Read NQAARIIT NE ROOG Hoose 6 Bible Online

Hoose 6 - NQAARIIT NE ROOG bible

Hoose 6

¹«Ngaryo i nomtoox maa no Yaal oxe, yaam a saara a in, ndaa xan a wodand a in. A fada a in, ndaa xan a laxasan a in a uut ake in.

²Cinj ñaal ƭik, xan a dakin a in no ñoow ole, no ñaal ndadkandeer naa, xan a inatin a in, too xan i ñoow mbaambir um.

³Fat i mbaaƭ maa i anditna o Yaal oxe, a kar um kaa woorit nen mbeet. Xan a gar na in nen mbuyaam, nen a teƥ ndiig ale na xuƥandaa lanq ke bo dee sap.»

⁴Um doon a den ee: «Wo Efrayim, ndi xar um fi’kang? Wo Yudaa itam, xar um fi’kang? O mbeq nuun kaa nand nen eel nqes, a nand fo a liim ale na yenaa no njeeƈ-tanqin.

⁵Ten taxu um xawit a den duleer es, warit a den fa lay fee na hataa no don es. Hate es a naaga dañ nen a qoolaand,

⁶yaam yirmande moƴanaxam sadax, o andaam a moƴanaam sadax toxel.»

⁷Nuun koy, nu ƭega ngiɓoor ne nen a Aadama, nen o ten o mat nu ngodtaxam.

⁸Galaad teeru no fiifi paaxeer a refu, faa fo’oy a ɓaxeena teen.

⁹A yaj ale no saasadax we kaa nand fo saasaay kaa na ƥeedaa o kiin. Kaa mbaraa wiin we na ƭat ale Sikeem, ta ref tig cednooxu.

¹⁰Ga’aam kam mbind ne Isra’el[8] tig cednooxu. Teen Efrayim a jaga’taa, Isra’el a xoolaƭarit kam fee.

¹¹Wo Yudaa itam, waajanee a saxad. Yaa um supitkaa o roxanqol ole na xeet es,