Read NQAARIIT NE ROOG Dañel 10 Bible Online

Dañel 10 - NQAARIIT NE ROOG bible

Dañel 10

¹No hiid o dadkandeer olaa no maat Kiirus fee o maad Persi, Dañel fee xoyoogeena itam Beltasaar a daawne mbeeñil. Ke ta daawneena ndigil kak oo, ndaa a xija lool soo a sogkan o dam, a and mbeeñil ne.

²«Na jamaane faaga, mi Dañel, reeƭaam na yogorlax boo pes tadik takooxiidu.

³Ñaamoogiim njaw mbelu leng, a tegeƴ mbaat biiñ rokoogee no don es, too ɗuumooxoogiim boo neen pes tadik takooxiidu ke a mbaafu.

⁴No ñaal qarɓeen ƭik fo ñaal nahkandeer ne no nqool o eetaand onqe, reeƭaam na ƥeeraamb ale no xuluɓ ole Tigere.

⁵Yoɗaam a kid es, ga o koor oxaa rokooxna ndoki njoor soo a saq no ndet um o kumnoor wurus fa nqoolu qac.

⁶Cer um kaa teleloogu nen ɓil jafeñu laa ne’eena kirisolit, mukit um a meleƈaa nen o hiiñaand, a kid um a miric-miricnaa nen ƈulfaan fiɗel, xa ƥay um fo a caf um a telelaa nen xanjar faa ɓodaxneena, soo o ñuxur um a fangoortaa nen combol no faan maak.

⁷Mi Dañel, mi soom ga’’u mbeeñil ne. Goor we ndeeƭna fa mi koy nga’’iran, ndaa a ndiid’a diid maak too a ƈufa a ƭasik.

⁸Mi soom yoq’u maaga, ɗeetaa mbeeñil maak neene, ñakat doole, foor a kid, nandakaanat too jegatiim o njembe.

⁹Nanaam o ñuxur um, too ye nananuuma, ñak’ataam sagu es, mukit es a ref a lanq.

¹⁰Maaga, o ɓay a duqaxam soo a yo’naam, um sip kuɓay es fo xa ƥay es.

¹¹Cinj kaaga, a layaxam ee: ‹Wo Dañel, o koor oxe Roog a fexna, andi ke um layiidang. Inooxi geenoox, yaam kaam luliidel me wo.› Ye ta layaxama keene, naagaam daket, sendaa.

¹²A doona teen ee: ‹Dañel, koo ba o diid, yaam fa lay of a nane no ke xotitna no ñaal mberaand ne neewandooxoona mbaambir Roog ndax o jeem o and, too fa lay of feene sax sax taxu um gar.

¹³Malaaka fee na yetooxaa maat ne Persi koy, a kandaxam boo ñaal qarɓeen ƭik fo ñaal leng, ndaa Mika’el fee o leng no kelfa ke no malaaka ke a ƴufgiidaxam. Keene geek’axam boog paam no maad we Persi.

¹⁴Ndiiki koy, kaam andnooriidong ke na dalkaa xeet of no ñaal palakaand ke, yaam mbeeñil nene itam kaa jagin no ñaal keene.›

¹⁵Ye ta layaxam keene, lupandooxaam, naag tek.

¹⁶Maaga, mbindeef lakas naa nandtoogna o kiin a gara, a duq muuceek es, too yaƥatatinaam soo lay oxe geenoox’ina mbaambir es ee: ‹O yaal es, mbeeñil ne kaa ɓis o laaw es, too jegatiim o njembe.

¹⁷Nam mi fee o tag of refeerna tus waagum o layit fa wo fee o yaal es? Jegatiim o njembe, haaƭ a xoxaxam.›

¹⁸Maaga, oxe nandtoogna o kiin a duqahinaxam, a saƭakinaam.

¹⁹Cinj kaaga, a layaxam ee: ‹O koor oxe Roog a fexna, ba o saɗar! Dara damkirang! Saƭakinooxi, jeg njambaar!› Ne ta layoogna fa mi, doole es a nomtooxiida, too layaam ee: ‹O yaal es, layi, yaam saƭakinaxamo.›

²⁰Maaga, a layaxam ee: ‹Ndax andaa ke taxna um gar me wo? Kaam gar ndax um andnoorong ke bindeena kam safe le no ndigil ne. Ndiiki koy, mexe nomtooxaa ndax um xire’ik fa malaaka fee na yetooxaa Persi. Mexaa maafan koy, xan malaaka fee na yetooxaa Yawan a gar, too o leng ƴufgiidkiraam, a refangee Mika’el fee na yetooxaa a Isra’el,