Read NQAARIIT NE ROOG Dañel 11 Bible Online

Dañel 11 - NQAARIIT NE ROOG bible

Dañel 11

¹too um dimle’oogun soo damtan no hiid o eetaand ole no maat Daryus fee o Meemedi.

²Ndiiki koy, xam andnoorong ndigil ne.› » «Ga’angi, xan a jegahin maad daduk waa na maadooxkaa Persi, soo o nahkandeer oxe a gar, a fokatanoox halal kupu lakas we fop. A saƭkandangaa maat um yaam halal fee ten, xan a inooxan fa doole maat ne Yawan.

³Maaga, xan o maad o qir o say a inoox, a adooxan maat maak soo a fi’aa kuu feluuna.

⁴Yaa ta dalinkaa maat um boo a saƭkandin, maat um xan a gef soo a xaajoox nahik. Xa ƥeem ndondandkiran, ndaa lakas na lasirkaa maat um. Kaa koy, weene njegkee doole fee ta jeg’ina.

⁵O maad oxe no ɓemb-roog o ñamaak[9] xan a jeg doole, ndaa o leng no kelfa ke ten na hupkan doole, too maat um na moƴkaa o yaaj ne ten.

⁶A retangaa boo a laq xa kiid koy, o maad oxe no ɓemb-roog o ñamaak fo xe no ɓemb-roog o janoon[10] xan a tipir qaariit, too o ƥiy o ndew onqe no maad oxe no ɓemb-roog o ñamaak xan a dolnir fo o maad oxe no ɓemb-roog o janoon. Kaa koy, nqaariit ne miñkee, too o tew oxe fo o kor um fo o ƥiy den fo jeefeer we na yoonkaa fo ten xan a mbarel na pe akaaga.

⁷O tew oxeene koy, xan o pog um ŋaƈit a rondand a faap um, a songiid xiixire we no maad oxe no ɓemb-roog o janoon, a gomir fa den soo a maaf a den.

⁸Xan a jangal a den soo a ɓis Misira nitaal roog ke den fo xa taaƴ xa cawne xe den fo tig oo tig cegu njiriiñ ke den mbi’teena xaaliis mbaat wurus. Cinj kaaga, xan a ɗaayoor fo o maad oxe no ɓemb-roog o janoon boo xa kiid xa leng-leng.

⁹Cinj kaaga, o maad oxe no ɓemb-roog o janoon xan a songik maat ne no maad oxe no ɓemb-roog o ñamaak, ndaa xan a ñof o nomtoox no saax um.

¹⁰Xa ƥiy axe no maad oxe no ɓemb-roog o janoon xan a mbapooxan xire, a mbokat a yaj a mayu. O leng na xa ƥiy axe xan a inoox fo xiixire um, a xaañ o ŋat ole nen a ƈufnand alaa balna. Cinj kaaga, boo ta nomtooxaa no saax um, xan a dal took teeru fa njegu saŋe fee no maad oxe no ɓemb-roog o ñamaak.

¹¹Xan o maad oxe no ɓemb-roog o ñamaak a fuux boo a buɓaa too xan a songik o maad oxe no ɓemb-roog o janoon, na fokatkaa a yaj a maak, ndaa xan o maad oxe no ɓemb-roog o ñamaak a maafin.

¹²O maad oxe no ɓemb-roog o ñamaak xan a xaaƴoor o ndam onqeene, too ke ta warkaa war wiin cuni-cuni fop oo, taxkee o ndam onqeene a suur.

¹³O maad oxe no ɓemb-roog o janoon xan a fokatahin a yaj alaa moƴna o magin a eetaand ale. A cinj xa kiid xa leng-leng, xan a yoontiid xiixire mayu waa ƥonooxna tigi.

¹⁴A koom, wiin mayu xan a inooxan o maad oxe no ɓemb-roog o ñamaak. Na xeet of sax, wo Dañel, wiin fo’oy xan a inooxanin, ndax mbeeñil ne a fadnoox, ndaa xan a tolof.

