Read NQAARIIT NE ROOG Hoose 12 Bible Online

Hoose 12 - NQAARIIT NE ROOG bible

Hoose 12

¹O Yaal oxe kaa tee: «Efrayim kaa widaam fo xa maaƥ, mbind Isra’el a ndeeraam fo naanaxir ƥor, Yudaa a maad o siiknooraa fa mi, mi fee o Tedu xe gore’na.

²Efrayim xa koɓong a reefaa, a daabaa nqeñ ne no batand. Ñaal oo ñaal kaa mayƭandaa xa maaƥ axe fo a pi a yednu ke. Kaa dalnaa ngiɓoor fa Asuur, soo diwliin a ɓiseel Misira.»

³O Yaal oxe xe layooraa fa Yudaa, a xawaa a Yakoob yaam a pesoorooƭ um, a rabdan a pi um.

⁴Kam o fud ya um, Yakoob a ƴiƴta o maag um, too ye ta deyna o fes ñaƭ, a maafra fa Roog.

⁵A maafra fa malaaka fee soo a maafin. A loola soo a xeɗooxin. Yakoob oxe xet’a fa Roog Betel, too maaga Roog a layit’u fo ten[14].

⁶O Yaal oxe refu Roog fee Hupna fop, gon um a ref o Yaal oxe.

⁷Ndiiki koy, nuun xa taan axe Yakoob, nomtooxiidyo me Roog nuun, ngay o mbeq fo o cofel, too yaakaar kili a Roog nuun.

⁸O Yaal oxe kaa tee: «Efrayim, kaa o nand nen o cula Kaakanaan, pokoox no ɓay of balaas fa mbaaxeer. Kaa o fex o naxaa doŋ,

⁹layaa yee: ‹No ndigil, jegataam halal, fokatanoox a kamba! Kaa koy, kaam onjin, jegtinum na ƭat a qeleer.›

¹⁰Mi refu o Yaal oxe Roog nuun sutitna a nuun Misira. Xam gennoorahin a nuun kam ƭiif, nen ye um garaa me nuun kam a koƥ-a-ƥor alaa.

¹¹Daawnaam duleer we fa lay es, mayƭand peeñax es fa den. Na pexey duleer we, maƭoortaam a nuun a naxax.»

¹²Galaad njofaƭar doŋ a fofu, a ref o koohod. Kaa sadaxtaa qoox kam Gilgal. Ten taxu xa sadaxand axe den xan a ndefat nen a cuum a kac na cur ake na xa qol axe.

¹³Yakoob a ƴufa no saax laa Araam, o tew a jaranin ta jalanaa o koor o lakas, a gayaa a ked um.

¹⁴O Yaal oxe a sutta a Isra’el Misira na pexey o tuleer, too o tuleer gayoogu a den[15].

¹⁵Efrayim a fuuxnoora o Yaal oxe ƭomu. Ten taxu o Yaal um xan a fudin took um fo’oy le ta ɓaxna, a nomit took um gaci fee ta fi’na.