Read NQAARIIT NE ROOG Heseki’el 7 Bible Online

Heseki’el 7 - NQAARIIT NE ROOG bible

Heseki’el 7

¹O Yaal oxe a daawnaxam fa lay um na xa ƭelem axene:

²«Wo fee o ƥiy no kiin, keeke o Yaal oxe na refkaa boo faw a layu lanq ke Isra’el: Muukandoong ne yoo! Muukandoong ne xey a garaa no cat nahik ke no saax le.

³Ndiiki muukandoong ne xe garaa took of. Xam hebliid fuux es took of, hate’ong na pesorooƭ of soo sufong cednooxu ke wo fop.

⁴A kid es yirimkirang too wuuskiroong, ndaa xam sufong a ƭat ake wo, cednooxu ke wo a ngen a ndeer of. Maaga, xan nu and ee mi refu o Yaal oxe.»

⁵Keeke o Yaal oxe na refkaa boo faw a layu: «Taamaala, taamaala fa njegee nand fey a garaa.

⁶Muukandoong ne xey a garaa. A yokooxanaang, o ten oo xeene garaa.

⁷Wo yoqte, wo xe genna no saax le. Hap fee a fada, bes fee a matiida, bes fee na nootax ale too xa ƈeel njibkatee took xa coong axe.

⁸Ndiiki koy, miñkatee dara xam ɓax fuux es took of. Fuux le mi xan a jeg ne ta bugna na wo. Xam hate’ong na pesorooƭ of, soo gadnong cednooxu ke wo fop.

⁹A ngid es yirimkirang too wuuskiroong. Xam gadnong a pesorooƭ of, cednooxu ke wo a ngen a ndeer of. Maaga, xan nu and ee mi refu o Yaal oxe, oxe na xawaa.

¹⁰Ñaal ne xey! Oxey a garaa! Wo yoqte. Kañaan ne a fiɗa, o nga’atinax onqe xe gañ.

¹¹Mbariƴ ne oxe naŋ a geenoox, ndax ta ref o loq kañaan. Dara yoqkatee na den, dara no combol den, too ƭomatooxkataand.

¹²Hap fee xe garaa, bes fee a matiidaa! Baa o ciijik oxe a felakinoox, baa o ciijikax oxe a ɗomatoox, yaam fuux ɗomu le a biltooxana faan le na teeru fee.

¹³Ha’aa, o ciijikax oxe xaaditkee ke ta jikooxna, a maadangaa o ñoowaa sax oo, yaam ke feeñleena no jeg den fop xan a fadnoox. Oxuu refna kaa saaƭoox no njofaƭar, ten taxu o leng mucilkee o ñis um.

¹⁴A luuƥ ale a jiba, fop a jagandooxanel, ndaa o leng retee na xire, yaam fuux ɗomu le mi a biltooxana faan le fop.»

¹⁵«Laƥ ne xe tafil, soo piste fo biim a ndef kam. Oxe na refkaa na koƥ ale, xan laƥ a ñaamin, oxe na refkaa kam teeru fee, xan biim fa piste a saŋkin.

¹⁶We mucna na den xan a ƥostoox, a ndet took xa coong axe, nen a qoɗoxoñ akaa na ŋuuraa kam a yulanq ake.

¹⁷Xa ƥay axe fop xan a yaar, kuɓay ke fop a leeƈoox.

¹⁸Xan a nderoox xa saaku, soo diid a dam a den. Xan mukit ke fop a seeƈaar, a qoox ake den fop a ƥuurel.

¹⁹Xan a ndeɓ xaaliis den no ped ke, soo wurus den a refat ƭaaq. Xaaliis fa wurus mbaagkee o mucil a den no ñaal ne no fuux le no Yaal oxe. Mbaagkee o safin a peep den, mayƭand o fud den ne’aand, yaam kaa ndef ɓil le na tolofnooraa a den, took o ngar fo tooñ den.

²⁰Kelax den kaa mbi’in ka’atinoor. A njala teen nitaal roog cakalaaru ke den, nitaal cednooxu ke den. Ten taxu xam fi ta refat na den ƭaaq.

²¹Xam ɓoxotin na xa ƥay no genar ndax da ngefin tuƈ, na xa ƥay no we moƴna o soxod took lanq ke, ta ref cangale, soo da maasandin.

²²Xam xuun a den soo o jeg es a maasandel. A cuut ake xan a ndok teen soo a maasandin.

²³Xawi ceen yaam saax le kaa may muut fo kate yednu, teeru fee a naag tem fo a ƭom-yedar.

²⁴Xam ɓisiid qeet ke moƴna o ndef wiin fo’oy, ndax da njaɓ pind ke den. Xam xuuf o nga’atinax no yaal toole ke fo mbiñ fo tedu ne den a maasandel.

²⁵Yaa naqad fee a garkaa, xan a mbaaƭaa jam, ndaa ga’kaand sen.

²⁶O njakad kaa reef took o njakad, o nan o feleer fo o gend um a ndeepatir. Kaa da ƭeetnooxaa me no tuleer, ndaa a cangin a katu no saasadax a naaga mes, o as o inooru na koorgi a ɓoow jang.

²⁷Xan o maad a jaañoox, o kelwaar a lipoox o ñak yaakaar, xa ƥay baadoole a sendaa. Xam rabid a den ciko den, hate’it a den ne da ngate’taa. Maaga, xan da and ee mi refu o Yaal oxe.»