Read NQAARIIT NE ROOG Heseki’el 3 Bible Online

Heseki’el 3 - NQAARIIT NE ROOG bible

Heseki’el 3

¹O ñuxur ole a layaxam ee: «Wo fee o ƥiy no kiin, ñaami ke ga’oona, ƴaxi o laxas a pind oleene too ret lay fo mbind Isra’el.»

²Yaƥataam o don es, soo ta ñaamnooraam o laxas a pind oleene.

³A layaxam ee: «Wo fee o ƥiy no kiin, mayƭandti o fud of soo ñoowdandit cer of o laxas a pind oleene cooxoonga!» Ñaamaanum too a safa nen suum no don es.

⁴A layaxam ee: «Wo fee o ƥiy no kiin, reti no mbind Isra’el, too daawin a den fa lay es!

⁵Lulaandee farna fa xeet faa na layaa lak fa ƭomu too a jafeñ o andel, ndaa farna fo mbind Isra’el.

⁶Um lul’angaang farna fo qeet mayu kaa lak den a ƭomna too a njafeñ o andel na wo, a nan-gilooxkoogaang.

⁷Kaa koy, mbind Isra’el njaɓkirang o nan-giloox, yaam njaɓiraam o nan-giloox, mbind Isra’el fop kaa saƭik a qoox too a ndir a qeeñ.

⁸Xam feƭarin mukit of nen fee den, o saƭik xoox nen a den.

⁹Xam fi tagid of a saƭik nen jamaa, a moƴ o saƭik ɓil. Ba o saɗar a den boog too ba o send mbaambir den, ke da ndefna ndef xeet fa mbaafañ fop oo.»

¹⁰A layaxam ee: «Wo fee o ƥiy no kiin, fa lay fee um laykang fop, ɓekeen no xeeñ of too nan-giloortin nof of.

¹¹Reti soƥik we ƥiseena gilaa saax took o hup doole, xa ƥiy axe na xeet of, lay fa den, da nan-giloox mbaat da mbañ o nan-giloox, layi a den ee: ‹Keeke o Yaal oxe na refkaa boo faw a layu.› »

¹²Maaga, Yiif le a gifaxam, too nantaam a cinj es fangax combol maak ee: «O ndam onqe no Yaal oxe a hela o simattel no ngenand um!»

¹³Nanaam fangax le na nafir ake no pindel ke, da nqawraa a ndeer den fo le na saang ake paam den fo le no combol maak le.

¹⁴Maaga, Yiif le a gifaxam, a ɓisaam. Retaam, kam es a fag tak, um fuux boo buɓaa, ndaa o ɓay ole no Yaal oxe a pokaxam fa katil.

¹⁵Fadiidaam no ñaang laa Abiib, maa no we ƥiseena gilaa saax took o hup doole too a ngenoogu paam o xuluɓ ole Kebaar fo no mbiñ onqe da ngenoogna. Moofaam maaga ñaal ɓetuu ƭik, naqadiloox a ndeer den.

¹⁶Yaa ñaal ɓetuu ƭik kaaga a mbaafna, o Yaal oxe a daawnaxam fa lay um na xa ƭelem axene:

¹⁷«Wo fee o ƥiy no kiin, dalnaaxoong o ref o yeeyetax no mbind Isra’el. Fat o maƭooxanaam Ii-isra’el we, yaa o nankaa fa lay es.

¹⁸Um layangaa o soxodu xe yee: ‹Xan o xon›, o maƭooxangiran, o layangee ndax o maƭoox o soxodu xe ta fes a ƭat a paaxeer um a cinj, ndax o mucil o ñis um, o soxodu xeene xan a xon yaam njofaƭar um, ndaa xam laamtong fo’oy um.

¹⁹Kaa koy, o maƭooxangaa o soxodu xe too fesee kañaan um fo a ƭat a paaxeer um a cinj, xan a xon yaam njofaƭar um, ndaa wo o mat, xan o ɓogoox teen qac.

²⁰Boo o cofu xe a fesna a cinj o cofel um soo a fi’aa paaxeer, xam xaƴin ta yen, too xan a xon. O maƭooxangiran, xan a xonit bakaad um. A pi a cofu ke ta fi’’ina mbetandooxkataand, too xam laamtong fo’oy um.

²¹Kaa koy, o maƭooxangaa o cofu xe ndax genkee no bakaadaa, a bakaadatangee, kaam ee xan a ñoow, yaam a maƭooxe soo wo itam o mucil o ñis of.»

²²O ɓay ole no Yaal oxe a naagaxam nuus no mbiñ onqaaga, too a layaxam ee: «Inooxi, sutoox kam a yulanq ale, too maaga xam lay fa wo.»

²³Inooxaam soo sutoox kam a yulanq ale, too o ndam onqe no Yaal oxe a feeñooxa maaga, ne ga’it’anuuma deŋ paam o xuluɓ olaa Kebaar. Maaga, deɓooxaam a lanq gung.

²⁴Yiif le a rokaxam soo a geennaam jiŋ. O Yaal oxe a layaxam ee: «Reti wegoox no mbind of.

²⁵Wo fee o ƥiy no kiin, xan o rokel xa ƥaak ndax o humel, too sutooxkiro a ndeer xeet fee.

²⁶Xam taƥin ɗelem of no faƭanq of, too xan o muumat boo waagkatiro o xasan a den, yaam xeet fa mbaafañ a ndefu.

²⁷Kaa koy, a mbanuu jeguuma kaa layoonga, xam waagnoorong fa lay. Maaga xan o lay a den ee: ‹Keeke o Yaal oxe na refkaa boo faw a layu: Fat oxe bugna o nan-giloox, a nan-giloox, soo oxe bugeerna o nan-giloox, a fañ o nan-giloox›, yaam xeet fa mbaafañ a ndefu.»