Read NQAARIIT NE ROOG Heseki’el 40 Bible Online

Heseki’el 40 - NQAARIIT NE ROOG bible

Heseki’el 40

¹No hiid qarɓeen ƭik fo ɓetkandeer ole no mbaƭ naa in, no mberaandoong ne no hiid ole, no ñaal xarɓaxayandeer ne no nqool onqe, xa kiid xarɓaxay fo xa kiid xa nahaq cinj ye teeru fee a gefeena tuƈ, a koom o ɓay no Yaal oxe a doonooxa took es,

²soo ta ɓisaam maaga. No peeñax Roog, a ɓisaxam no saax laa Isra’el, soo a doonaam took o joong o jiig olaa jeg’ina no ɓemb-roog o ñamaak nandu nen maq teeru.

³A ɓisaxam maaga too ga’aam o kiin oxaa o mem um a nandtoogna o mem xanjar. Kaa pokoox’u no ɓay um o ƥaak o liiƥir fo o siind o liiƥir soo a geenoox paam o don-maax ole.

⁴O koor oxeene a layaxam ee: «Wo fee o ƥiy no kiin, ɗeeti a paax, wet nof of! Horooxi a paax fop ke um lalkang, yaam kaa o ɓisiidel mene, ndax o ɗeet a paax. Fat o lay mbind Isra’el fop ke o ga’kaa!»

⁵Keeke refu ke ga’uuma: A jeg’a saŋe tafil naa wid’ina Mbind Roog ne o saax oo saax. No ɓay ole no kiin oxe a jeg’a o siind o liiƥir olaa fi’na xa noonoong ɓetaa fo leng, o noonoong oluu refna a doon o ɓay ee o noonoong wargal. A liiƥa o yaajel ole no maq ne, ta fi o siind o leng soo geel um a fi o siind o leng.

⁶A reta farna fo o njibir onqaa faambir’ina no batand, a wad o toŋ-toŋ ole soo a liiƥ peg ne no njibir onqe, o tinqel ole a fodir’ina fo o siind ole ten.

⁷O ndambalaan onquu refna o cigdel um a reeƭa o siind o leng soo o yaajel um a ref o siind o leng. A jeg’a xa noonoong xa ƥetaq ndeer fo ndambalaan ne. Peg ne no njibir onqe paam o ndambalaan onqe no njibir onqe, kam fee a fi’’a o siind o leng.

⁸A liiƥa o ndambalaan onqe no don-maax ole kam fee,[36]

⁹o ndambalaan onqe a fi’a xa noonoong ɓetaa tadaq soo a toodook ake a mbi xa noonoong xa ƭaq. O ndambalaan onqe no don-maax ole kam fee a reeƭu.

¹⁰Fo ndambalaan ne no don-maax ole farna fo batand fo ndaduk a ndeeƭu no saax o leng fo ndaduk no saax o lakas. Fo ndaduk ne fop mbodir’u soo a toodook ake no saax oluu refna a mbodir itam.

¹¹A liiƥa o yaajel ole no gom ole no don-maax ole, ta fi xa noonoong xarɓaxay, o qooɗel ole a fi xa noonoong xarɓaxay fo xa noonoong xa tadaq.

¹²A jeg’a mbaambir fo ndambalaan ne o wooƥ olaa fi’na o noonoong o saax oo saax. O ndambalaan onquu refna a fi’’a xa noonoong ɓetaa fo leng o saax oo saax.

¹³A liiƥa o don-maax ole no ke xotitna no bomb le no ndambalaan o leng onqe boo no bomb le no lakas onqe. O yaajel ole a fi’’a xa noonoong qarɓeen ƭik fo xa noonoong xa ƥetaq a ndeer xa booƥ xa ƭaq axe njasnoorna.

¹⁴A liiƥa o ndambalaan onqe, ta fi xa noonoong qarɓeen ƭik. O maax ole kaa wid’un.

¹⁵No ke xotitna no mbaambrand ne no don-maax o rokir ole boo no ndambalaan onqe kam no don-maax ole, a jeg’a xa noonoong qarɓeen ƥetik.

¹⁶A jeg’a xa palangteer axaa njegna tagar no fo ndambalaan ne fo na toodook ake den kam o don-maax ole me widuuna fop. A jeg’a itam xa palangteer no fo ndambalaan ne me widna a den fop kam fee. A naaq keec a sex’e took a toodook ake.

¹⁷O koor oxe a ɓisaxam no maax-tafil ole, too a jeg’a maaga tok fo o dung, a nqendandel a paax me widna o maax ole. A jeg’a tok qarɓeen tadik took o dung oleene.

