Read NQAARIIT NE ROOG Hoose 14 Bible Online

Hoose 14 - NQAARIIT NE ROOG bible

Hoose 14

¹We ngenna Samari xan a nqawel, yaam kaa siiknoor fa Roog den. Xan a nqonit na xire, xa teɓandoong xa tutuuñ axe den a nduguñel, rew we den ndefna xa pud a nqiirel.»

²Wo Isra’el, nomtooxiidi me no Yaal oxe Roog of, yaam tooñ of a maafaang junjang.

³Ƥonooxyo fa lay fa ndicoor too nomtooxiid me no Yaal oxe. Layeenoo yee: «Waasanti tooñ ke fop, dalin a in fa yirmande, too yaaga xan i simatang, ta ref nen sadax qoox in.

⁴Asuur mucilkee a in, i ngoolooxkatee pis too i laykatee ke xa ƥay in a njalna yee: ‹Roog in!›, yaam me wo soom o waan ole a daawtaa o mbeq.»

⁵O Yaal oxe kaa tee: «Maaga, xam supit o ñak o damax den. Xam jegood na den o mbeq o saƭku, yaam fuux es na den a ɓoosa.

⁶Xam ref na Isra’el nen a liim. Xan a fiɗ nen ngaaf-a-tooq, a sax a paƴ nen suungaan le Libaŋ.

⁷A naaq ake ten xan a naang lawlaw, ta mosit nen ndaxar oliiw, a xeeñaa nen suungaan le Libaŋ.

⁸We moofoogna no yook um xan a nomtooxiid. Xan a ñoowdandatin bele fee, a mbiɗit nen ndaxar biiñ soo a njeg gon nen biiñ fee Libaŋ.

⁹Efrayim reeratee dara fo pangool ke. Kaam jaɓaa a qeƭ um soo gayan. Xam ref no ten nen filaawo nequ, na mi xa tim um a ngataa.»

¹⁰Fat oxe jegna o and a dam keene, oxe jegna yiif a andin! A ƭat ake no Yaal oxe kaa njof pec. Jofu we xan a ñaaƴ teen, soxodu we o mat a tolof teen.