Read NQAARIIT NE ROOG Heseki’el 31 Bible Online

Heseki’el 31 - NQAARIIT NE ROOG bible

Heseki’el 31

¹No hiid xarɓaxay fo hiid o lengandeer ole[31], no ñaal eetaand ne no nqool o ndadkandeer onqe, o Yaal oxe a daawnaxam fa lay um na xa ƭelem axene:

²«Wo fee o ƥiy no kiin, layi a Firawon fee o maad Misira fo wiin mayu um ee: Ndi an o nandtaa kam o magnel ole wo?

³Ga’angi, Asuur kaa nandtoogu ndaxar seedar kam Libaŋ, a naaq a mosu, suungaan tigi laa jegna yook. Geel um kaa jigid’u, soo o jul ole ten a naag lawlaw a ndeer kol niɓu.

⁴Poofi ke a maakin’aan, juwaam fee a saxnin ta jigid bo, a xaynaa a ƈufnand ake ten me widna me ta jimbeena, a ɓakandaa a kal ake ten no taxar ke na koƥ ale fop.

⁵Ten taxu geel um a garit’u taxar ke na koƥ ale fop took, a naaq ake ten a moƴ o may, xa laag axe ten a nqay, yaam foofi fo mayu le soorooguuna.

⁶Tiiƭ ke na asamaan fop kaa ndutoogu na naaq ake ten, muumeen-a-koƥ ke fop a ndoonaa xa ƥiy den a lanq ɗuga xa laag axe ten, soo qeet maak ke fop a ngenaa no yook um.

⁷O magnel um kaa tax’un o mos bo fo a naaq a ciig ake ten, yaam a paƴ ake ten kaa mudoogu kam poofi kaa naangna gañ.

⁸Taxar seedar ke na ƭing ale Roog yookoogiran, pilaawo ke mbodir’ee fo a naaq ake ten, too taxar palataan ke nand’ee fa xa laag axe ten. Ndaxar leng na ƭing ale Roog fodir’ee fo ten o mosel.

⁹Kaam mosandit’un a naaq a mayu ke ten, boo taxar ke Edeen fop, kam a ƭing ale Roog a siisan.»

¹⁰Ten taxu keeke o Yaal oxe na refkaa boo faw a layu: «Feek kaa naag jiŋ fo geel um fop, o jul um a garit kol niɓu ke took, xeeñ um a magnandoox no geel um jiig le,

¹¹ɓoxotaanum na xa ƥay no ƭooɗox oxe no qeet ke, na fi’kan ke jagna fo kañaan um. Raxaanum.

¹²Wiin jan waa moƴna o ndef wiin fo’oy a ndeer qeet ke a ngodaan, soo a mbaasin maaga. A naaq ake ten a yena took xa coong axe fo kam a yulanq ake. Xa laag axe ten a nduguñe kam a kamb ake no saax le fop, qeet ke no lanq ke fop a ƈuf yook ne ten, soo a mbaasin.

¹³Tiiƭ ke na asamaan fop kaa ngaraa a ndaang took o fimb ole ten gaakooxna, soo muumeen-a-koƥ ke fop a laqooxaa kam a naaq ake ten.

¹⁴Kaa refit neene ndax ndaxar leng naa sooreena a paax, a deyƭoox foofi waagkatee o lawlawin boo a garit kol niɓu ke took soo a xaaƴooraa geel jiig um, yaam taxar ke nen wiin we a njagandane fa nqon, a serel a moocik ɗuga lanq ke, a soƥik maaga we mbondooxna teen.»

¹⁵Keeke o Yaal oxe na refkaa boo faw a layu: «A koom alaa ta xaadna jaaniif, simtaam ñaawax. Muuraam juwaam fee yaam o ten, harin xa quluɓ axe, poofi maak ke a ngeennel. Niɓaannaam a Libaŋ yaam o ten, too taxar ke na koƥ ale fop a mbeera ŋayam yaam o ten.

¹⁶Sendnoortaam qeet ke fangax le no njom ne ten, ye fudnanuuma jaaniif fo we na mbudooxaa no gamb le na saŋkax ale. Taxar ke Edeen fop a yaale kam xooɗ-ee-xooɗ le no lanq ke, taxar ke moƴna o mos fo ke moƴna o mbaax na Libaŋ, fop ke na yeraa no poofi ke.

¹⁷Den itam a mbudooxandoora fo ten kam jaaniif, me no we laƥ a ñaamna. Kaa ndeeƭu ndamlooxand um, a ngenoogu no yook um a ndeer qeet ke.

¹⁸Ndi an waag’ee o nandandit no ndam fo o magnel a ndeer taxar ke Edeen? Xan o fudnandoorel fo taxar ke Edeen kam xooɗ-ee-xooɗ le no lanq ke. Xan o wondoox a ndeer a qucooxar ake fo we laƥ a ñaamna. Keene na dalkaa a Firawon fee fa xeet fa mayu um. Mi o Yaal oxe na refkaa boo faw layun.»