Read NQAARIIT NE ROOG Heseki’el 24 Bible Online

Heseki’el 24 - NQAARIIT NE ROOG bible

Heseki’el 24

¹No hiid o ɓetuu nahkandeer ole[23], no nqool xarɓaxayandeer onqe, no ñaal xarɓaxayandeer ne, o Yaal oxe a daawnaxam fa lay um na xa ƭelem axene:

²«Wo fee o ƥiy no kiin, bindani a xoox of ke o nqool onqe a jegna xaye, bind bes fene sax. Xaye sax o maad oxe Babilon a song a Yeerusaleem.

³Naxooxi xeet fa mbaafañ fene yee: Keeke o Yaal oxe na refkaa boo faw a layu: Deeni a kaleera le, kaam ee deeneen, liƴin itam!

⁴Yipi teen xa ƭeg a tegeƴ axe moƴna mbaax, a ñaal ale fo a kand ale, mayƭandin fo xa kiiƈ axe moƴna mbaax.

⁵Xoti mbaal ne moƴna giñ no ged le, umb xa cuuƭ axe ɗuga a kaleera le, waƴnin boo ta waƴ, ndax xa kiiƈ axe sax a ƥel yot!

⁶Ten taxu keeke o Yaal oxe na refkaa boo faw a layu: Sabab took teeru fa yednu fee! Kaa nandtaa a kaleera qoyu laa nqoy ke a mbaageerna o mbat. Suudi teen xa ƭeg axe, o leng o leng, fañ o banjang ne o suuditkaa a den.

⁷Fo’oy le ta ɓaxna le maadaa a ndeer um. Kaa ɓaxin took ɓil le naagna faŋ, ɓaxiran took lanq ke, ndax fo ut ole a muurin.

⁸Xaƴaam fo’oy um took ɓil le naagna faŋ, maa ta muuritkaandeena, ndax um bilit fuux es soo fadin ndabdinax es.

⁹Ten taxu keeke o Yaal oxe na refkaa boo faw a layu: Sabab took teeru fa yednu fee! Mi itam xam fi baar xa cuuƭ.

¹⁰Fokati xa cuuƭ xa mayu, heƥand fiɗel le, juɗ a tegeƴ ake, safin a den, too fat xa kiiƈ axe a sooy.

¹¹Cinj kaaga, deeni a kaleera ƥor ale took a kaagaañ ake, ndax ta sum jip, xanjar fee a yaxig coy, ndoƭ ke ten a nqool qac, nqoy ke a ƥooroox.

¹²A koorgoorlax akeene fop kasaara yoo, nqoy mayaan ke muuruuna, fiɗel taxkiran o wat.

¹³Xoolaƭarandtaa a xoox of o njombe of. Kaam bug’ong o xooland, ndaa taxee o xool. Xoolandkataandee muk no nqoolaƭar ne wo, boo yaa fuux es a jegkaa ne ta bugna took of.

¹⁴Mi o Yaal oxe kaam ee keene xan a xew too xam fadnin, dakooxkiim teen a cinj too yirimkiim mbaat um ricoox. Xan o hate’el na pesoorooƭ of fo na pi of. Mi o Yaal oxe na refkaa boo faw layun.»

¹⁵O Yaal oxe a daawnaxam fa lay um na xa ƭelem axene:

¹⁶«Wo fee o ƥiy no kiin, ga’angi, ndeer ñaf fo ƭeet xam watin ke yulna a kid of. Xaaraandkiro, loolkiro, too xa kooniit of yuurkee.

¹⁷Iini taa kam of, ba o ñaawoox xon we, tañalooxi, rokoox xa ñaaƭ of, fañ o muur mukit of, too ba o ñaam puuru caapir ke no gentand of.»

¹⁸Layaam fa xeet fee no nqes ne, soo o tees a ñak no kirand ne. No feet nqes olaa, fi’aam ke o Yaal oxe a hebil’axama.

¹⁹Xeet fee a laamtaxam ee: «Ndax xooldandkiro a in ke ke fi’oona a tekitna na in?» Doonaam a den ee:

²⁰«O Yaal oxe a daawin’axam fa lay um na xa ƭelem axene:

²¹Layi mbind Isra’el ee: Keeke o Yaal oxe na refkaa boo faw a layu: ‹Nga’angyo, xam maasand Mbind tedu ne mi, qaaƴoor ke na doole fee nuun, ke yulna a kid nuun fo yaakaar o ñoow nuun. Xa ƥiy xa koor axe fo xa tew axe nuun nu nqaƴna Yeerusaleem, xan laƥ a ñaam a den.

²²Maaga, xan nu mbesoor ne fesoortuuma. Nu muurkee mukit nuun, nu ñaamkee puuru caapir ke no lakas we.

²³Xan nu tañaloox, ndokoox xa ñaaƭ nuun, nu nqaaraandkee too nu loolkee, ndaa xan nu ŋeesooxaa yaam tooñ nuun soo iinaa a ndeer nuun.

²⁴Heseki’el xan a ref na nuun o anddiloor. Xan nu mbesoor deŋ ne ta fesooritna. Yaa keene a xewkaa, xan nu and ee mi refu o Yaal oxe na refkaa boo faw.› »

²⁵O Yaal oxe kaa tee: «Wo fee o ƥiy no kiin o mat, a woora yee a koom alaa um suqitkaa na den ke refna doole den, o ɗaay den fo mosandoor den, ke yulna a kid den fo ke xeeñ den a yuxmaa, xa ƥiy xa koor axe fo xa tew axe den,

²⁶a koom oxe mucna xan a gar me wo, ndax ta yegnong o ten.

²⁷A koom, xan o don of a wetoox yaa oxe mucna a fadiidkaa too xan o lay, muumkatiro. Xan o ref na den o anddiloor, too xan da and ee mi refu o Yaal oxe.»