¹⁵Xan o maad oxe no ɓemb-roog o janoon a gar, a max a uum lanq a songir soo a jaɓ teeru fa njegu saŋe fee. Xiixire we no ɓemb-roog o ñamaak, ke da njegna a yaj no xir say fop oo, mbaagkiran o nqox. Njegkee doole um sax.

¹⁶O maad oxe no ɓemb-roog o janoon songiidna xan a fi kuu feluuna, too o leng waagkiran o xox. Xan a dal no saax le moƴna o mos[11], a yaqaa retaa.

¹⁷Took o bug o maadooxan maat ne no ɓemb-roog o ñamaak fop, xan a xaariitoor fo o maad oxe no maat neene soo a ci’in o leng na xa ƥiy xa tew axe ten, ta dolooxankin yaam a bug o biime’noorin soom, ndaa jegkee ne ta bugna, too yuuƥ um neene fadnooxkee.

¹⁸Maaga, xan a geleerooxan a saax a maamaag ake, a jaɓ mayu na den. Kaa koy, xan o aa-adax no xiixire a xuuf o ñak o sed tig ole ten, a rabdinooxin took um.

¹⁹Cinj kaaga, xan o maad oxe a geleerooxan teeru cegu saŋe ke no saax um, ndaa xan a tolof a yen, a sooƴ boo xoo.

²⁰Oxe na rondandkan xan a hebil o taarabdinax juuti me moƴna o mos no maat um. Kaa koy, cinj a pe a leng-leng o maad oxeene xan a maafel, too refkee na jama mbaat na xire.

²¹O kiin o caree tus oxaa jageerna fo maat na rondandkan. Xan a gar na waxtu faa foog’aandeena, a jaɓ maat ne fo naanaxir.

²²A yaj no xiixire kaa mayitna nen a ƈufnand alaa balna mbaagankiran tig. Xan a mokand a den rip soo a war Kelfa fee no ngiɓoor ne[12].

²³Xan a xaariitoor fo a saax a mayu soo a fesoor o ƴiƴ, a xire boo a jegat doole lool, ke wiin mayeer a ndeefkeeruuna fop oo.

²⁴Xan a rok kam fo mbiñ ne moƴna o nqaaɗ no jegel ole na waxtu faa foog’aandeena, a fi’aa maaga kaa paap um fo daan um a moseerna o mbi. Xan a jangal saax le, a lasrand njangal ne fo kalal ke we mbarna fo ten. Xan a yuuɓ sax o song saŋe ke, ndaa keene fop miñkee.

²⁵Xan a hooloox doole um, a saqatin njambaar, a adooxan a yaj a maak no xiixire, a gomrik fo o maad oxe no ɓemb-roog o ñamaak. O maad oxe no ɓemb-roog o ñamaak oo xan a fapooxan xire, a fokat a yaj a maak a cegu doole no xiixire, ndaa taxkee ta xox, yaam xan a sakanel pexey.

²⁶We na mbogkaa fo ten o roon xan a koocin. Xan xiixire we ten a maafel, boo mayu na den a nqon.

²⁷Oxuu refna no maad ɗik weene xan a fofan o kend um paaxeer, too a mbogangaa o roon sax oo, xan a naxraa. Kaa koy, njegkee ne da mbugna, yaam waxtu fee Roog a hapuuna fadafulee.

²⁸O maad oxe no ɓemb-roog o janoon xan a nomtoox no saax um, a ɓisloox halal fa mayu. Boo ta gataa xan a gomir fo ngiɓoor ne Roog a dalinna fa xeet um soo a sogkaa o fadnook no saax um.

²⁹Yaa hap fee Roog a dalinna a fadkaa, xan o maad oxe no ɓemb-roog o janoon a songiidahin o maad oxe no ɓemb-roog o ñamaak, ndaa no jaf laaga koy, tige refitkee nen jaf le faafna.

