Read NQAARIIT NE ROOG Hoose 7 Bible Online

Hoose 7 - NQAARIIT NE ROOG bible

Hoose 7

¹wodand a Isra’el, tooñ ne Efrayim fo a pi a paaxeer ake Samari xan a mbeej. Kaa da maaɓaa, guuɗ we a ndokaa no pind ke, soo a yaj no yaayaq a pasaroor tafil.

²Layee taa kam den ee wetandooxaam kañaan den. Ndiiki koy, a pi den kaa mbid a den, a ndef mbaambir es.

³Kaa da ƭaaynoortaa o maad oxe o ƴiƴ den, soo gelwaar we, da mbelakintaa a den naanaxir den.

⁴Den fop kaa seeqaa, a nandtaa njuɗand puuru naa o cuujuɗ oxe a heƥandna. Soxla’atee o wuuɗaa fiɗel le, yaa ta jaxasna nqiiw ne boo yaa ta foɗaxna.

⁵No ndoofeen ne no maad oxe in, kelfa ke kaa njiraa yaam a sumaan ale na biiñ fee, o maad oxe a fi’in boo a cooxaa xaaxaadnax we o ɓay.

⁶A matiida nen fiɗel o juɗand, xeeñ den a may fo naanaxir ƥor. O yeng ole fop fuux den kaa ɗuuraa, soo no nqes ne, ta naag jirdit nen fiɗel fa mbiltooxu.

⁷Den fop kaa sum jip nen o juɗand. Kaa listaa ɗooɗox we den, maad we den fop a yenaa, too o leng na den ƴufginooxiraam.

⁸O Yaal oxe kaa tee: «Efrayim a jaxasoora fo qeet lakas ke, a ref nen o gaf o gaajaaju.

⁹Wiin jan owe paangaa doole um, too andiran, xoox um le fuumaa, too ɗeetlooxiran

¹⁰O nga’atinax onqe Isra’el na seede’anaa a den. Keene xewna fop koy taxee da nomtooxiid me mi, mi o Yaal oxe Roog den, too mbaaƭiraam.

¹¹Efrayim kaa nand fo a nuukuur ale yooɓna naxel, a ñak-yiif. Kaa ƈufginooxaa a Misira, a ƈufan Asuur.

¹²Xam deɓ took den mbaal ne mi, yaa da ƈufaa, maafiid a den nen ndiiƭ. Xam xaw a den ne yegnit’anuuma no mbokatax ne den.

¹³Sabab took den, yaam kaa ƈuf, a ngoƭaam! Fat da mbes a pec, yaam kaa siiknoor fa mi! Ndax kaa da mboog ee xam wat a den, mi fee da maaɓanaa?

¹⁴Ƈufginooxiraam fo a qeeñ den fop, yaa da ƭomatooxaa took cong den. Kaa ñaasooxaa, yaa da nqeɗaxam bele fa biiñ soo a ngoƭaam.

¹⁵Mi yaru a den, saƭkand a den, ndaa paaxeer ƥor a yuuɓanaxam.

¹⁶Kaa nomtooxiidaa, ndaa refee na mi fee Took-ee-took. Kaa ndef nen a qali yandu. Xan kelfa ke den a mbartel laƥ yaam fa lay fa maamagnandax den, soo da ndef calat no saax le Misira.»