Read NQAARIIT NE ROOG Heseki’el 30 Bible Online

Heseki’el 30 - NQAARIIT NE ROOG bible

Heseki’el 30

¹O Yaal oxe a daawnaxam fa lay um na xa ƭelem axene:

²«Wo fee o ƥiy no kiin, jo’tanaam! Fat o lay ee: Keeke o Yaal oxe na refkaa boo faw a layu: Ƭomatooxyo yee: Cey, koo bes fene!

³Bes fee a matiida, bes fee no Yaal oxe a matiida. Bes a eel a refkaa, waxtu fee no qeet ke.

⁴Laƥ ne xan a dal took Misira. Coono xan a jeg kam Kuus, yaa we mbareena a yenkaa Misira, yaa kalal ke ten a njangkeel, soo a per ake ten a njiƭtel.

⁵Kuus, Puut fa Luud, Araab we fop, Luub[29] fo we no saax le no ngiɓoor ne xan a yen fa den na pexey laƥ ne.

⁶Keeke layum, mi o Yaal oxe: Tamlooxand ke Misira xan a yen, doole fa nga’atinoor fee ten a fag tak. No ke xotitna Migdol no ɓemb-roog o janoon boo Siniim no ɓemb-roog o ñamaak, xan laƥ a maaf a den. Mi o Yaal oxe na refkaa boo faw layun.

⁷Xan a ndefat fo mbiñ fo mbootu a ndeer a saax ake mbootna, teeru ke ten a mbogat no teeru ke ndefatna juum kefatin.

⁸Maaga, xan da and ee mi refu o Yaal oxe, yaa um heƥandkaa fiɗel took Misira, soo we ndimle’iiduuna fop a nduguñoox.

⁹A koom, duleer xan a ƭisit me mi, a ndok a kaal, ndax da sendnoor a Kuus kam o yaadax um. Xan a jeg coono a ndeer den na bes fee Misira, yaam a fada boo a ƴut.

¹⁰Keeke layum, mi o Yaal oxe na refkaa boo faw: Xam moocand o mayel ole no wiin we Misira na pexey o ɓay ole Nebukadnesaar fee o maad oxe Babilon.

¹¹Ten fa xoox um fa xeet um, den we moƴna o soxod a ndeer qeet ke a ƥisiide, ndax da ngef saax le. Xan a mbac laƥ den took Misira, a mayƭand saax le fo xa tal.

¹²Xam weerin xa quluɓ axe Niil, jikoox saax le no ɓay no soxodu we. Xam wootin saax le fo ke refna teen na pexey o ɓay ole no wiin jan we. Mi o Yaal oxe layun.

¹³Keeke layum, mi o Yaal oxe na refkaa boo faw: Xam yaq pic nitaal pangool ke, suud kam Memfiis roog tefee ndigil ke. Jegkatee o kelwaar kam saax le Misira, too xam dalin teen diid le.

¹⁴Xam gef a Patros, heƥand fiɗel kam Cowaan soo fadin kate es took Teeb.

¹⁵Xam ɓax fuux es took Siin refna saŋe ne Misira soo moocand wiin mayu we Teeb.

¹⁶Xam heƥand fiɗel kam Misira, Siin a diid boo a sendaa. Teeb xan a sexel xa kur, fañ we a njaɓ a Memfiis njoloor o mbuc.

¹⁷Mbes ke Oon fo we Pii-Beset xan a mbartel laƥ, rew we a ƥisel gilaa saax took o hup doole.

¹⁸Kam Tapanes, ñaal ne xan a niifaar, yaa um ɓolkaa teen kadoor ke Misira soo doole fa nga’atinoor fee ten a sooƴ teen. Xan eel a muur a Tapanes, soo mboƥ ndoog ne ten a ƥisel gilaa saax took o hup doole.

¹⁹Xam fadin kate es took Misira, too xan da and ee mi refu o Yaal oxe.»

²⁰No hiid xarɓaxay fo hiid o lengandeer ole[30], no ñaal ɓetuu ƭikandeer ne no nqool o eetaand onqe, o Yaal oxe a daawnaxam fa lay um na xa ƭelem axene:

²¹«Wo fee o ƥiy no kiin, ɓolaam calit a naax ale Firawon fee o maad Misira, too aley laxasaand ndax ta wod, morgaand tig nen laxasir kaa damuuna, ndax ta waag o pok laƥ ne.

²²Ten taxu keeke layum, mi o Yaal oxe na refkaa boo faw: Xam ɓek a Firawon fee o maad Misira o ɓay. Xam ɓol calit a naax ake ten, ale maadna faaxaa fo ale ɓoleena soo samnit laƥ ne no ɓay um.

²³Xam pasar Miimisira we a ndeer qeet ke, picit a den na saax a pogreer.

²⁴Xam saƭkand a naax ake no maad oxe Babilon soo doon laƥ ne mi no ɓay um. Xam ɓol calit a naax ake Firawon fee, too xan a ɗomatoox mbaambir um fo ƭomatax no xaa na xonaa.

²⁵Xam saƭkand a naax ake no maad oxe Babilon, soo ake na Firawon fee o mat a yen. Fop xan a and ee mi refu o Yaal oxe, yaa um doonkaa laƥ ne mi no ɓay no maad oxe Babilon soo ta jooxin farna fo saax le Misira.

²⁶Xam pasar Miimisira we a ndeer qeet ke, picit a den na saax a pogreer, too xan da and ee mi refu o Yaal oxe.»