Read NQAARIIT NE ROOG Heseki’el 5 Bible Online

Heseki’el 5 - NQAARIIT NE ROOG bible

Heseki’el 5

¹«Wo fee o ƥiy no kiin, jangi laƥ mbeelu, jiriiñoorin nen tuusir o raataam. Xan o ruustin xoox of fo o raataam of, cinj kaaga o eed wiil le soo saamin.

²Doxi teen a qaaj a tadkandeer ale na fiɗel a ndeer ee ndeer teeru fee, yaa ñaal ke no song le a mbadnooxkaa. Xoti teen a leng na qaaj a tadak ake, xawtin laƥ ne me widna teeru fee, pasar leng na qaaj a tadak ake no nqeñ ne, too xam daabtin laƥ.

³Xan o watin teen kaa jaakeerna, fofin no noflax ndoki of.

⁴Xan o watnahin teen leng-leng kaa o deɓkaa na fiɗel le soo doxin teen. Xan fiɗel a biltooxanit teen mbind Isra’el.»

⁵Keeke o Yaal oxe na refkaa boo faw a layu: «Yeerusaleem oo. Kaam doon’un ndeer qeet ke fo a saax ake mbiduuna.

⁶Kaa nanaƭaran kebil es fo kañaan naa hupna ne no qeet lakas ke, a ɗap bargal es kupu a saax ake mbiduuna, yaam we ngenna teen kaa nqeef kebil es too ndeefee bargal es.

⁷Ten taxu keeke layum, mi o Yaal oxe na refkaa boo faw: Feek kaa nu moƴ o siiknoorel ee qeet ke mbidna a nuun, yaam ne nu ñaaƴeerna no bargal es too nu mbadnee kebil es, a pesoorooƭ no qeet ke mbidna a nuun sax moƴu ake nuun,

⁸no keene, keeke layum, mi o Yaal oxe na refkaa boo faw: Xam geleerooxan a nuun itam. Xam dalin hate es a ndeer nuun, na kid no qeet lakas ke.

⁹Cednooxu ke fi’oona xan a tax um fi’ong kaa moseeruuma o fi too fi’katinum muk.

¹⁰Ten taxu xan paap ke a ñaamaa xa ƥiy den a ndeer of, soo xa ƥiy axe a ñaamaa paap den. Xam dalin hate es took of soo pasar no nqeñ ne we na yoqkaa na wo.

¹¹Ten taxu ne ta wooritna yee mexe ñoowaa, mi o Yaal oxe na refkaa boo faw kaam ee: Feek kaa nu nqoolaƭarandit o mbiñ o tedu nqe mi cakalaaru ke nuun fop fo cednooxu ke nuun fop, mi itam xam seeƭ a nuun too yirimkiim a nuun, wuuskiim a nuun.

¹²A qaaj a tadkandeer ale na nuun xan a nqon na piste, mbaat biim a saŋik a nuun a ndeer teeru fee. A qaaj a tadkandeer ale na nuun xan a nqon na xire fee me widna teeru fee, soo a qaaj a tadkandeer ale na nuun um pasar a den, soo daabit a den laƥ ne.

¹³Fuux es xan a ret boo a fag tak. Xan fuux es a biltoox took den, um rabdinoox, too xan da and ee mi o Yaal oxe layu kam naal es, ret boo paang fuux es took den.

¹⁴Xam fi’ong o fes a pec, o mbiñ onqaa niwaƭareena a ndeer a saax ake mbidoonga, na kid no dak-a-faaf we fop.

¹⁵Xan o ref o mbiñ onqaa niwaƭareena, soo a weneel, o njapil o ƭeetoor fo kaa na diidlandaa na saax ake mbidoonga, yaa um fadinkaa took of kate es fo fuux ɗomu es fo a qaw akaa yoonna fo ngañak. Mi o Yaal oxe layun.

¹⁶Yaa um xaƴkaa took nuun[2] a kas a paaxeer ake no biim le njaleena a paax ndax da yaq, xam xaƴ a den ndax um yaq a nuun, yaam xam ɓaat nqeex nuun. Xam fi nu ñak ñaamel teyu.

¹⁷Xam hebliid took nuun biim fo ƥaaɓaan na saŋikkaa xa ƥiy nuun boo da mbag tak. Piste fee fo fo’oy le xan a ndeef a ndeer of. Xam hebliid xire fee took of. Mi o Yaal oxe layun.»