Read NQAARIIT NE ROOG Heseki’el 9 Bible Online

Heseki’el 9 - NQAARIIT NE ROOG bible

Heseki’el 9

¹Roog a falaloorta o ñuxur o jegu doole no nof es ee: «Matiidyo, nuun we mbarna o nqaw teeru fee, oxuu refna a pokoox ƥonax saŋkir um!»

²Maaga, ga’aam goor ɓetuu fa leng waa inoortiidoogna no don-maax took olaa jasnoorna fo ɓemb-roog o janoon, oxuu refna a pokoox ƥonax saŋkir um. A ndeer den a jeg’a o koor oxaa rokooxna njoor, a saq a pindir no qap um. A ngara soo a ngeenoox paam o sadaxand xanjar ole.

³Maaga, o ndam onqe na Roog fee Isra’el a yoɗoorta took mbindel yeeyetax ne, a jagin no peg ne no Mbind Roog ne, soo a xoy o koor oxe rokooxna njoor ne, a saq a pindir no qap um.

⁴O Yaal oxe a layaan ee: «Widi teeru fee bo ta xet, a ndeer Yeerusaleem, too ñaas na tagid wiin we na iinaa soo a ƭomatooxaa yaam a pi a cednooxu ke na mbi’eel teen fop.»

⁵Cinj kaaga, nanaam ta layaa lakas we yee: «Ndeefaamoo kam teeru fee soo nqaw! Ba a kid nuun a yirim too ba nu mbuus!

⁶Nogoy we, mbes ke, mboƥ ndoog ne, xa caaƈ axe fo rew we, mbaryo a den, saŋik a den, ndaa oxuu saqna o ñaas ole ba nu nduqin. Nqotityo no Mbind ne mi.» A mberta no goor we, maak weene ndeeƭna mbaambir Mbind Roog ne.

⁷Maaga, a laya a den ee: «Nqoolaƭarandyo Mbind ne mi, soo mayƭand xa maax axe fo xa tal! Sutooxyo!» A sutooxa, a ndef no nqawaa kam teeru fee.

⁸Ye da nqawaa, too um yoq’u koƭong, yenaam, gung a lanq, soo falaloox ee: «Ey, o Yaal oxe na refkaa boo faw, ndax xan o saŋik yoqatin we Isra’el, yaa o ɓaxaa fuux of took Yeerusaleem?»

⁹A doonaxam ee: «Tooñ ne no mbind Isra’el fa Yudaa kaa magin lool. Saax le oxe muut fo boom, teeru fee a naag gañ fo njofaƭar, yaam kaa da layaa yee: ‹O Yaal oxe kaa waas saax le pelek, ga’ee dara.›

¹⁰Mi itam, yirimkiim a den too wuuskiim a den. Xam gadin a den a pi den.»

¹¹Maaga, o koor oxe rokoox’ina njoor, a saq a pindir no qap um, a gara a jangtoox o Yaal oxe yee: «Fi’aam ke hebil’axamoona.»