Read NQAARIIT NE ROOG Heseki’el 15 Bible Online

Heseki’el 15 - NQAARIIT NE ROOG bible

Heseki’el 15

¹O Yaal oxe a daawnaxam fa lay um na xa ƭelem axene:

²«Wo fee o ƥiy no kiin, xar o juuƭ ndaxar biiñ ole a huptu o juuƭ o lakas oluu refna? Xar a refu no par ole refna ndeer taxar ke no suungaan le?

³Ndax xan o juuƭ ndaxar biiñ a xotel, a jaltel tig? Ndax xan a fi’tel a pagal ndax o ƥaxañ a ɗagel teen?

⁴Kaa umbeel na fiɗel le na raaɓkan. Fiɗel le kaa doxaa cat ƭik ke, soo a ndeer ale a dox. Ndax xan a faaxat o jaltel tig?

⁵Neene, ye ta refaa o muum jaltoogaand tig, moƴtaa sax koy ye fiɗel le a raaɓuuna boo ta dox. Ndax xan a waagel o jaltat tig?

⁶Yaaga koy, keeke o Yaal oxe na refkaa boo faw a layu: Nen o juuƭ ndaxar biiñ ole ndeer taxar ke no suungaan le, nen o juuƭ olene ɓoxotuuma fiɗel le ndax ta raaɓin, neene um ɓoxotitkaa we ngenna Yeerusaleem.

⁷Xam inooxan a den. A sutoora na fiɗel le, ndaa fiɗel xan a raaɓ a den. Maaga, xan nu and ee mi refu o Yaal oxe, yaa um inooxankaa a den.

⁸Xam fi saax le a refat o mbiñ o mbootu yaam ngore’aƭar den. Mi o Yaal oxe na refkaa boo faw layun.»