Read NQAARIIT NE ROOG Heseki’el 28 Bible Online

Heseki’el 28 - NQAARIIT NE ROOG bible

Heseki’el 28

¹O Yaal oxe a daawnaxam fa lay um na xa ƭelem axene:

²«Wo fee o ƥiy no kiin, layi o kelwaar oxe Tiir ee: Keeke o Yaal oxe na refkaa boo faw a layu: Kaa o yeg’u a xoox of, lay ee: ‹Roog refum, mexe moofa na tungul ale no roog ke, no xeeñ le na xa maag axe›, too yaaga fop oo o kiin doŋ refo, refiro roog. Kaa o fodrandaa a qalaat of fo ake Roog.

³Ga’angi, wo hupu a Dañel o and, jegee kunpa fa leng faa andeeroona.

⁴Na pexey o and of fo o jeg-yiif of, fokatanooxaa halal, geer wurus fa xaaliis na kamba le wo.

⁵Na pexey o and o maak ole wo no njula, jegto halal fee wo, soo na pexey halal fee wo o yeg a xoox of.

⁶Ten taxu keeke layum, mi o Yaal oxe na refkaa boo faw: Feek kaa o fodandtaa a qalaat of fo ake Roog,

⁷mexey ɓisiidaa took of wiin jan waa moƴna o ndef wiin fo’oy no qeet ke. Xan a mbac laƥ ke den took o and o mosu le wo, a mbur’and o mosel ole wo.

⁸Xan a mbudnong kam gamb le na saŋkax ale, too xan o xon fa nqon fa nqanqaar ndeer ee ndeer xa maag axe.

⁹Mbaambir o baawar oxe wo, ndax xan o layahin ee: ‹Roog refum›? O kiin doŋ refo, refiro roog ɗuga o ɓay ole no xe na warang.

¹⁰Xan o xon fa nqon fee na qucooxar ake na pexey o ɓay ole no wiin jan we, yaam mi o Yaal oxe na refkaa boo faw layun.»

¹¹O Yaal oxe a daawnaxam fa lay um na xa ƭelem axene:

¹²«Wo fee o ƥiy no kiin, ferani o maad oxe Tiir a kim a mboy! Fat o layin ee: Keeke o Yaal oxe na refkaa boo faw a layu: Kaa o reeƭu o anddiloor no ñak sik, may muut fo o and, saq o mosel o jegee sik.

¹³Kaa o reeƭu kam Edeen, a ƭing ale Roog. Kaa o muuroox’u fo a ƥil a cafeñu akuu ndefna: sarduwaan, topaas, jamaa, kirisolit, onik, yaspe, safiir, eskarbuukle, emerod fa wurus. A ñal ake wo fo a liit ake wo, wo a ndefan’u, a njagandan’el bes fee sakee’oona.

¹⁴Kaa o reeƭu nen mbindel yeeyetax naa a nafir ake a naangna jad. Diƈ’aaxoong, soo o ref took o joong o tedu le Roog. Kaa o foƭtoogu a caf of ndeer a ƥil a sumu jip ake.

¹⁵Jeg’iro ŋañel leng na pesoorooƭ of no kaa xotitna na bes faa sakee’oona boo neene paaxeer ke a soƥe me wo.

¹⁶O njiriiñ onqe no njula ne wo a taxa o may muut fo a ƭom-yedar too bakaadaa. Suttaaxoong no joong ole Roog soo moocandong, wo mbindel yeeyetax ne, a ndeer a ƥil a sumu jip ake.

¹⁷Yegaa a xoox of yaam o mosel ole wo, sooƴnit o and ole wo o ndam onqe wo. Deɓaaxoong a lanq, liilong mbaambir no maad we, ndax da mbuudang.

¹⁸Maasandtaa fo mbiñ fo tedu ne wo tooñ mayu ke wo fo njofaƭar ne no njula of. Maaga, suttaam a ndeer of fiɗel, ndax ta raaɓong too fi’aaxoong ndaw ƥor took lanq ke na kid no fop we ƭeetoogoonga.

¹⁹Fop we andoonga a ndeer qeet ke a naqadilooxa yaam wo. Xan o ref kaa na diidlandaa, too refkatiro tus boo muk.»

²⁰O Yaal oxe a daawnaxam fa lay um na xa ƭelem axene:

²¹«Wo fee o ƥiy no kiin, wiƈaqilooxi farna fa Sidoŋ, too jo’tanaam o ten!

²²Fat o lay ee: Keeke o Yaal oxe na refkaa boo faw a layu: Xam ɓekong o ɓay, wo Sidoŋ! Xam ɓoxotel o ndam a ndeer of. Xan ta and ee mi refu o Yaal oxe, yaa um fadinkaa kate es took um soo feeñil teen o tedel es.

²³Xam hebliid teen piste soo ɓax fo’oy no ped ke ten. We mbareena xan a yen a ndeer um na pexey laƥ ne ta ɗaayaneena o saax oo saax too xan da and ee mi refu o Yaal oxe.»

²⁴O Yaal oxe kaa tee: «Mbind Isra’el jegkatee muk a ndeer qeet ke mbiduuna na nqeefan, nen a bej akaa na ngaañaa mbaat kiƈ kaa na ndibaa, too xan da and ee mi refu o Yaal oxe.

²⁵Keeke layum, mi o Yaal oxe na refkaa boo faw: Yaa um fokatitkaa mbind Isra’el a ndeer qeet ke da pasaroox’ina, xam feeñlit o tedel es no ne um fesooritkaa fa den na kid no qeet lakas ke. Maaga, xan a ngen no saax den le ci’uuma a Yakoob fee o tag es.

²⁶Xan a ngen teen fo o woor, a max pind, a njimb a ƭing taxar biiñ. Xan a ngen teen fo o woor, yaa um fadinkaa kate es took no fop we mbidna a den, a nqeefaa a den. Maaga, xan da and ee mi refu o Yaal oxe Roog den.»