Read NQAARIIT NE ROOG Hoose 11 Bible Online

Hoose 11 - NQAARIIT NE ROOG bible

Hoose 11

¹O Yaal oxe kaa tee: «Yaaga Isra’el a refaa o ndeɓandoong, fexaanum too xoytaanum Misira, ten fee o ƥees.

²Kaa koy, lakas a nqoyaan, ta fesaam ndiiñ, a ɓoxotaa a Baaliin sadax, a doxanaa nitaal roog ke cuuraay.

³Yaag oo toox de, mi taatnu a Efrayim, too mi dam’un o ɓay, ndaa andee yee mi topatooxoogun.

⁴Qictaanum xa ƥaak yirmande fo ceen o mbeq. Kaam reeƭu no ten nen a faap faa gadooxna o nqeq um. Kaam rungooxoogu farna fo ten, jeƈnan.[13]

⁵Nomtooxkeeyo no saax laa Misira, ndaa Asuur xan a maadoox took den, yaam kaa da mbañ o nomtooxiid me mi.

⁶Xan xire a jib no teeru ke den, a ɓol a kinglir ake no begax ke den, a raaɓ fop yaam yuuƥ ke den.

⁷Xeet es kaa nqar no mbesaam a cinj. Kaa nqoyel me na mi fee Took-ee-took, ndaa o leng na den inooxee.»

⁸«Wo Efrayim, nam waagoong o xaƴit? Kaam ee wo Isra’el, ndax xam ɓoxotong moos? Nam waagoong o doonit ke doonuuma a Adma, fi’ong ke fi’uuma a Seboyiim? Kam es neegiran, um may muut fa yirmande.

⁹Reefankiim fuux ɗomu le mi. Waasaam yaq fee fosooxan’oonga, wo Efrayim, yaam Roog refum, refiim o kiin. Kaam ref o Tedu xe a ndeer of, garitkiim fuux.»

¹⁰«Xan a ndeefaam, mi o Yaal oxe, um bumbaa nen njogoy. Xam bumb, soo xa ƥees a inoortiid no mudand, a sendaa.

¹¹Xan a inoortiid Misira nen tiiƭ, a ndaprapnaa, a inoortiid no saax laa Asuur nen a nuukuur. Xam nomtiid a den kam pind den. Mi o Yaal oxe layun.»