Read NQAARIIT NE ROOG Dañel 3 Bible Online

Dañel 3 - NQAARIIT NE ROOG bible

Dañel 3

¹O maad Nebukadnesaar a simta nitaal wurus naa geel um a fi’na xa noonoong qarɓeen ɓetuu fa leng, soo o yaajel um a fi xa noonoong ɓetuu fa leng, a sipin na xa saawit axe Duura no jegel olaa Babilon.

²Cinj kaaga, a lulta o xoyaniidel we ndefanna o maad oxe, caraaf ke, gofornoor ke, aa-as we, geegeek xaaliis we, haahate we fo alkaati ke fo aa-adax we na xa cegel axe fop, da ndoofand nitaal ne ta sip’ina.

³Kelfa keene fop a mbokatooriida mbaambir nitaal ne o maad Nebukadnesaar a sip’ina, ndax da ndoofandin.

⁴Oxe adooxan’ina ndoofeen ne a laya a maak ee: «Nuun fop we inoortiidna no qeet ke fop fo na saax ake fop fo no lak ke fop, nan-gilooxyo kebil neeke:

⁵Boo nu nanna a luuƥ fo a liit fo simb fo o nqilimb fo riiti fo a seeluumb fo kuu na fakteel, fat nu ngung a lanq mbaɗoox nitaal wurus ne o maad Nebukadnesaar a sipna.

⁶Oxuu gungkeerna too faɗooxkiran xan a deɓel ndak fo ndak kam fuur faa na kaƥaa jir-jir.»

⁷Neene boog, yaa wiin we no qeet ke fop fo na saax ake fop fo no lak ke fop a nanna a luuƥ fo a liit fo simb fo o nqilimb fo riiti fo kuu na fakteel, a ngunga a lanq, a mbaɗoox nitaal ne o maad Nebukadnesaar a sipna.

⁸Ndak fo ndak cinj kaaga, Kaakalde leng-leng a ngara me no maad oxe, a ngoƥattiid Yaawuur we.

⁹A laya o maad Nebukadnesaar ee: «Daali maad, yaasam o xuuɗ!

¹⁰Daali maad, wo o mat heblitu yee: ‹Oxuu nanna a luuƥ fo a liit fo simb fo o nqilimb fo riiti fo a seeluumb fo kuu na fakteel, fat a gung a lanq, a faɗoox nitaal wurus ne,

¹¹too oxuu gungeerna, a fañ o faɗooxin, fat a deɓel ndak fo ndak kam fuur faa na kaƥaa jir-jir.›

¹²Me ta refna koy, daali maad, Yaawuur weeke, ndefna Sadrak fa Mesak fa Abed-Nego, ɓoxotoona a naaƈnooƭ ale no jegel ole Babilon, a ƭat den yongee no ke heblitoona. Kaa mbañ ee mbaɗooxkee roog ke wo too ngungee mbaambir nitaal wurus ne sipoona.»

¹³Maaga, Nebukadnesaar a fuuxa boo a buɓaa too a simta o ɓisaniidel a Sadrak fa Mesak fa Abed-Nego. Yaa da ngarna,

¹⁴o maad oxe a laamta a den ee: «Wo Sadrak fa Mesak fa Abed-Nego, ndax kaa nu ndiy mbañ o mbaɗoox roog ke mi soo naang faƥit ee nu ngungkee mbaambir nitaal wurus ne sipuuma?

¹⁵Ndiiki koy, xan nu nanahin a luuƥ fo a liit fo simb fo o nqilimb fo riiti fo a seeluumb fo kuu na fakteel a njibaa, too nu nanangaan, ndax xan nu njaɓ o ngung a lanq, mbaɗoox nitaal ne fi’nuuma? Nu mbañangaa, xan nu ndeɓel ndak fo ndak kam fuur faa na kaƥaa jir-jir, too yaaga roog fum na waagkaa o mucil a nuun na xa ƥay es?»

¹⁶Sadrak fa Mesak fa Abed-Nego a ndoona o maad Nebukadnesaar ee: «I soxla’irang o ndoon no keene.

¹⁷Kaaga a jegangaa, Roog fee i ndagoo-xaa a waaga o mucil a in na fuur faa na kaƥaa jir-jir, too xan a mucil a in na xa ƥay of sax, wo o maad oxe.

