Read NQAARIIT NE ROOG Heseki’el 47 Bible Online

Heseki’el 47 - NQAARIIT NE ROOG bible

Heseki’el 47

¹O koor oxe a ɓisaxam farna fo ndokand ne no Mbind Roog ne. Maaga, ga’aam foofi laa sutoortoogna ɗuga peg ne no Mbind Roog ne, a sagaa no batand, yaam mbaambrand ne no Mbind Roog ne kaa faambir’u no batand. Foofi le kaa fudooxoogu ɗuga o saax o ñamaak ole no Mbind ne, a reef no ɓemb-roog o ñamaak ole no sadaxand ole.

²A suttiidaxam na ƭat ale no don-maax ole no ɓemb-roog o janoon soo a widnooraam tafil fee boo no don-maax olaa jasnoorna fo batand. Foofi le kaa xayoogu no saax o ñamaak.

³Ye o koor oxe a sutooxna farna fo batand, a saq’a no ɓay um o ƥaak o liiƥir, too a liiƥa xa noonoong juni. A jootnooraxam foofi le, too foofi le a garaxam na xa pem.

⁴A liiƥahina xa noonoong juni soo a jootnooraam foofi le, too foofi le a garaxam no kuɓay. A ɓaata o liiƥ xa noonoong juni soo a jootnooraam foofi le, too foofi le a garaxam no ndet.

⁵A liiƥahina xa noonoong juni too a reeƭata a ƈufnand alaa waag’eeruuma o joot, yaam foofi le kaa xooɗ’u boo kaa war’el o weƴ. A ƈufnand alaa waag’aandeena o joot a reeƭu.

⁶A layaxam ee: «Wo fee o ƥiy no kiin, ndax woxey ga’aa?» O koor oxe a ɓisaxam boo maa liitooxna, soo a nomtiidaam na ƥeeraamb ale na ƈufnand ale.

⁷Ye nomtooxiiduuma, ga’aam ee a jeg’a na ƥeeraamb ale na ƈufnand ale taxar mayu o saax oo saax.

⁸A layaxam ee: «Foofi lene xan a sutoox, a sag no batand, a fudoox no xuluɓ ole Yordaan, soo a rok kam o maag o Xanju le. Yaa ta jimbooxkaa kam o maag ole, poofi ke no maag ole xan a maasat.

⁹Kuu na yo’nooxaa teen xan a ñoow muu a ƈufnand ale fadna. Xan liƥ ke a naang gañ yaam ne foofi leene a fadkaa maaga too xan poofi ke a maasat. Muu a ƈufnand ale a fadna xan o ñoow a jeg maaga.

¹⁰Maaga, faafaal we xan a ndef na ƥeeraamb ale. No ke xotitna En-Gedi boo En-Eglayim, xan paal ke a ndeɓeel. Liƥ keene xan a ndef xa qos liƥ axe no maag ole Mediterane, a naang gañ.

¹¹A kal ake ten fo a paas ake ten maasandkaand, xan a nqaƴanel fo jem ole.

¹²Na ƈufnand ale na ƥeeraamb ake ten, no saax oo saax xan taxar tiirim kuu ndefna a sax teen. A naf den leeƥkee muk too ñakkee xa tim. Xan a ndimaa o nqool oo nqool, yaam poofi ke ten xan a sutooraa no Mbind Roog ne. Xa tim axe den xan a ndef ñaamel, a naf ake den a ndef teex mbaadnoor.»

¹³Keeke o Yaal oxe na refkaa boo faw a layu: «Kene na ndefkaa xa ŋat axe no saax le nu lasrandkaa nen lam a carind xarɓaxay fo a carind a ƭak ake Isra’el. Yoseef xan a jeg a las a ƭak.

¹⁴Xan nu lasrin ne daaɓoorit’anuuma o ɓay es took ee xam ci’in daan nuun. Xan nu njegik saax lene, oxuu refna fo a las um ta ref mbaafaap nuun.

¹⁵Keeke na ndefkaa xa ŋat axe no saax le: Farna fo ɓemb-roog o janoon, ke xotitna no maag ole Mediterane, a joon fo a ƭat ale Hetlon boo no ndokand naa Sedad,

¹⁶a reef Hamat fa Berotay, a suur Sibrayiim ndeer o ŋat ole Damaas fo ole Hamat boo Hatser-Hatikon farna fo o ŋat olaa Hawran.

¹⁷Neene, o ŋat ole xan a ref no ke xotitna no maag ole boo Hatsar-Enon, a reefan o ŋat ole Damaas no ɓemb-roog o janoon fo o ŋat ole Hamat: Keene na refkaa o saax ole no ɓemb-roog o janoon.

¹⁸O ŋat ole no batand xan a xotit no mbiñ onqe refna ndeer Damaas fa Hawran, a joon fo o xuluɓ ole Yordaan, ndeer o jegel ole Galaad fo saax le Isra’el, soo a ret boo Tamaar no maag o Xanju le. Keene na refkaa o saax ole no batand.

¹⁹No ɓemb-roog o ñamaak, o ŋat ole xan a xotit Tamaar boo no poofi kaa Meriba kam Kades, a joon fo a ƈufnand ale Misira, a sag farna fo maag olaa Mediterane. Keene na refkaa o ŋat ole no ɓemb-roog o ñamaak.

²⁰No mudand, o maag ole Mediterane na refkaa o ŋat ole no ke xotitna no ɓemb-roog o ñamaak boo no ndokand naa Hamat no ɓemb-roog o janoon. Keene na refkaa o ŋat ole no mudand.

²¹Xan nu lasir saax leene a ndeer nuun, ndeefandin na carind ake Isra’el.

²²Na pexey mbanjang ne xan nu nqaajrandin nen lam a qoox nuun fo xa kataakoon axe ngenna a ndeer nuun, na ndimkaa xa ƥiy a ndeer nuun. Xan a ndef na nuun nen waa ndimeena no saax le a ndeer Ii-isra’el we. Xan a lasir fa nuun lam ne na pexey mbanjang ne a ndeer a carind ake Isra’el.

²³Meene, kam a carind ale o gataakoon ole a genkaa nu cooxitkan a las um no lam ne. Mi o Yaal oxe na refkaa boo faw layun.»