Read NQAARIIT NE ROOG Heseki’el 42 Bible Online

Heseki’el 42 - NQAARIIT NE ROOG bible

Heseki’el 42

¹O koor oxe a sutaxam farna fo o maax-tafil ole, no saax ole no ɓemb-roog o janoon soo a ɓisaam no tok kaa njasnoorna fo o maax ole, a mbaambir fo tabax ne no ɓemb-roog o janoon.

²Mbaambrand ne, me o don-maax ole no ɓemb-roog o janoon a reeƭna, a jeg’a o cigdel olaa reeƭna xa noonoong teemeed, soo o yaajel ole a ref xa noonoong qarɓeen ƥetik.

³Kaa reeƭu me jasnoorna fo xa noonoong qarɓeen ƭik axe no maax-kam ole, o reefand oluu refna a dondrandoor fo o lakas, ta fi taax-took tadik.

⁴Mbaambir tok ke, a jeg’a a qul a yaaju laa fi’na xa noonoong xarɓaxay farna fo o maax-kam ole soo o cigdel ole a fi xa noonoong teemeed[39]. Xa ton-maax axe den kaa mbaambir’u no ɓemb-roog o janoon.

⁵Tok ke ngarit’ina took moƴ’u o ŋooɓ ke a lanq fo ke ndeeƭna no tabax ne a ndeer yaam xa teefand axe kaa ñaam’u a den.

⁶A jeg’a taax-took tadik, ndaa jeg’ee a toodook nen a toodook ake no maax ole. Ten taxu no ke xotitna a lanq, tok ke took moƴ’u o ŋooɓ ke a lanq fo ke a ndeer.

⁷Tabax ne tafil joon’ina fo tok ke, farna fo o maax-tafil ole, mbaambir tok ke, o cigdel um a reeƭa xa noonoong qarɓeen ƥetik,

⁸yaam o cigdel ole no tok ke farna fo o maax-tafil ole a reeƭa xa noonoong qarɓeen ƥetik, ndaa no mbaambrand ne jasnoor’ina fo o Mbiñ o tedu nqe, a jeg’a xa noonoong teemeed.

⁹Na lanq-ee-lanq ale no tok keene ndokand ne no batand a reeƭu, yaa inoortiid’oona no maax-tafil ole.

¹⁰Ndokand neene kaa reeƭu me tabax ne no maax ole a feritna. Farna fo ɓemb-roog o ñamaak a jeg’ahina tok kaa njasnoorna fo o maax ole fo tabax ne garit’ina a cinj Mbind Roog ne.

¹¹Mbaambir tok ke a jeg’a a qul, nen ale reeƭna mbaambir tok ke no saax ole no ɓemb-roog o janoon. O cigdel um fo o yaajel um kaa mbodir’u. Xa sutoorand axe no tok ke, a keen den fo tokand ke den kaa nand’u fo ke no ɓemb-roog o janoon.

¹²Leng kut a reeƭu na xa ton-maax axe no tok ke mbarna no ɓemb-roog o ñamaak. A jeg’a o don-maax no ndokand ne na qul ale reeƭna deŋ mbaambir tabax ne garitna no batand, too teen roktooge.

¹³O koor oxe a layaxam ee: «Tok ke no ɓemb-roog o janoon fo ke no ɓemb-roog o ñamaak ndefna mbaambir o maax ole, ndefu tok tedu ke, me saasadax we na matiidaa o Yaal oxe a ñaamitkaa tig ke moƴna o ted. Xan a ngeek teen tig ke moƴna o ted, sadax ke, muumeen ke na ƥoxoteel no sadax ke na mbaasnoorteel pakaad fo sadax qendandoor ke, yaam o mbiñ onqene kaa ted.

¹⁴Yaa saasadax we a ndokkaa no mbiñ o tedu nqeene, sutoorkee teen, a sag no maax-tafil ole, ndaa xan a ndoon maaga ñirax ke da mbadnitaa o far den, yaam ñirax keene kaa ted. Xan a ndokoox ñirax lakas, ndax da matiid o mbiñ onqe kesaneena xeet fee.»

¹⁵Ye o koor oxe a liiƥna Mbind kam ne boo a ƴut, a suttaxam no don-maax ole garitna no batand soo a liiƥ saŋe ne wid’ina Mbind ne na xa saax xa nahaq axe ten boo ta xet.

¹⁶A liiƥta o saax ole no batand o siind o liiƥir ole, ta fi fop oo fop xa siind teemeed ƥetik no siind o liiƥir ole.

¹⁷A liiƥa o saax ole no ɓemb-roog o janoon, ta fi fop oo fop xa siind teemeed ƥetik no siind o liiƥir ole.

¹⁸A liiƥa o saax ole no ɓemb-roog o ñamaak, ta fi xa siind teemeed ƥetik no siind o liiƥir ole.

¹⁹A geleerooxa no saax ole no mudand soo a liiƥ xa siind teemeed ƥetik fo o siind o liiƥir ole.

²⁰A liiƥa saŋe ne wid’ina Mbind ne na xa saax xa nahaq axe ten: O cigdel ole a reeƭa xa siind teemeed ƥetik soo o yaajel ole a ref xa siind teemeed ƥetik. Ten xaaj’u ke tedna fo ke tedeerna.