¹⁸O dung ole kaa dend’u fo xa ton-maax axe soo a fodir’u fo o yaajel ole na xa ton-maax axe. Ten reeƭu o dung o laalanq ole.

¹⁹A liiƥa o yaajel ole no ke xotitna no mbaambrand ne no don-maax o laalanq ole boo denda fo o maax-kam ole, ta fi xa noonoong teemeed no batand. No ɓemb-roog o janoon,

²⁰a liiƥa o cigdel ole fo o yaajel ole no don-maax ole faambir’ina no ɓemb-roog o janoon ole no maax-tafil ole.

²¹Fo ndambalaan ne ten, fo ndaduk no saax o leng, fo ndaduk no saax o lakas, a toodook ake ten fo fo ndambalaan ne ten kaa mbodir’u fo o njibir o eetaand onqe, xa noonoong qarɓeen ƥetik o cigdel fo xa noonoong qarɓeen ƭik fo xa noonoong xa ƥetaq o yaajel.

²²Xa palangteer axe ten, fo ndambalaan ne ten, a naaq keec ake ten kaa mbodir’u fo o njibir onqe faambir’ina no batand. Kaa ŋaaytoogel o toŋ-toŋ olaa fi’na a taaraand ɓetaa ƭaq, too fo ndambalaan ne ten a mbod’u a den mbaambir.

²³A jeg’a o njibir no maax-kam ole me jasnoorna fo o njibir onqe garitna no ɓemb-roog o janoon fo me jasnoorna fo o njibir onqe garitna no batand. A liiƥa ndeer o njibir onqe fo o lakas onqe, ta fi xa noonoong teemeed.

²⁴A ɓisaxam no saax ole no ɓemb-roog o ñamaak, me o don-maax ole no ɓemb-roog o ñamaak a reeƭna. A liiƥa a toodook ake fo fo ndambalaan ne, da mbodir fo lakas ke.

²⁵O njibir onqeene fo fo ndambalaan ne ten kaa njeg’u xa palangteer me widna a den fop, nen xa palangteer xa lakas axe. O cigdel den a reeƭa xa noonoong qarɓeen ƥetik soo o yaajel den a fi xa noonoong qarɓeen ƭik fo xa noonoong xa ƥetaq.

²⁶Kaa ŋaaytoogel o toŋ-toŋ olaa fi’na a taaraand ɓetaa ƭaq, too fo ndambalaan ne ten a mbod’u a den mbaambir. No saax oluu refna a naaq keec a sex’e took a toodook ake ten.

²⁷O maax-kam ole a jeg’a o don-maax no saax ole no ɓemb-roog o ñamaak. A liiƥa ndeer o don-maax o leng fo o lakas ole no ɓemb-roog o ñamaak, ta fi xa noonoong teemeed.

²⁸O koor oxe a ɓisaxam no maax-kam ole, a reefnaam no don-maax ole garitna no ɓemb-roog o ñamaak. A liiƥa o don-maax oleene, ta fodir fo xa lakas axe.

²⁹Tok ke ten fo a toodook ake ten fo o ndambalaan onqe ten kaa mbodir’u fo lakas ke. O njibir onqeene fo o ndambalaan onqe ten kaa njeg’u xa palangteer me widna a den fop. O cigdel um a reeƭa xa noonoong qarɓeen ƥetik, o yaajel ole a ref xa noonoong qarɓeen ƭik fo xa noonoong xa ƥetaq.

³⁰

³¹O ndambalaan onqe ten kaa faambir’u fo o maax-kam ole. A jeg’a a naaq keec took a toodook ake, soo o toŋ-toŋ olaa fi’na a taaraand ɓetaa tadaq a ŋaayteel teen.

³²A ɓisaxam no maax-kam olaa, a reefnaam no don-maax ole no batand. A liiƥa o don-maax oleene, ta fodir fo xa lakas axe.

³³Tok ke ten fo a toodook ake ten fo o ndambalaan onqe ten kaa mbodir’u fo lakas ke. O njibir onqeene fo o ndambalaan onqe ten kaa njeg’u xa palangteer me widna a den fop. O cigdel den a reeƭa xa noonoong qarɓeen ƥetik, o yaajel ole a ref xa noonoong qarɓeen ƭik fo xa noonoong xa ƥetaq.

³⁴O ndambalaan onqe ten kaa faambir’u fo o maax-tafil ole. No saax oluu refna a naaq keec a sex’e took a toodook ake ten, soo o toŋ-toŋ olaa fi’na a taaraand ɓetaa tadaq a ŋaayteel teen.

