Read NQAARIIT NE ROOG Hoose 9 Bible Online

Hoose 9 - NQAARIIT NE ROOG bible

Hoose 9

¹«Isra’el, ba o felakinoox, ba o ref no ɗaay nen qeet lakas ke, yaam kaa o waas a Roog of, jaga’aa soo fex ndabid nqooleer no cukand bele ke fop.

²Ten taxu ke na hataa no cukand ne fo no nirir ole ñoowinkatee a nuun, too biiñ fa nqas fee refkatee muud nuun.

³Efrayim yoqkee kam saax le no Yaal oxe, ndaa xan a nomtoox Misira, a ñaam kam Asuur ñaamel qoolaƭaru.

⁴Ƥoxotkatee o Yaal oxe sadax biiñ, too ƥoxotkatiran sadax lakas. Ten taxu ñaamel den xan a nand nen ñaamel o xaaraand[9]. Fop we na ñaamkan xan a nqoolaƭar, yaam kaa mboolaa a ñaamin took o ñak o waag o ɓisiid kam Mbind ne no Yaal oxe ke eetna o foor no saxade le den.

⁵Xar nu mbi’kaa na bes fee no ndoofeen ne, na bes fee na xew[10] fee no Yaal oxe?

⁶Yaa nu sutooxkaa saax le nuun raadna, Misira xan a dalin a nuun, soo poy ke Memfiis a ñaam a nuun. Kiƈ ke xan a njaɓ kalal xaaliis fa nqoolu ke nuun, soo qooc ke a sulit kam ƭiif ke nuun.

⁷Ñaal ke na qaw ale a mbaambnooxa, kaam ee ñaal ke no ndabid ne owe ngaraa. Fat Isra’el a andin! Kaa nu layaa yee: ‹O tuleer Roog oxe kaa ɗofat, o kiin oxe feeñooxeena a gulmaa.› O magnel ole no tooñ nuun fo ne nu sibaxama taxu nu layan.

⁸Mi fee o tuleer, Roog es kaa heblaam, ndax um maƭoox a Efrayim. Kaam ɗaapanel mbog muu um dakaa, we na ngaraa kam mbind ne Roog es sax a mbañraa fa mi.

⁹Nu njimbooxa no laawax nen ñaal kaa Gibe’a. O Yaal oxe weecee tooñ nuun too xan a xaw pakaad nuun.»

¹⁰O Yaal oxe kaa tee: «Ga’aam a Isra’el nen xa biiñ kam a koƥ-a-ƥor, ga daan we nuun nen xa tun xa peraand. Kaa koy, ye da mbadiidna Baal-Pe’oor rek, a soobooxa no mbaɗooxaa a Baal fa sednooxu feene, soo a ndefat cednooxu den fa qoox den nen o fes den oleene.

¹¹O ndam onqe Efrayim xan a yet fir nen ndiiƭ. Jegkatee fa ndim, saq tig ne’aand, too rok o fud jegkatee.

¹²A yarangaa xa ƥiy den sax, xam ñaknoor a den weene boo o leng yoqkee. Sabab took den, yaa um waaskaa a den pelek!

¹³Ye ga’uuma a Efrayim kaa nandtoogu a ƭing keec alaa jimbeena no mbiñ o nequ, ndaa xan a ɓis xa ƥeem me no xaa na warkaa a den.»

¹⁴«O Yaal oxe, xar um xeɗkaa o ci’in a den? Ci’i rew we den o fud olaa na wataa fo ƭeen kaa njegeerna fo ɗeen.»

¹⁵«Kañaan den fop a feeñta Gilgal. Maaga o mat sibditum a den. Xam raxit a den no saax es yaam a pi a paaxeer ake den. Fexkatiim a den, yaam kelfa ke den fop faafañ a ndefu.

¹⁶Efrayim a xawe, a paƴ um a mbeer koroŋ too saqkatee xa tim. A njegangaa xa ƥiy sax oo, xam saŋik xa ƥiy axe den da mbexna.»

¹⁷«Roog es xan a deɓ a den, yaam nan-gilooxiran, too xan a njoqooyooxaa a ndeer qeet lakas ke.»