a yaq a ƭat es pic.

¹⁰Kaa ref na mi nen ursu naa ɓengna, nen njogoy naa fogooxna no mbiñ o laqooxu.

¹¹A ɗapnooraxam a ƭat ale, a saaraam, a listaam teɓ-reɓ soo a xaƴaam maaga.

¹²A ɗaaya a qali um too na mi a jagandu a kas um.

¹³A dibaxam boo kam a qisiil ake fo a kas ake ta woositna na tungaar um.

¹⁴Kaam refat calat no xeet es fop, da naxoortaxam na kim den bes fuu refna.

¹⁵A ñaamnooraxam qaaɗu xut, a yernooraam daŋat.

¹⁶A ƴaxnooraxam a kac boo a ñiiñ es a ngaakoox, a ɗuuɗaam kam ndaw ke.

¹⁷Jegatiim jam too andatiim o mbelakinax muk.

¹⁸Maaga, layaam ee: «Fagɗaam tak, too jegatiim yaakaar no Yaal oxe.»

¹⁹Um xalaatangaa naqad es fo o ñaat es, ta nandaam nen daŋat fo o ndoxar.

²⁰Waaginum o weec muk, too kam es kaa fag teen tak.

²¹Kaa koy, keeke refu xalaat fee um wetandooxaa, taxna boo um jeg yaakaar:

²²O paaxel no Yaal oxe kaa maadaa boo ndiik,[1] too yirmande um fagee.

²³Kaa da ndakooxaa qas nqes nuu refna too ngor um kaa magin.

²⁴O laaw es kaa tee: «O Yaal oxe refu a las es. Ten taxu um yaakaarin.»

²⁵O Yaal oxe a faaxa no xuu yaakaaruuna, no xe na waaƭan.

²⁶A faaxa ndax o kiin oxe a cungaa ƈufig no Yaal oxe fo o muñ.

²⁷A faaxa ndax o kiin oxe a roxondoox no ndeƥandoong um kadoor ke.

²⁸Fat a moof ten doŋ, a muñaa, yaa o Yaal oxe a gadnuuna o ten!

²⁹Fat a ɗaasoox a lanq, yaam yaakaar a maada jegaa xeƈa.

³⁰Fat a letin o ɗek um oxe na ɗatan paƭ, a jaɓ a ben ake,

³¹yaam o Yaal oxe naagee o deɓaa boo kili.

³²A naqadilangaa sax oo, kaa mayaa fo o mbeq took yirmande um fa maak,

³³yaam refee yee o felin doŋ taxu ta neewandaa soo a naqadilaa xa ƥiy Aadama.

³⁴Boo we ndameena mbaƭ fop no saax le a nduuteel,

³⁵o cofel ole no wiin we a naɗeel na kid no xe Took-ee-took,

³⁶a ƭat a ñakel o reef yaa fo layoor, ndax o Yaal oxe naagiran o ga’aa?

³⁷An waagu lay ee fat tig a jeg boo ta jeg, too o Yaal oxe heblitiran?

³⁸Andum refee yee no bug no xe Took-ee-took pel fo peƭar a inooraa?

³⁹Xar taxu o kiin oxe maadna ñoowaa a xultooxaa, yaa ta xaweel yaam pakaad um?

⁴⁰Fat i ƥaal a ƭat in, ngoroox a pesoorooƭ in soo nomtoox me no Yaal oxe.

⁴¹Fat i yoɗ a qeeñ in fo xa ƥay in farna fa asamaan, maa Roog, lay ee:

⁴²«I mbakaada, nanaƭaran, too wo, waasanino a in!»

⁴³Kam fuux le wo, laqooxaa soo daab a in. Waraa too yirmiro!

⁴⁴Kaa o muuroox eel, boo a tax a qeƭ ake in mbaagee mbadiid me wo.

⁴⁵Fi’aa a in leel fo a siind ndeer qeet ke.

⁴⁶Fop we ndefna fañ in kaa kaañanaa a in xa ton.

⁴⁷A las in refu diid le fo gamb le, yaq fee fo o njakad onqe.

⁴⁸A kid es kaa nqaarnaa a ƈufnand xa kooniit yaam o njakad onqe dalna xeet es, o ndoog onqe.

⁴⁹A kid es kaa nqaaraa fo xa kooniit a taar o marin, a mbañ o mbaas,

⁵⁰boo yaa o Yaal oxe a ɗeetitkaa na asamaan soo a ga ke reftuuma.

⁵¹Kaam jegaa naa ɗomaxama, yaa um ga’aa ke na dalaa mboƥ ndoog ne na teeru es.

⁵²We mbañtaxama cegeer kaa nqawlooxaxam nen ndiiƭ.

⁵³A njooraxam kam gamb le, um ñoowaa, too a saawaxam a kac.

⁵⁴Poofi ke kaa ƭuud’aam, boo um damtatin ee: «Mo’aam mir!»

⁵⁵Kam ee kam gamb le, ƴufginooxaaxoong, wo o Yaal oxe.

⁵⁶Nanaa o ñuxur es, ba o nuunufaanoox xa iin es fo xa buuq es.

⁵⁷A koom alaa ƴufginooxoonga, matiidaa soo lay ee: «Ba o diid!»

⁵⁸O Yaal oxe, ƴufgaxamo, mucil o ñis es.

⁵⁹O Yaal oxe, ga’aa paaxeer ke dooneema. Ɓoxotaam ɓur boog!

⁶⁰Ga’aa ne fañ es a mbugitna ndabdinoox fo fo ngir ne da ngiɓanaxama fop.

⁶¹O Yaal oxe, nanaa a ben ake den, and fo ngir ne da ngiɓanaxama fop.

⁶²Fa lay no fañ es fo yuuƥ ke den na mi a njagnu ñaal oo ñaal.

⁶³Ɗeeti a den: Ta ref ee kaa da moof mbaat da inoox, mi a naxoortaa na kim den.

⁶⁴O Yaal oxe, ɓoxoti a den ndabid jale na xa ƥay den!

⁶⁵Ŋajnoori a den, a salax of a yen took den!

⁶⁶Wo o Yaal oxe, daabi a den kam fuux le wo soo saŋik a den, boo ndefkatee ɗuga asamaan fee wo!