Read NQAARIIT NE ROOG Hoose 10 Bible Online

Hoose 10 - NQAARIIT NE ROOG bible

Hoose 10

¹Isra’el kaa reeƭu ndaxar biiñ ndiirim, naa watoogna xa tim xa mayu. Nuu xa tim axe ten a moƴ’ina o mayit, ta moƴ o mayƭandaa xa sadaxand axe. Nuu saax le ten a moƴ’ina o neqit, ta moƴ o sipaa a ƥil akaa na mbaɗooxeel.

²Xeeñ den naanaxir ƥor a fofu. Ten taxu yoo xan a ngadoox tooñ den. O Yaal oxe xan a jiƭit xa sadaxand axe den, a duguñ a ƥil ake da mbaɗooxaa.

³Maaga, xan a lay ee: «I njegatee o maad, yaam i saɗaree o Yaal oxe. I njeg’angaa o maad sax oo, xar a fi’ankoogu a in?»

⁴Maad we den xa koɓong a layaa, a ndaaɓooxaa na xa maaƥ, a ndalnaa kiɓoor, a pi o cofel, da mbi’in o ndoxom kam a cur ake na xa qol axe.

⁵We ngenna Samari xan a njaq yaam o nqeel wurus onqe Bet-Awen[11]. Xeet fee xan a ñaawoox mbangool neene, soo saasadax we ten a sendaa yaam ten, no ndam onqe ten na ñufkaa a ndeer den.

⁶Xan a ɓisel Asuur, ndax ta ref ɗang no maad o maak oxe. Xan gaci a dam a Efrayim, Isra’el a sed ɓot no yuuƥ ke ten.

⁷Samari jegkataand o mbaƈ, o maad um a nand fo o seɓ olaa foofi a maƥna.

⁸A ñaang a sadaxand ake Bet-Awen, me Isra’el a bakaaditna, xan a luƈtel, tomb fo takar-ñiig xan a sax took xa sadaxand axe den. Xan wiin we a lay xa coong axe yee: «Muuryo a in!», a lay a ñaang ake yee: «Ngirdooxyo took in!»

⁹O Yaal oxe kaa tee: «Wo Isra’el, bakaadaa no kaa xotitna no ñaal kaa Gibe’a, too yaaga boo fa ndiik suptooxiro. Ndax xire fee daawitkee a nuun Gibe’a, nuun soxodu we?

¹⁰Hebooxaam o xaw a nuun, too xan qeet a mbokatooran a nuun, nu njengel yaam njofaƭar nuun ne jegeerna a tet.

¹¹Efrayim fi tolooxu na doole um, laa fexna o sugaa a reeƭu. Mi koy, doonaam kadoor no cok o sooxu le ten, humin a Efrayim, Yudaa xan a jiqtik lanq ke, Yakoob a guurik.

¹²Layaam a den ee: ‹Nduufyo o cofel, too xan nu saxad o mbeq. Mbigooxanyo a qoox nuun o qol o qas! O waaƭaam a fada, mi o Yaal oxe, too xam gar, pictan a nuun o cofel.›

¹³Kaa koy, paaxeer nu nqooxu, saxad njofaƭar, too nu ñaama o rim ole na xa maaƥ axe.» «Kaa nu ngooloox a ƭat nuun fo a salma-koor a mayaan ake nuun.

¹⁴Ten taxu xan combol a jeg a ndeer xeet nuun, soo saŋe ke nuun fop a yaqel, ne Salmaan a gefit’ina a Bet-Arbel a koom alaa fa xire fee, maa yaay a duguñit’eena fo xa ƥeem.

¹⁵Nuun mbind Isra’el[12], keeke na dalkaa a nuun, yaam kañaan nuun ne ɓekna a sak: Boo mbeet ne a helko fo leelaa, o maad Isra’el refkatee meen.»