Read NQAARIIT NE ROOG Hoose 1 Bible Online

Hoose 1 - NQAARIIT NE ROOG bible

Hoose 1

¹Keeke refu fa lay fee o Yaal oxe a daawinna a Hoose fee o ƥiy Beeri na jamaane Usiya fa Yotaam fa Ahas fa Hiskiya we maad Yudaa fo na jamaane Yerobowam fee o ƥiy Yehowas, o maad Isra’el.[1]

²Keeke refu mberaandoong ne no ke o Yaal oxe a layna a reefandin na Hoose. A laya a Hoose yee: «Reti o dolnir fo a caga, too fat o jaɓ xa ƥiy axe ta jegkaa a ndef xa ƥeef, yaam saax le a mbaasaxam, mi o Yaal oxe, a mbaɗooxaa roog lakas nen o tew o tamooxeer.»

³Maaga, Hoose a reta a gilig a Gomeer fee o ƥiy Diblayim. O tew oxe a roka o fud soo a ñootanin o ƥiy o ngoor.

⁴O Yaal oxe a laya a Hoose yee: «Ne’een ‹Yisre’el›[2], yaam a yoqa o ndik rek, xam inooxan mbind Yehu, xuuf maat ne kam Isra’el yaam fo’oy le ta ɓaxna kam Yisre’el.

⁵A koom, xam ɓol a qali le Isra’el na xa saawit axe Yisre’el.»

⁶Gomeer a rokahina o fud soo a ñoot o ƥiy o ndew. Maaga, o Yaal oxe a laya a Hoose yee: «Ne’een ‹Loo-Ruhama›[3], yaam yirimkatiim mbind Isra’el, tee kaam waasanahinan.»

⁷«Kaa koy, xam yirim mbind Yudaa, mucil a den, mi o Yaal oxe Roog den, ndaa muclitkatiim a den a qali mbaat laƥ mbaat xire mbaat pis ke mbaat ŋaaŋaay pis we.»

⁸A cinj ye Gomeer a fudinna a Loo-Ruhama, a rokahina o fud soo a ñoot o ƥiy o ngoor.

⁹O Yaal oxe a laya a Hoose yee: «Ne’een ‹Loo-Ami›[4], yaam nu ndefee xeet es, too mi yoo refiim Roog nuun.»