Read NQAARIIT NE ROOG Dañel 7 Bible Online

Dañel 7 - NQAARIIT NE ROOG bible

Dañel 7

¹No hiid o feraand olaa no maat Baltasaar fee o maad oxe Babilon, Dañel a ɗaaɗa soo a ga’a peeñil no yiif um, a soƥ ta wondoox no njong um. Cinj kaaga, a binda o ƭaaɗ ole,

²a wetandoox teen ee: «Kam o yeng ole, ga’aam no mbeeñil ee: Qeñ nahik ke na asamaan a njumbanda juwaam fee.

³Ƥaanoor nahik magnu a sutoora na juwaam fee, fuu refna a jektir fo ngend um.

⁴Fa eetaand fee kaa nandtoogu njogoy, ndaa a nafir a canjiik a saq’u. Kaam ɗeetoogun, boo neen a nafir ake ten a mbofe, ta yoɗtel a lanq, a geennitel a caf a ciijing ake ten nen o kiin soo a cooxel sagu no kiin.

⁵Ɓaanoor fa ƭikandeer fee mat ursu a nandtoogu. O saax o leng a geenoor’u, xa laf xa tadaq a ndef no don um ndeer a ñiiñ ake, too a laye yee: ‹Inooxi ñaam a tegeƴ a mayu!›

⁶Cinj kaaga, ɗeetoogaam too ga’aam ɓaanoor fa lakas faa nandtoogna o ƴaxal, a saq a nafir a nahak ndiiƭ took ndiiñ um. Ɓaanoor feene a qoox a nahak a jeg’u, too a ɓoxote ngelfa.

⁷Ga’ahinaam no mbeeñil ne mi kam o yeng ole ɓaanoor fa nahkandeer fa mbitnooxu, a saɗarnoox too a saq doole fa njegee sen. A ñiiñ njelem a maak a saq’u, a ñaamaa, a listaa ke ta damna soo a dakaa yoqatin ke. Kaa jektir’u fo ƥaanoor eetaand ke fop soo a jeg xa can xarɓaxay.

⁸Ɗeetoogaam xa can axe too ga’aam o njan o ndeɓ a sax a ndeer den, soo xa can xa tadaq na xa eetaand axe a mbuuroorit mbaambir um. O njan onqe a kid no kiin a saq’u fo o don olaa laytoogna a magnandax.»

⁹«Ɗeetoogaam boo neen ga’um a uum no maad akaa na sipeel, soo a Koorgi[3] a gar, a moof. Kaa rokoox’u toki tan fur, soo wiil um a ranig taw nen fa liit. Uum-maamaad le ten nandtoogna ƈulfaan fiɗel kaa saq’u a saang akaa na telelaa nen fiɗel laa na jir-jirnaa.

¹⁰O xuluɓ fiɗel a balta mbaambir um. Wiin cuni-cuni ndagooxoogun, waa o leng a waageerna o lim a ngeenoox mbaambir um. Maaga, haahate we a moofa, too a safe ke a mbete.

¹¹Maad’aam o ɗeetaa, ndax um ga ke na xewkaa yaam fa lay fa magnandooxu fee o njan onqe a layoogna, too ga’aam ee ɓaanoor fa nahkandeer fee a ware, soo cer um a yaqel na fiɗel fa saasu.

¹²Ƥaanoor lakas ke itam, ngelfa den a jaɓe, ndaa a ci’e o ñoowaa boo o ngap.

¹³Ga’ahinaam no mbeeñil ne mi kam o yeng ole oxaa nandtoogna o ƥiy no kiin[4] ta garaa ndeer a eel ake. A fadiida me na Koorgi le, a matandiidel mbaambir um.

¹⁴A ɓoxote ngelfa fo o ndam fo maat, ndax qeet ke fop fo a saax ake fop fo wiin we no lak ke fop a mbaɗooxin. Ngelfa ne ten xan a ref boo faw too jegkee muukandoong, xan a maadoox bo na moos boo moos.»

¹⁵«Mi Dañel, yiif es dal’ee yaam keene, ke feeñleema a diidlandaam lool.

¹⁶Matiidaam o leng no we ngeenoox’ina maaga, laamtin ndax ta tektanaam keene fop. Maaga, a tektaxam o ten ee:

¹⁷‹Ƥaanoor magnu nahik ke kaa tekit maad nahuk waa na mbeeñkaa took lanq ke.

¹⁸Kaa koy, xan tedu we no xe Took-ee-took a ndaaw maat ne too xan a njegin boo faw, bo na moos boo moos.›

¹⁹Cinj kaaga, bug’aam o moƴ o and kaa farna na ɓaanoor fa nahkandeer fee jektir’ina fo ƥaanoor tadik lakas ke, a saɗarnoox bo, a saq a ñiiñ njelem fo paambaañ xanjar, a ñaamaa, a listaa ke ta damna soo a dakaa yoqatin ke.

²⁰Laamtoogaam itam no kaa farna na xa can xarɓaxay axe ɓaanoor fee a jeg’ina no xoox um fo no njan onqe sax’ina, soo xa can xa tadaq a mbuuroorit mbaambir um, o njan onqeene saq’ina a kid no kiin fo o don olaa laytoogna a magnandax soo a nandtaa olaa moƴna o magin xa lakas axe.

²¹Ɗeetoogaam o njan onqe, ta ref no ñoxoraa fo tedu we, a xawaa a den,

²²boo neen a Koorgi le a garu, a ɓoxot ɓur tedu we no xe Took-ee-took, too waxtu a gara faa tedu we a njangna maat ne.

²³Oxe laamtooguuma a doonaxam ee: ‹Ɓaanoor fa nahkandeer fee kaa ref maat nahkandeer naa na jegkaa took lanq ke, a jektir fo lakas ke fop. Maat neene xan a fiitin adna fa muum, a koɓ a den soo a duut a den.

²⁴Xa can xarɓaxay axe kaa ndef maad xarɓaxay waa na mbeeñkaa no maat neene. A cinj den, xan o maad o lakas oxaa jektirna fa den a feeñ, a maaf daduk na den.

²⁵Xan a lay paaxeer no xe Took-ee-took, a toroxand tedu we ten, a fexey o supit a pe ake fo kebil ke, too xan tedu we a ƥoxotel na xa ƥay um boo xa kiid xa tadaq fa genwal.

²⁶Cinj kaaga, xan haahate we a moof, soo ngelfa um a jaɓel, ta maafel soo a gefel boo tuƈ.

²⁷Maat ne fo ngelfa ne fo o magnel ole no maat ke fop ndefna took lanq ke xan a ƥoxotel xeet fee no tedu we no xe Took-ee-took. Maat um jegkee muukandoong, too yaal toole ke na adna fee fop xan a ndagooxin too a nananin.›

²⁸Meeke ke xewna a muukooru. Mi Dañel o mat, yiif es kaa jaq’u no keene boo um foorat a kid, ndaa geek’aanum taa kam es.»[5]