Read NQAARIIT NE ROOG Heseki’el 29 Bible Online

Heseki’el 29 - NQAARIIT NE ROOG bible

Heseki’el 29

¹No hiid xarɓaxayandeer ole[28], no ñaal xarɓaxay fo ñaal ƭikandeer ne no nqool xarɓaxayandeer onqe, o Yaal oxe a daawnaxam fa lay um na xa ƭelem axene:

²«Wo fee o ƥiy no kiin, wiƈaqilooxi farna fa Firawon fee o maad Misira, too jo’tanaam o ten, ten fa Misira fop!

³Yaƥati too lay ee: Keeke layum, mi o Yaal oxe na refkaa boo faw: Xam ɓekong o ɓay, wo Firawon fee o maad Misira, wo fa noox fa maak fee na wondooxaa ndeer xa quluɓ axe wo, layaa yee: ‹Niil fee mi jegun, mi fi’oodun!›

⁴Xam lokong xa keɗ na kaaɓaaɓ, taƥin na xa ñaƥ axe wo liƥ ke na xa quluɓ axe wo soo qictong a ndeer ee ndeer xa quluɓ axe wo fo liƥ ke na xa quluɓ axe wo fop na taƥkaa na xa ñaƥ axe wo.

⁵Xam deɓong na koƥ-a-ƥor ale, wo fo liƥ ke na xa quluɓ axe wo fop. Xan o yen na xa qol axe, giskaandee too gaskaandee. Xam deɓong, ndax o ref ñaamel ƥaaɓaan ke no lanq ke fo tiiƭ ke na asamaan.

⁶Maaga, we ngenna Misira fop xan a and ee mi refu o Yaal oxe, yaam kaa ndeeƭu nen ndamlooxand xeet no mbind Isra’el.

⁷Ye da ndamoonga no ɓay den, gefaa soo xuuy a kand den fop, too ye da ndamlooxoonga, ɓaƈtooxaa soo girid tet den.

⁸Ten taxu keeke layum, mi o Yaal oxe na refkaa boo faw: Ga’angi, xam ɓisiid took of laƥ ne, too xam suud me wo wiin we fo cegel ke.

⁹Saax le Misira xan a refat o mbiñ o mbootu fo a pec too xan da and ee mi refu o Yaal oxe. Kaa o lay ee: ‹Niil fee mi jegun, mi fi’oodun!›

¹⁰Ten taxu xam damir fa wo, damir fo xa quluɓ axe wo, too xam fi a Misira juum kefatin, a pec fo o mbiñ o mbootu, no ke xotitna Migdol no ɓemb-roog o janoon, a sag Siniim no ɓemb-roog o ñamaak boo no ŋat olaa Kuus.

¹¹O jaf no kiin o leng reefkatee teen, o jaf muumeen o leng dakkatee teen, too xan a fi xa kiid qarɓeen nahik axaa ta genkataandeena.

¹²Xam fi saax le Misira o mbiñ o mbootu a ndeer a saax ake mbootatna, too teeru ke ten xan a mbootat a ndeer teeru ke ndefatna juum kefatin boo xa kiid qarɓeen nahik. Xam pasar Miimisira we a ndeer qeet ke, picit a den na saax a pogreer.

¹³Keeke layum, mi o Yaal oxe na refkaa boo faw: Cinj xa kiid qarɓeen nahik, xam fokatit Miimisira we a ndeer qeet ke da pasar’eena.

¹⁴Xam supit muj fee Misira. Xam nomtiid a den no saax le Patros, no saax le da cosaanoorna, too maaga xan a ndalin maat mbodu.

¹⁵Xan a moƴ o fod maat lakas ke, too garitkatee qeet lakas ke took. Xam wañ a den ndax maadooxkatee took qeet lakas ke.

¹⁶Refkatee muk no mbind Isra’el koolooxel kaa na ñoowdandaa tooñ ne da mbi’na boo a ƈut, ye da ngeleerooxna farna fo Miimisira we, too xan da and ee mi refu o Yaal oxe na refkaa boo faw.»

¹⁷No hiid qarɓeen ƭik fo hiid o ɓetuu ɗikandeer ole a cinj ye i ƥiseena took o hup doole, no ñaal mberaand ne no nqool o eetaand onqe, o Yaal oxe a daawnaxam fa lay um na xa ƭelem axene:

¹⁸«Wo fee o ƥiy no kiin, Nebukadnesaar fee o maad oxe Babilon a jalnoora xiixire we ten boo da nqij, ndax ta song a Tiir. A qoox ake fop a meela, a kand ake fop a ƥurdoox, too xottee na Tiir ndabid leng, refee ten mbaat xiixire um, no calel ke ta fi’na took Tiir.

¹⁹Ten taxu keeke layum, mi o Yaal oxe na refkaa boo faw: Nga’angyo, xam ɓoxot saax le Misira na xa ƥay Nebukadnesaar fee o maad oxe Babilon. Xan a ɓis kalal ke ten, a waltin bo tee qac. Xan a jaɓit teen paax mayu, ta ref ndabid no xiixire um,

²⁰ndabid ne no ke ta jalna. Xam cooxin saax le Misira, yaam goor we ten a njalanaxam. Mi o Yaal oxe na refkaa boo faw layun.

²¹A koom, xam ɓaat doole fee no mbind Isra’el, soo wo fee o ƥiy no kiin, um wetanong o don of a ndeer den, too xan da and ee mi refu o Yaal oxe.»