Read NQAARIIT NE ROOG Dañel 5 Bible Online

Dañel 5 - NQAARIIT NE ROOG bible

Dañel 5

¹Bes, o maad Baltasaar a fi’ana wiin maak we no maat um ndeeƭna juni mbumbaay maak, soo a yer fa den biiñ.

²Yaa ta yaacna saf yaam biiñ fee, a heblita o ɓisiidel a tokol wurus fa xaaliis ake faap um Nebukadnesaar a xotit’ina no Mbind Roog naa Yeerusaleem, ndax ta yerit a den, ten fo wiin maak we ten fo reem fo keƈ-a-salma ke ten.

³A tokol wurus ake ngat’ina no Mbind Roog naa Yeerusaleem a ƥisiide, too o maad oxe fo wiin maak we ten fo reem fo keƈ-a salma ke ten a yerta a den.

⁴Den fop a yera biiñ soo a ndef no simataa roog ke mbi’teena wurus, xaaliis, xanjar, njelem, a teex fo a ƥil.

⁵Na waxtu faaga, qol o ɓay no kiin a mbeeña soo a mbindaa took me ran-gineena no tabax ne no mbind no maad ne mbaambir a pagal xa lampa le. O maad oxe a ga’a o ɓay oleene bindoogna.

⁶Maaga, a foora a kid, yiif um a jaq, ndet um a cuƥtoox, soo kuɓay um a nqawraa.

⁷A falalooxa fa doole ndax ta ɓisiidel ɗeet we, ñaañango we fo maɗag we kam Babilon fop, too a laya yaal-o-and weene yee: «Oxuu janganaxama bind lene soo a tektanaam o ten xan a rokel ndoki daalde mosu, a hiɓanel ceq wurus no cok um soo a refat o tadkandeer oxe doonna o ɓay no maat ne.»

⁸Yaal-o-and we no maad oxe fop a matiida, ndaa mbaag’ee o njang bind le, ne’atiim o tektin o maad oxe.

⁹Baltasaar a diida, a moƴ o foor a kid, wiin maak we ten itam a njaq.

¹⁰Ye lingeer fee a nanna xa buuq axe no maad oxe fo wiin maak we ten, a roka na ndok ale na bumbaayteel, a lay ee: «Daali maad, yaasam o xuuɗ! Baa yiif of a jaq boo a tax o foor a kid neeke!

¹¹Kam maat ne wo, a jega o koor oxaa mayna fo yiif le na Roog fa tedu fee. Na jamaane faap of i nga’a no ten ee oxaa na ga’aa qoolu a refu, a ƴiƴ soo a jeg yiif laa nandna fo le Roog. Keene tax’u o maad Nebukadnesaar fee faap of a dalin’un kelfa no maɗag we fo ɗeet we fo fan we fo saltiki ke.

¹²A saqa yiif jegee sen, a jeg a kortax, a ƴiƴ, a waag o tekit xa ƭaaɗ, a and a nax-o-gut soo a xoolnaa ke wegna xoox. Yaaga boog, fat o koor oxeene ne’eena Dañel, too o maad oxe a ne’’atun Beltasaar a ɓisiidel, too xan a lay ke bind leene a tekitna.»

¹³Maaga, Dañel a ɓisiide mbaambir no maad oxe. O maad oxe a laamtaan ee: «Ndax wo refu Dañel fee fogna no we faap es fee reeƭna o maad a ɓistiidna Yudaa took o hup doole?

¹⁴Nanaam ee kaa o may fo yiif le Roog, too kaa o ga’aa qoolu, ƴiƴ, saq yiif jegee sen.

¹⁵Kaam ɓisiidel xatoor yaal-o-and we fo ɗeet we, ndax da njanganaam bind lene soo a tektaam o ten, ndaa mbaagiran muk.

¹⁶Wo o mat, nanaam ee waagaa tekit xa ƭaaɗ soo xooldand ke wegna xoox. Ndiiki koy, boo waagoona o jang bind lene soo tektanaam o ten, xan o rokel ndoki daalde mosu, hiɓanel ceq wurus no cok of soo refat o tadkandeer oxe doonna o ɓay no maat ne.»

¹⁷Maaga, Dañel a doona o maad oxe yee: «Daali maad, waagaa geek neexil of fo ci’it of mbaat o ci a den o lakas. Yaqanee koy, xam janganong bind le soo tektanong o ten.

¹⁸Daali maad, Roog fee Took-ee-took a fi’a na faap of Nebukadnesaar o maad o maak oxaa mayna o ndam fo o magnel.

¹⁹O magnel oleene ta daawit’ina na Roog a tax’a boo qeet ke fop fo a saax ake fop fo we no lak ke fop a sendaa mbaambir um yaam diid. Oxuu ta bug’ina o war kaa waroogun, a wuusaa oxe feluuna, a yoɗaa oxe ta bugna yoɗ, a neewand oxe ta bugna neewand.

²⁰Kaa koy, ye ta retna boo a magnandoox too wootooxatee o leng, a fudne no maat um, o ndam um a jaɓel.

²¹A raxte ndeer no wiin we, a saqat sagu muumeen, a genik fo xa paam-a-koƥ axe, a ñoowtataa daaƭ nen qoox ke, soo liim le a yenaa took um, boo neen a andu yee Roog fee Took-ee-took kelfa’u maat ke no wiin we soo a ci’an oxuu feluuna.

²²Wo Baltasaar fee o ƥeem koy, ke andoona keene fop oo, taxirang o neewandoox.

²³Kaa o inooxan o Yaal oxe refna na asamaan boo simit o ɓisaniidel a tokol a tedu ke inoorna no Mbind um, nu yertaa a den biiñ, wo fo wiin maak we wo fo rew we wo fo keƈ-a-salma ke wo, doon teen simataa roog ke mbi’teena xaaliis, wurus, xanjar, njelem, a teex fo a ƥil, roog puulu keene naangeerna o nanaa too andee tus, soo fañ o ɓoxot o ndam a Roog fee saqna o ñis of, a gayaa a pi of fop.

²⁴Ten taxu boog Roog hebliidu o ɓay ole bindna kene.

²⁵Keeke refu ke bindeena: MENE, MENE, TEKEL U-FARSIN.

²⁶Keeke a tektu: MENE kaa tekit ee Roog a lima a pe ake maadooxoona, too a paanga a den.

²⁷TEKEL kaa tekit ee meɗnooxee na balaas, too kaa o yelef koƭong.

²⁸U-FARSIN kaa tekit ee maat of xan a xaajel, a cooxel Meemedi we fo Peepersi we.»

²⁹Ndak fo ndak, Baltasaar a heblita Dañel a rokanel ndoki daalde mosu, a hiɓanel ceq wurus no cok um, soo ta yegnitel ee Dañel a refata o tadkandeer oxe doonna o ɓay no maat ne.

³⁰No yeng olaaga sax sax, Baltasaar fee o maad oxe Babilon a ware,