Read NQAARIIT NE ROOG A ƭomatax ake 4 Bible Online

A ƭomatax ake 4 - NQAARIIT NE ROOG bible

A ƭomatax ake 4

¹Xar oo kene? Wurus fee a ñaka meleƈ um, wurus fa nqoolu fee a suptoox! A ƥil ake no mbiñ o tedu nqe a pasarooxa no kooñ ke no ped ke fop!

²Xa ƥiy axe Siyoŋ fop njarna, a mbodantoogel wurus fa nqoolu owe ƭeetateel nen xa calag ƭok axaa o ɓay no maamax qaw a jalna!

³Xa ƥox-a-koƥ axe sax kaa cooxtaa fo ɗeen, a numnaa xa ƥiy den, ndaa rew we na xeet es o mat kaa soxodat boo a ƈaxooxaa na xa ƥiy den, nen a ba ake na koƥ-a-ƥor ale.

⁴Ɗelem no nqeq onqe kaa taƥat no faƭanq um yaam a koɗom, xa caaƈ axe a laacaa ñaamel, too o leng cooxiran a den.

⁵We ñoowtoogna ñaamel pelu owe nqonaa fo nqeex no ped ke, we yaroox’ina kam daalde owe mbirkilooxaa na siind ake.

⁶Tooñ ne na xeet es moƴu magin ne Sodoom, gef’eena ndeer ñaf fo ƭeet, too o ɓay no leng niinee teen.

⁷Gelwaar we ten moƴ’u o miricaa nees, a moƴ o ndanig fo sis, cer den a moƴ o telelaa kooraay[2], mukit den a meleƈaa nen safiir.

⁸Ndiiki koy, o mem den moƴatu ɓalig nquɗoox-ƥaal boo mbaagataand o andid kam ped ke. Ƭool den kaa taƥ na xa kiiƈ axe, a weer koroŋ nen o juuƭ.

⁹We laƥ a saŋkaa moƴu o ƭaay we na nqonaa fo nqeex, na yenaa, a ŋeesoox tak, yaam ne xa qol axe a mbateerna dara.

¹⁰Ke yaay ke a njegna o liir fop oo, a mbaƴna xa ƥiy den, da ndefat ñaamel den, ye fo njakad onqe na xeet es.

¹¹O Yaal oxe a ɗaxda fuux um, a bilit fuux ɗomu le ten. A heƥanda fiɗel kam Siyoŋ, ta raaɓ boo na per ake ten.

¹²O maad o leng took lanq ke mbaat o leng oxaa genna na adna fee gim’ee yee o pañ o ñaañagadil oxe a waaga rokiid na xa ton-maax axe Yeerusaleem.

¹³Keene fop o ngar fo pakaad ke no duleer we fo tooñ ke no saasadax we yoo, den we ƥax’ina kam teeru fee fo’oy le no jofu we.

¹⁴Kaa njoqooyooxoogu kam ped ke nen fuul, a ndokoox tikoorik kaa taƥna fo’oy, boo mbarataand o nduq sax.

¹⁵Kaa mbalalooxoogel ee: «Ndiƈatooxyo, xoolaƭaru we nu ndefna! Ndiƈatooxyo, ndiƈatooxyo! Ba nu nduq a in muk!» Ye da ƈufaa, a njoqooyooxaa o mbiñ fo mbiñ, kaa layoogel a ndeer qeet lakas ke yee: «Njaɓee moof mene!»

¹⁶O Yaal oxe fa xoox um a pasara a den kam fuux um too bugatee o doon a den a ngid. Saasadax we ci’ataand cer, ne’atiim maak we a niwel.

¹⁷A kid in kaa niifaar’u yaam ƈufig kasaara ne i ƈooklooxoogna. Kaa i yaakaaroogu xeet faa gareerna a ƴufgiid a in.

¹⁸Kaa i ngaynaakeel, boo i mbaagee sutoox. Muukandoong in a matiida, xa yeng in a mbag tak. Kaam ee muukandoong in a fadiida.

¹⁹Ñaañagadil in moƴ’u o ñof a canjiik ake na asamaan. A ndaaba a in took xa coong axe, a ƭaapan a in pog kam a koƥ-a-ƥor ale.

²⁰Oxe i ngaɗ’ina o ñoow in no ten, o maad oxe o Yaal oxe a ɗuumna, a naage nuus kam gamb le den, ten oxe i layoogna yee: «Xan i ñoow no yook um a ndeer qeet lakas ke.»

²¹Felakinooxi rek too ref no ɗaay, wo Edoom o ndoog onqe, genna no saax le Uus! Kaa koy, wo itam xan o daawnel o feeƭ ole no fuux le no Yaal oxe, way teen nep soo woloox boo yoq ƭuc.

²²Wo Siyoŋ, o ndoog onqe, rabdaa njofaƭar of boo ƴut. O Yaal oxe ɓiskatirang no mbaƭ muk. Wo Edoom, o ndoog onqe mat, xan a xaw njofaƭar of, a hulit pakaad of.