Read NQAARIIT NE ROOG Dañel 6 Bible Online

Dañel 6 - NQAARIIT NE ROOG bible

Dañel 6

¹soo Daryus fee genna Medi a rondandin no maat ne, a jopir ta jegaa xa kiid qarɓeen ɓetuu fa leng fo xa kiid xa ƭaq.

²Daryus a ga’a yee a faaxa ndax ta jil gofornoor teemeed fo gofornoor qarɓeen ƭik waa ndefanuuna, soo a dalin a den muu refna no maat ne.

³A doda daduk waa kelfa’na weene ndefanuuna. Dañel o leng no daduk weene a reeƭu, too we ndefanna o maad oxe a mbar’a o andnooraa a den a ñaaƈnooƭ den fop, ndax o leng ñaamkee o maad oxe.

⁴Dañel kaa hupood’u ɗik lakas weene fo we ndefanna o maad oxe yaam yiif jegee sen le ta saq’ina, boo a tax o maad oxe a bug’un o doxin maat ne fop.

⁵Maaga, kelfa lakas ke fo we ndefanna o maad oxe a mbaaƭoogata maa Dañel a juumitna na ñaaƈnooƭ ale no maat ne, ndaa nga’ee no ten o njuumte leng mbaat o deyaƭar, yaam kaa gore’’u, too jeg’ee dara kaa ta ɓanjteena.

⁶Maaga, goor weene a laya yee: «I njegee dara kaa i njambna a Dañel, a refangee kaa i nga tig na paɗax Roog ale ten.»

⁷Cinj kaaga, kelfa ƭik lakas ke fo we ndefanna o maad oxe a ñofa ndet maa no maad oxaa soo a layin ee: «Wo o maad Daryus, koo yaasam o xuuɗ!

⁸Kelfa ke no maat ne fo caraaf ke fo we ndefanoonga fo aa-as we fo gofornoor ke fop mbokatooru a yoon ndax kebil no maad a lambnel, a xañit ee: Ndeer meeke fo ñaal qarɓeen tadik, o kiin oxuu xeɗna a roog mbaat mbindeef lakas naa refeerna wo, wo daali maad, fat a joorel maa cogoy kaa a mbegeena.

⁹Ndiiki koy, daali maad, bindi keene xañtoona too fat o ñaastin naa taxna o leng waagkee o supit teen tig, too baa waag o laafel, ne ta merna reftaa no kebil ke no Meemedi we fo Peepersi we.»

¹⁰Kaaga a taxa boo o maad Daryus a dalin kebil neene soo a ñaasin.

¹¹Ye Dañel a yegna yee kebil neene a dalne boo a ñaasel, a xaada no mbind um. Na ndok-took alaa a jeg’a xa palangteer axaa mbaambir’ina farna fa Yeerusaleem. Maaga a gooknooxoogu, a xeɗaa too a simataa a Roog a caf a tadak ñaal nuu refna, ne ta mer’uuna o fi’taa.

¹²Fañ we ten a ñofa o mbadiid too a soƥaan ta xeɗaa, a ƴufginooxaa a Roog um.

¹³Cinj kaaga, a ndeta, a soƥik o maad oxaa, a layin ee: «Daali maad, ndax bindiro kebil naa layna yee ndeer mene fo ñaal qarɓeen tadik, oxuu xeɗna a roog mbaat mbindeef lakas naa refeerna wo, wo daali maad, fat a deɓel maa cogoy kaa a mbegeena?» O maad oxe a doona yee: «Keene a woora, ne ta merna reftaa no kebil ke no Meemedi we fo Peepersi we mbaagaandeena laaf.»

¹⁴A kafahina fa lay faa soo a lay o maad oxe yee: «Dañel koy fee fogna no we ƥistiideena Yudaa took o hup doole, a ƭat um yongee na wo, wo daali maad, fo no ke xañtoona too dalnin. Kaa xeɗaa a Roog um a caf a tadak ñaal nuu refna.»

¹⁵Yaa o maad oxe a nanna kaaga, a naqadilooxa too a refa no xalaataa naa ta muclitna a Dañel. Boo naaga njeeƈ ne a mudaa, a waaƭooga pexey naa ta muclituuna.

¹⁶Kaa koy, fañ we Dañel a nomtooxiida no ñofu soo a lay o maad oxe yee: «Daali maad, andaa a paax ee kebil ne no Meemedi we fo Peepersi we kaa sertaa yee kuu o maad oxe a heblitna mbaat ta xañtin waagataand o laaf.»

¹⁷Maaga, o maad oxe a heblita Dañel a ɓisiidel, ndax ta deɓel maa cogoy kaa a mbegeena. O maad oxe a laya a Dañel ee: «Yaasam Roog of fee genoona no faɗooxaa a muclong!»

¹⁸Ɓil maak a berengiide, a geƈnel no begax ne me cogoy ke a mbegeena. O maad oxe a ñaasa teen o anddiloor xoox um fo xa anddiloor no wiin maak we ten, ndax dara no ke dooneena a Dañel waagkaand o supit.

¹⁹Cinj kaaga, o maad oxe a xaada no mbind um, a fe no koor, a fañ o mat o tew, o ƭaan a xoxin sup.

²⁰Yaa mbeet naa a leeliidaa, o maad oxe a inooxa, a siipan maa cogoy kaa a mbegeena.

²¹Ye ta matiidaa maaga, a xoya a Dañel fo o ñuxur o yuɗnooxu yee: «Wo Dañel fee o tag Roog fa ñoow jok fee, ndax Roog fee genoona no faɗooxaa a muclaang no cogoy ke, ndi waagiran?»

²²Dañel a doona o maad oxe yee: «Daali maad, yaasam o xuuɗ!

²³Roog es a hebliida malaaka um ta muɓnoor cogoy ke boo ŋoloƴiraam. O nanangaan koy, kaa tooñiim a Roog, too wo daali maad oo, fi’iroong cageer leng.»

²⁴Maaga, o maad oxe a ɗaaya lool too a heblita Dañel a sutel me cogoy ke a mbegeena. Dañel a sute maaga, too tus ŋoloƴooxee no cer um, yaam kaa hooloox’u a Roog um.

²⁵Cinj kaaga, o maad oxe a heblita ndax we njamboogna a Dañel a njoorel me cogoy ke a mbegeena, den fo xa ƥiy den fo rew den. Ye da ngelkaa fo mbad kam fee sax, cogoy ke a songa a den, a mbandir a den.

²⁶Maaga, o maad Daryus a binda wiin we no qeet ke fop fo na saax ake fop fo no lak ke fop, ngenna na adna fee yee: «Yaasam Roog a ci a nuun jam!

²⁷Mexe heblitaa yee me maat es a reefeena fop, fat wiin we a saɗar too a niwaa a Roog fee Dañel yaam ten refu Roog fa ñoow jok fee, too xan a ref boo faw! Maat um gefkee muk, maatax um jegkee muukandoong.

²⁸Ten na muclaa, a wataa, a fi’aa xa anddiloor fo comlaand na asamaan fo na adna, ten fee mucilna a Dañel no cogoy ke.»

²⁹Dañel o mat a moƴ’a o xenoox no maat Daryus, cinj kaaga no maat Kiirus fee o Peepersi.