Read NQAARIIT NE ROOG Hoose 5 Bible Online

Hoose 5 - NQAARIIT NE ROOG bible

Hoose 5

¹Nuun saasadax we, nan-gilooxyo kene! Nuun mbind Isra’el, naangyo tek! Nuun mbind ne no maad oxe, ndungyo nof nuun! Nuun o mat ngel’e o layoor, yaam kaa nu ndeeƭu mbog kam Mispa, mbaal letne took o joong ole Taboor[6]

²fo gamb xooɗu kam Sitiim[7]. Kaa koy, mexe waajanaa a nuun a qaw, nuun fop.

³Mi, andaam a Efrayim, Isra’el waagiraam o laqoox sen, yaam me ta refna, wo Efrayim, jimbooxaa no njaga, wo Isra’el, xoolaƭaraa.

⁴A pi den kaa yaqanaa a den o nomtooxiid me Roog den, yaam njaga kaa adin a den, too andee o Yaal oxe.

⁵O nga’atinax onqe Isra’el na seede’anan, Efrayim xan a tolof yaam tooñ um, Yudaa itam a tolof fo ten.

⁶Xan a ndet fo a ked den fo xa siir den, ndax da ƥoxot teen sadax, a mbaaƭik o Yaal oxe, ndaa nga’kiran, yaam kaa riƈatoox a den.

⁷A ngoda o Yaal oxe, yaam kaa ndim xa ƥiy no qooleer. Ndiiki koy, o nqool o leng soom xan a dey, ndax da saŋkel fo o jeg den fop.

⁸«Njibinyo a tuluɓ kam Gibe’a, mbaŋin a luuƥ kam Rama! Njibinyo xa buuq xire kam Bet-Awen! Bensame, woxe daabeel de!»

⁹A qaw ale xan a dal took Efrayim, ta fes a pec. Keeke um yegnaa a carind ake Isra’el booru yoo.

¹⁰Kelfa ke Yudaa kaa nand fo we na ndiƈataa a tet. Xam ɓax took den fuux le mi nen a ƈufnand.

¹¹Efrayim xan a ñagadilel soo wargal um a duguñel, yaam kaa felin ta reefaa xa koɓong.

¹²Mi, xam ref nen max na Efrayim, ref nen potu no mbind Yudaa.

¹³Efrayim a ga’a jir um, Yudaa a ga uut um. Efrayim a reta Asuur soo a lul wiin maa no maad o maak oxaaga, ndaa o maad oxeene waagkee o wodand a nuun mbaat ta jeg teex naa malna uut le nuun.

¹⁴Yaam mi fa xoox es, xam ref nen njogoy na Efrayim, ref nen o njogoy o njanglax no mbind Yudaa. Mi, mi na lisitkaa, cinj kaaga um naag col, ret. Xam ɓis mbuufuɗag es, too o leng suqitkiran na mi.

¹⁵Xam naag col, ret, nomtoox no ngenand es, boo yaa da njaɓkaa yee den tooñu soo a mbaaƭaxam. Kam naqad fee xan a ƈufginooxaxam ee: