Read NQAARIIT NE ROOG Heseki’el 2 Bible Online

Heseki’el 2 - NQAARIIT NE ROOG bible

Heseki’el 2

¹O ñuxur ole a layaxam ee: «Wo fee o ƥiy no kiin, naagi daket geenoox, too xam lay fa wo!»

²Yaa ta layaxama naaga rek, Yiif le a rokaxam, a geennaam jiŋ, soo um nan-gilooxaa oxe layoogna fa mi.

³A layaxam ee: «Wo fee o ƥiy no kiin, mexe lulang me no Ii-isra’el we, xeet fa mbaafañ feene siiknoorna fa mi. Boo xaye, den fo daan den kaa ngodaam.

⁴Me no wiin weene saƭikna a qoox too a ŋajaa um lulang, ndax o lay a den ee: ‹Keeke o Yaal oxe na refkaa boo faw a layu.›

⁵Ta ref ee a nan-gilooxa mbaat da mbañ o nan-giloox, yaam xeet fa mbaafañ a ndefu, xan da and ee o tuleer oxey a ndeer den.

⁶Wo fee o ƥiy no kiin, ba o saɗar a den, too ba o saɗar fa lay den, ke o refkaa ref a ndeer takar-ñiig fo tomb soo moof fo a beex fop oo. Ba o saɗar fa lay den too ba o send mbaambir mukit den, yaam xeet fa mbaafañ a ndefu.

⁷Xan o daawin a den fa lay es, ta ref ee a nan-gilooxa mbaat da mbañ o nan-giloox yaam o saƭik xoox den.

⁸Wo fee o ƥiy no kiin o mat, nan-gilooxi ke um layang! Ba o ref o paafañ nen xeet fa mbaafañ feene! Yaƥati o don of, ñaam ke um cooxkang.»

⁹Ɗeetaam too ga’aam o ɓay olaa letneena farna fa mi, a pokoox o laxas a pind o dore.

¹⁰A dortaan mbaambir es, ta bindel na xa saax xa ƭaq axe. Kaa bind’el teen ee: «Ƭomatax, a coytax, xa iin.»