Read NQAARIIT NE ROOG Dañel 8 Bible Online

Dañel 8 - NQAARIIT NE ROOG bible

Dañel 8

¹«No hiid o dadkandeer ole no maat Baltasaar, mi Dañel, ga’ahinaam mbeeñil naa fogreerna fo ne eet’uuma o ga.

²Keeke refu ke ga’uuma: Kam mbeeñil ne kaam fod’u Suusaan, teeru fa maak fee no jegel olaa Elam, geenoox paam a ƈufnand ale Ulay.

³Yoɗaam a kid es, ga suk mbaal laa geenooxna na ƥeeraamb ale na ƈufnand ale. Xa can xa ƭaq xa ciig a jeg’u. Kaa koy, o leng ole moƴ’u jigid o lakas ole, too ten falak’u saxaa.

⁴Ga’aam suk mbaal le ta gomaa farna fo mudand fo farna fo ɓemb-roog o janoon fo farna fo ɓemb-roog o ñamaak. Jeg’ee muumeen faa waag’uuna o xox, too o leng waag’ee muc no ten. Kaa fi’oogu kaa feluuna soo a moƴ o maakaa.

⁵Ye um ɗeetaa keene fop, suk fambe a inoortiida no mudand, a xaañ lanq ke fop, a ñof boo wee ndax naagee duqaa a lanq. Suk fambe leene kaa jeg’u o jan o fodne ngaryo nga ndeer a kid um.

⁶A gara boo paam suk mbaal le jeg’ina xa can xa ƭaq, too um ga’’un ta geenoox na ƥeeraamb ale na ƈufnand ale, soo a diganin fa doole um fop.

⁷Ga’aanum ta matkaa suk mbaal le, a songin fa doole, a gomin boo a ɓol xa can xa ƭaq axe ten. Suk mbaal le koy, jeg’ee doole faa ta xoxtuuna. Suk fambe le a maafaan soo a dakin, too jeg’ee o leng oxaa jaɓna suk mbaal le.

⁸Suk fambe le a moƴ’ata magin, ndaa ye ta fodna na doole um tigi, a njan ale ten a ɓolooxa. Maaga, xa can xa nahaq xa podu ne ngaryo nga a saxa me ta reeƭna, a njagin na xa saax xa nahaq axe no lanq ke.

⁹O njan o ndutuuñ a saxta no leng na den, a maakit farna fo ɓemb-roog o ñamaak, farna fo batand fo farna fo saax le moƴna o mos[6].

¹⁰A maaka boo a daaw a yaj ake na asamaan[7], a maafiid mayu na den a lanq, a yurdiid xa qoor xa mayu soo a dak a den.

¹¹A siiknoora fa kelfa fee na yaj ake na asamaan sax, a xañtin sadax ke ta ɓoxotoogeena bes fuu refna, soo o mbiñ o tedu nqe ten a maasandel.

¹²A yaj ake na asamaan a ƥoxote na xa ƥay um, soo sadax ke na bes fuu refna a softel a paɗax a qoolaƭaru. O jan ole a maafiida ndigil ne a lanq too kuu ta jeem’ina rek a waagin.

¹³Maaga, nanaam malaaka fa tedu faa na layaa. Fa lakas a laamtaan ee: ‹Ke feeñleena kaa bugko jegaa boo a mban? Boo a mban sadax ke ƥoxotoogeena bes fuu refna a njegkateeru? A paɗax a qoolaƭaru le kaa refkaa meen boo a mban? O mbiñ o tedu nqe fo a yaj ake na asamaan kaa mbugko nduuteel boo a mban?›

¹⁴A doonaan ee: ‹Keene xan a ref boo sadax nqes fo kirand cuni ƭik fo teemeed tadik. Cinj kaaga, xan o mbiñ o tedu nqe a xoolandel.› »

¹⁵«Mi Dañel, ye um ɗeetaa mbeeñil neene soo jeemaa and ke ta tekitna, oxaa nandtoogna o koor a gara, a geenoox mbaambir es.

¹⁶Cinj kaaga, nanaam o ñuxur no kiin yoora a ƈufnand ale Ulay, ta falalooxaa yee: ‹Gaburi’el, tekti oxeene mbeeñil ne!›

¹⁷Gaburi’el a gara boo paam me reeƭuuma, too ye ta matiidaxama, diidaam soo deɓoox a lanq, gung. A layaxam ee: ‹Wo xe o kiin doŋ, andi yee mbeeñil neene kaa jagin no muukandoong adna.›

¹⁸Ye ta maadna layaa fa mi, ñakaam sagu es, mukit es a ref a lanq. Kaa koy, a duqaxam, a geennatinaam.

¹⁹Cinj kaaga, a layaxam ee: ‹Xam andnoorong ke na xewkaa no muukandoong ne na jamaane fee no fuux le Roog, yaam muukandoong adna a dalne boo a ƴut.

²⁰Suk mbaal le na xa can xa ƭaq axe ga’oona kaa tekit maat ne Medi fo ne Persi.

²¹Suk fambe le koy, refu o maad oxe Yawan, soo a njan ale ndeer a kid ake a ref o maad o eetaand oxe ten.

²²A njan aleene ga’oona ta ɓoloox, soo xa can xa nahaq xa lakas a sax me ta reeƭna kaa tekit ee maat nahik xan a mbeeñit na xeet feene, ndaa njegkee doole fa mbodu nen fee no maat eetaand ne.

²³Boo maat keene a mbagiidaa, a soƥ tootooñ we a naang muut fo pakaad, xan o maad oxaa wootooxeerna o leng too a yekoox ne o kiin a ƴiƴtiteel a feeñ.

²⁴Xan katil um a magin lool, ndaa doole feene hatkee no ten. Xan a yaqit naa foog’aandeena too kuu ta jeemna rek a waagin. Xan a gefɗand yaal toole fo we na xeet fa tedu fee.

²⁵Xan a naxit jaaku o waane le ten. A magnandax um xan a tax ta saŋik wiin mayu waa mboogna yee no woor a ndefu, too xan a inooxan sax Kelfa fee no kelfa ke, ndaa xan a duguñel, too o ɓay no kiin fi’kiran.

²⁶Ke layee’oona no mbeeñil ne, ta jagin no sadax ke kirand fo nqes, ndigil kak oo. Kaa koy, tiimtafuleen, yaam bo ta fadnooxaa xan a miñ.›

²⁷Mi Dañel, jeg’aam ñaal leng-leng kaa neewuuma doole soo jir. Cinj kaaga, inooxaam soo jalanahinaa o maad oxe. Jaaxiɗ’aam lool no mbeeñil neene, too and’iim ke ta tekitna.»