³⁵O koor oxe a ɓisaxam farna fo o don-maax ole no ɓemb-roog o janoon. A liiƥaan, ta fodir fo xa lakas axe.

³⁶Tok ke ten fo a toodook ake ten fo o ndambalaan onqe ten kaa njeg’u xa palangteer me widna a den fop. O cigdel um a reeƭa xa noonoong qarɓeen ƥetik soo o yaajel um a ref xa noonoong qarɓeen ƭik fo xa noonoong xa ƥetaq.

³⁷O ndambalaan onqe ten kaa faambir’u fo o maax-tafil ole. No saax oluu refna a naaq keec a sex’e took a toodook ake ten, soo o toŋ-toŋ olaa fi’na a taaraand ɓetaa tadaq a ŋaayteel teen.

³⁸A jeg’a a ndok alaa wetoortoogna no fo ndambalaan ne na xa ton-maax axe. Meene sadax toxel ke a mbar’e o laxadtaa.

³⁹Kam o ndambalaan onqe no don-maax ole a jeg’a no saax o leng ole a taabul a ƭak soo no lakas ole a taabul a ƭak. Teen sadax toxel ke a mbar’e o nqirsitaa fo sadax fa mbaasnoor pakaad fee fo sadax fa nqendandoor fee.

⁴⁰No leng na xa saax tafil axe, me ŋaaytoogeena, no ndokand ne no don-maax ole garitna no ɓemb-roog o janoon, a jeg’a a taabul a ƭak, soo no saax o lakas, farna fo ndambalaan onqe no njibir onqe, a jeg’a a taabul a ƭak.

⁴¹A jeg’a denda fo o don-maax ole a taabul a nahak no saax o leng ole fo a taabul a nahak no lakas ole, ta ref fop oo fop a taabul ɓetaa tadaq akaa muumeen ke a nqirsitoogeena.

⁴²A jeg’ahina a taabul a nahak akaa njagandaneena sadax toxel ke, a mbi’tel a ƥil a sexe. O cigdel den a reeƭa o noonoong o leng fa genwal, o yaajel den a ref o noonoong o leng fa genwal, soo geel den a ref o noonoong. Teen tikoorik ke nqirsitoogeena sadax toxel ke fo sadax lakas ke a ndoonooge.

⁴³A ƥaaxaand akaa o yaajel den a fi’na o ɓay a mbidin’e mbind ne, too a tegeƴ ake no sadax ke a mbar’e o ndoon took a taabul ake.

⁴⁴Tafil o don-maax kam ole, a jeg’a tok ke no giigim we no maax-kam ole. A leng ale kaa reeƭu denda fo o don-maax ole garitna no ɓemb-roog o janoon soo a faambir no ɓemb-roog o ñamaak, a lakas ale a ref denda fo o don-maax ole garitna no batand, soo a faambir no ɓemb-roog o janoon.

⁴⁵O koor oxe a layaxam ee: «A ndok aleene mbambrand ne a refna no ɓemb-roog o ñamaak, saasadax we na topatooxaa calel ke no Mbind ne njegun.

⁴⁶A ndok ale faambirna no ɓemb-roog o janoon, saasadax we na topatooxaa calel ke no sadaxand ole njegun. Den ndefu xa taan axe Saadok andoona yee ndeer xa taan axe Lewi kaa matiidaa o Yaal oxe ndax da njalanin.»

⁴⁷O koor oxe a liiƥa o maax-kam ole, o cigdel ole a fi xa noonoong teemeed soo o yaajel ole a fi xa noonoong teemeed. Kaa fodir’u o saax oo saax, o sadaxand ole a ref mbaambir Mbind ne.

⁴⁸A ɓisaxam no ndambalaan onqe no Mbind ne. A liiƥa a toodook ake no ndambalaan onqe, da mbi xa noonoong xa ƥetaq no saax o leng ole soo xa noonoong xa ƥetaq no saax o lakas ole. O yaajel ole no begax ke a reeƭa xa noonoong xa tadaq no saax o leng ole soo xa noonoong xa tadaq no saax o lakas ole.

⁴⁹O cigdel ole no ndambalaan onqe a reeƭa xa noonoong qarɓeen ƭik, soo o yaajel ole a ref xa noonoong xarɓaxay fo xa noonoong xa ƭaq[37]. O toŋ-toŋ a ŋaaytooge. A jeg’a a toodook a ƭak akaa ndeerna ndokand ne.