¹⁸A fi’angiran sax oo, wo daali maad, andi yee i ndagooxkee roog ke wo too i mbaɗooxkee nitaal wurus neene sipoona.»

¹⁹Maaga, Nebukadnesaar a fuuxana a Sadrak fa Mesak fa Abed-Nego boo a buɓaa soo a tagid um a suptoox. A kafatina fa lay faa soo a hebil fuur faa a saasnel kupu a caf ɓetaa ƭaq ne ta mer’eena o saasnitaa.

²⁰Cinj kaaga, a hebla leng-leng no we moƴ’ina poŋkil no xiixire we ten, da ngum a Sadrak fa Mesak fa Abed-Nego soo a ndeɓ a den kam fuur fa saasu faa.

²¹Ngoor keene a ngume boo ñaƭ, a ndeɓel fo a tokax den fop ndeer ee ndeer fuur fa saasu faa.

²²Ne andoona koy ee kebil ne no maad oxe kaa ñexet’u boo a tax fuur faa a saasnel bo ta hup, ƈulfaan naa a dalfooxa o war goor we ƥek’ina teen a Sadrak fa Mesak fa Abed-Nego.

²³Goor daduk weene o mat, ndefna Sadrak fa Mesak fa Abed-Nego a yena fo kum ne ndeer fuur fa saasu fee.

²⁴Maaga, o maad Nebukadnesaar a jom’a soo a naag daket, a laamit aa-as we ten ee: «Ndax refee yee ngoor tadik kaa ngumeena i ndeɓ’u ndeer fiɗel le?» A ndoona o maad oxe yee: «Daali maad, keene woora!»

²⁵O maad oxe a ɓaata teen ee: «Goor nahuk waa ngumaandeena ga’um, da ñaaƴaa kam fiɗel le, too dara ɗomee a den, soo o mem no nahkandeer oxe a nandtaa o mem Roog.»

²⁶Cinj kaaga, Nebukadnesaar a matiida begax ne na fuur fee na kaƥaa jir-jir, soo a falaloox ee: «Sadrak fa Mesak fa Abed-Nego, nuun dag we Roog fee Took-ee-took, sutooxiidyo too ngar!» Maaga, Sadrak fa Mesak fa Abed-Nego a sutooxiida fiɗel le.

²⁷We ndefanna o maad oxe fo caraaf ke fo gofornoor ke fo aa-as we no maad oxe a mbokatoora, ndax da ngoroox a den, too a nga’a yee fiɗel le waaganee a den dara. Wiil den doxee, toki den sooyee, too nqooñ’ee fiɗel.

²⁸Nebukadnesaar a laya yee: «Roog fee Sadrak fa Mesak fa Abed-Nego a hela o simatel, ten fee luliidna malaaka um, ta mucil dag we ten ngoolooxuuna! Kaa ƭap kebil es, mi fee o maad, yaam o ƥoxot cer den a moƴan a den o faɗoox a roog fa lakas faa refeerna Roog den.

²⁹Ten taxu mexe heblaa keeke. A soƥangaa yee kaa jeg o kiin na xeet fuu ta refna mbaat no saax luu ta refna mbaat na lak fuu ta refna, oxaa na layaa cageer na Roog fee Sadrak fa Mesak fa Abed-Nego fat o kiin oxeene a ɗegel teɓ-reɓ soo mbind um a fokatel a fi’el ngañ. Yaam jegee a roog fa lakas faa waagna o muclit nen o ten.»

³⁰Cinj kaaga, o maad oxe a doxna a Sadrak fa Mesak fa Abed-Nego calel kaa moƴna o njeg o njiriiñ we ta eet’ina o doxin a den no jegel ole Babilon.

³¹Keeke refu ke o maad Nebukadnesaar a daawnaa qeet ke fo a saax ake fo lak ke kam adna fee fop: «Yaasam Roog a ci a nuun jam!

³²Ga’aam ee a faaxa, ndax um andnoor xa anddiloor axe fo comlaand ke Roog fee Took-ee-took a fadinna na mi.

³³Ndaw ne xa anddiloor axe ten a magnitna, comlaand ke ten a njeg katil! Xan a maadooxaa boo faw, maat um a ref no suk boo no suk.»