Read NQAARIIT NE ROOG Heseki’el 4 Bible Online

Heseki’el 4 - NQAARIIT NE ROOG bible

Heseki’el 4

¹«Ndiiki koy, wo fee o ƥiy no kiin, xoti muul, diƈin mbaambir of, soo samandaal teen teeru, ta ref a Yeerusaleem.

²Cinj kaaga, fi’i ta widel o kurul-keƥ, o max a uum lanq a songir paam um, yoɗanin a cuum lanq, sip saŋe paam um, soo geenin me widuuna fop masiin komir kaa na nqoyeel a suk paal.

³Wo koy, xoti ndal njelem, doonin nen tabax njelem ndeer of fa teeru fee, ɓakand mukit of farna fo ten, too xan o songin. Fat a widel o kurul-keƥ. O anddiloor a refu no mbind Isra’el.

⁴Maaga, wondooxi o segdin no saax of o janoon, adin teen tooñ ne no mbind Isra’el. Xan o gadoox tooñ den a pe a podne o wondoorkaa o saax oleene.

⁵Mexe serang keene boo a pe akaa mbodirna fo xa kiid axe mbind Isra’el a mbakaadna, ta ref ñaal teemeed tadik fo ñaal qarɓeen ɓetuu nahik. Neene, xan o gadoox bakaad fee den.

⁶O paangangaa a pe akeene, wondoorti o saax o ñamaak, too xan o gadoox tooñ ne no mbind Yudaa boo ñaal qarɓeen nahik. Mexe serang ñaal leng no hiid oluu refna.

⁷Xan o wiƈaqiloox, letin o ɓay of o ɓor farna fa Yeerusaleem fee wideena o kurul-keƥ, soo jo’tanaam o ten.

⁸Xam humtong xa ƥaak ndax geleerooxkiro o saax o leng boo yaa o fadinkaa ñaal ke o naagkaa sem o mbiñ o leng.

⁹Ndiiki koy, jangi bele fa lorso fo a ñaaw a pogreer fa ɓasi fa bele fa saƭku, fokat a den no ƥaxañ o leng, soo fi’tan ñaamel of a pe a podne o wondoorkaa o segdin. Xan o ñaaman boo ñaal teemeed tadik fo ñaal qarɓeen ɓetuu nahik.

¹⁰Ke heloona o ñaamaa ñaal oo ñaal xan a ref ngap genwal liibar. Ten refu ke o ñaamkaa no ngap onqeene fop.

¹¹Xan o eedaneel foofi fo yerel of, ngap o liitar ñaal oo ñaal, o yeran leek-leek.

¹²Xan o ñaamaa o gaf lorso laa juɗtoona took sutax no kiin na kid den.»

¹³Cinj kaaga, o Yaal oxe a laya yee: «Neene Ii-isra’el we a ñaamitkaa puuru qoolaƭaru a ndeer qeet ke um pasarkaa a den.»

¹⁴Layaam ee: «Cey, o Yaal oxe na refkaa boo faw, no kaa xotitna no ndeƥandoong es boo xaye, wootooxaam qoolaƭaru kuu refna, ñaamiim muumeen fa medu mbaat faa listeena, too a tegeƴ a qoolaƭaru mosee o ndok no don es.»

¹⁵A doonaxam ee: «Yaaga koy, mexe cooxang a teep naak, o softin sutax ke soo juɗit teen ñaamel of.»

¹⁶A layahinaxam ee: «Wo fee o ƥiy no kiin, xam suqit mbuuru muum ne na Yeerusaleem. We ngenna teen xan a ñaamaa fa naqad mbuuru naa eedeena, soo a yeraa fo kam fa mbagu foofi laa eedeena.

¹⁷Neene, xan ñaamel den fo yerel den a ndang. Den fop xan a naqadiloox, a ŋeesooxaa yaam njofaƭar den.»