Read NQAARIIT NE ROOG Heseki’el 45 Bible Online

Heseki’el 45 - NQAARIIT NE ROOG bible

Heseki’el 45

¹«Yaa nu lasirkaa saax le nen lam na pexey mbanjang ne, fat nu kesan o Yaal oxe o fiisel kam saax le, olaa o cigdel um a refna xa noonoong cuni qarɓeen ƭik fo xa noonoong cuni ƥetik, soo o yaajel ole a ref xa noonoong cuni xarɓaxay. Xan a ref o mbiñ o tedu kam a piis ale no ŋat ole ten fop.

²Mbind Roog ne xan a watnanel teen o ɗeg olaa fi’na xa noonoong teemeed ƥetik o saax oo saax, o maax o yaaju laa fi’na xa noonoong qarɓeen ƥetik a widin.

³Xan o jiriiñoor o liiƥir o leng kut ole ndax o liiƥ o cigdel olaa fi’na xa noonoong cuni qarɓeen ƭik fo xa noonoong cuni ƥetik fo o yaajel olaa fi’na xa noonoong cuni xarɓaxay maa Mbind tedu ne a refna, o Mbiñ onqe moƴna o ted.

⁴O mbiñ o tedu nqaa keseena no saax le yoo. Saasadax we na njegkan, den we na mbadnaa calel ke kam Mbind Roog ne, a matiidaa o Yaal oxe ndax da njalanin. Meene pind den a ndefkaa, too xan a ref maa kesaneena Mbind Roog ne.

⁵Xa noonoong cuni qarɓeen ƭik fo xa noonoong cuni ƥetik o cigdel fo xa noonoong cuni xarɓaxay o yaajel na refkaa o jeg no Leelewi we. Xan a njeg teeru qarɓeen ƭik[40] maa da ngenna, den we na mbi’aa calel ke kam Mbind Roog ne.

⁶Nen lanq ke na teeru fee, xan nu mbiis o yaajel olaa fi’na xa noonoong cuni ƥetik fo o cigdel olaa fi’na xa noonoong cuni qarɓeen ƭik fo xa noonoong cuni ƥetik, ndendandin fo ke ɗegeena nen o mbiñ o tedu. Mbind Isra’el fop na njegkan.

⁷O kelwaar oxe xan a lasel lanq kaa ngaritna na xa saax xa ƭaq axe no fiisel ole kesaneena o Yaal oxe fo me ɗeganeena teeru fee. Lanq keene xan a njoob no mudand boo no maag olaa Mediterane fo no batand boo no ŋat olaa no batand ne kam Isra’el. O cigdel um xan a fodir fo ole no fiisel ole na carind aluu refna.

⁸Neene, gelwaar we xan a njeg lanq a qoox den kam Isra’el. Gelwaar we mi ñaatlandkatee xeet es. Xan a nqaƴan a carind ake Isra’el ke yoqna no saax le.»

⁹Keeke o Yaal oxe na refkaa boo faw a layu: «Nuun gelwaar we Isra’el, tige nuun a ɓeka a sak! Mbaasyo ñagadil ke fo a ƭom-yedar ake, ndeef a ƭat fo o cofel, nqaƴ xeet es fee nu toroxandaa. Mi o Yaal oxe na refkaa boo faw layun.

¹⁰Fat nu njeg balaas fa mbaax fo eedir paax fo a poox a paax.

¹¹O eefa le na eedteel pep fo o baat ole na eedteel ke fi’na foofi na mbodirkaa: O baat ole xan a yipaa a seek xarɓayandeer ale no homeer[41] soo o eefa le itam a seek xarɓaxayandeer ale no homeer. Xan a ƭeetloortel neene no homeer ole.

¹²O sekel[42] xaaliis xan a fodir fo xa geeraa qarɓeen ƭik soo o miin a fodir fo xa sekel qarɓeen ɓetuu fa leng.

¹³Keeke refu sadax fee nu mbatinkaa: A seek qarɓeen ɓetuu fa lengandeer ale no saxade le na bele fee mbaat lorso fee.

¹⁴Keeke dalne na diwliin fee: A seek teemeedandeer ale na diwliin fee.

¹⁵Mbaal leng, no ged paal teemeed ƭik kam xa kayand xa nequ xe Isra’el xan a ɓoxotel nen sadax fa ndoxel mbaat sadax fa njamsa’oor, ndax ta ref sadax fa mbaasnoor pakaad na xeet fee. Mi o Yaal oxe na refkaa boo faw layun.

¹⁶Xeet fee fop no saax le a mbara o mbatnan o kelwaar oxe Isra’el a las aleene.

¹⁷O kelwaar oxe gadooxu sadax toxel ke fo sadax tuufe-duufe ke fa fee na biiñ fee yaa fo toofeen ke, no fo nqool fo ndeɓ ne, no pes a ñootnax ke fo no qew ke no mbind Isra’el fop. Xan a ɓoxot sadax fa mbaasnoor pakaad fee, sadax lakas ke, sadax toxel ke fo sadax camsa’oor ke ndax mbind Isra’el a njeg a baasan.

¹⁸Keeke o Yaal oxe na refkaa boo faw a layu: No ñaal eetaand ne no nqool o eetaand onqe, fat o xot o nqoox o ndeɓ onqaa jegeerna sik soo watin bakaad fee kam Mbind Roog ne.

¹⁹O saasadax oxe xan a xot no fo’oy le na sadax fa mbaasnoor pakaad fee soo a ɗuumin na tayil ake fo na toodook a ƭak ake no don-maax ole no Mbind Roog ne, no kooñ nahik ke no tiƈoor ke no sadaxand ole fo na tayil ake na toodook ake na xa ton-maax axe no maax-kam ole.

²⁰Xan o fi leng kut ke no ñaal ɓetuu ƭikandeer ne no nqool onqe, no kiin oxe bakaadna too diyiran mbaat ta ñak o and teen tig. Neene, xan o ɓogid Mbind Roog ne.

²¹Ñaal xarɓaxay fo ñaal nahkandeer ne no nqool o eetaand onqe na refkaa na nuun Xew fee na colandax ale. Ndoofeen naa na fi’aa ñaal ɓetuu ƭik oo. Puuru canja’e na mbugko ñaameel teen.

²²No ñaal neene, o kelwaar oxe xan a fi’an a xoox um fa xeet fee fop sadax nqoox yaam bakaad fee.

²³No ñaal ɓetuu ƭik ke fop na xew fee, xan a ɓoxot o Yaal oxe nen sadax fa ndoxel, qoox ɓetuu ƭik fo a suk paal ɓetuu ƭik, njegeerna sik den fop, no leng no ñaal ɓetuu ƭik ke fop, a ɓoxot itam ñaal nuu refna suk fambe nen sadax fa mbaasnoor pakaad.

²⁴Fat a yoonandit nqoox nuu refna fo suk mbaal luu refna ngap kilo qarɓeen tadik bele fo ngap xa liitar ɓetaa ƭaq diwliin.

²⁵No ñaal xarɓaxay fo ñaal ƥetkandeer ne no nqool o ɓetuu ƭikandeer onqe, yaa fo ndoofeen ne na Xew fee no ƭiif ke, fat o kelwaar oxe a ɓoxot boo ñaal ɓetuu ƭik sadax fa leng kut fee yaam pakaad ke, sadax fa ndoxel fa leng kut fee fo sadax diwliin fa leng kut fee.»