³⁰Xan a kaal no maamaag a inoor no mudand, a songiidin. Xan a gefiɗ, a naag cook, a nomtoor a ƭat ale ta garitna garit. Cinj kaaga, xan a fuux boo a buɓaa, a gomir fo ngiɓoor ne Roog a dalinna fa xeet um. Xan a nomtooxiid soo a damit we na mbeskaa a cinj ngiɓoor tedu ne.

³¹Xan a luliid xiixire da maasand o mbiñ o tedu nqe refna saŋe ne, a ñuf sadax ke ƥoxotoogeena a Roog bes fuu refna, a sip maaga Cakalaaru ke sibdeena.

³²Xan a soobaa wiin we mbesna a cinj ngiɓoor tedu ne, da saƭik teen. Kaa koy, fop we andna a Roog xan a saƭik no damax den.

³³We njegna o and na xeet fee xan a aqatin wiin mayu. Kaa koy, no ngap o miñeer xan a jeg na den waa ñoot den a nquufkeel, wene a ndoxel boo riw, wene a ƥekel kaso, wene a njangalel.

³⁴Yaa fo ñagadil keene, xan a ƈufgel o ndik, too mayu xan a yoon fa den, a yoon a yulanq.

³⁵Leng-leng no we njegna o and xan a mbarel, soo fa nqon den a ref kaa na xoolandaa xeet fee, a ɓogdan soo a ran-ginan, boo muukandoong ne a helko fo garaa, yaam hap fee fadafulee.

³⁶O maad oxe xan a fi kuu feluuna. Xan a magnandoox, a fakoox mbaambir roog ke fop. Xan a lay qedu sax a Roog fee no roog ke. Xan a jeg ne ta bugna boo yaa Roog a fuuxankan, a fadin ke ta hebooxna.

³⁷A ƭat um yongkee no roog ke daan um a mbaɗooxoogna fo na roog fee rew we a mbex’ina, yaam kaa safkan ee ten hupu roog ke fop, too niwkee a den.

³⁸Ke ta bugko faɗooxaa kañ refu roog fee no teeru cegu saŋe ke, daan um a and’eerna. Xan a niwtan wurus fa xaaliis fo a ƥil a cafeñu fo tig oo tig cegu o njiriiñ.

³⁹Roog fa njan feene a bugko gomritaa fo teeru cegu saŋe ke. Xan a niw fop we na njaɓkaa a roog feene, a fi a den kelfa no wiin mayu soo a ger a den lanq yaaju.[13]

⁴⁰Farna fo muukandoong naa, xan o maad oxe no ɓemb-roog o ñamaak a gomir fo o maad oxe no ɓemb-roog o janoon, ndaa oxeene xan a yen took um fo a sareet fo pis fo a kaal a mayu. Xan a jaɓ a saax a mayu, a maƥ fop nen o jaɓ.

⁴¹Xan a song saax le moƴna o mos, too xan mayu no saax leene a mbarel. Kaa koy, Ee-edoom we fo Moomowaab we fo moƴ-o-jaak ole no Aa-amon we xan a muc no ɓay um.

⁴²Xan a doon o ɓay na saax a pogreer, too Misira sax daŋkee teen.

⁴³Xan a jaɓ kalal kaa ndefna wurus fa xaaliis fo tig oo tig cegu njiriiñ ke Misira fop. Luuluub we fo Kuukuus we sax xan a ƥoxotoox no ten.

⁴⁴Kaa koy, ke ta yeginkeel, ta hat no batand fo no ɓemb-roog o janoon, xan a diidlandin, too xan a retit fuux maak ndax ta duguñ soo a war mayu na den.

⁴⁵Xan a sip ƭiif no maad ke ten ndeer o maag ole fo o joong o tedu le no saax le moƴna o mos. Maaga o mat a saayitkaa, too o leng dimle’kiran.»