Read NQAARIIT NE ROOG Yowel 2 Bible Online

Yowel 2 - NQAARIIT NE ROOG bible

Yowel 2

¹Njibinyo a tuluɓ kam Siyoŋ, mbangin a luuƥ took o joong o tedu le Roog. Fat we ngenna no saax le fop a send, yaam ñaal ne no Yaal oxe xe garaa too a matiida sax.

²Kaa ref ñaal o niɓaan fo a sisaaƥ, ñaal a eel fo a kuy. Xeet fee mayna bo too a jeg doole kaa garaa nen mbeet naa na leeliidaa took xa coong axe. Kaa nandna neene mosee o jeg, too moskatee o jeg muk no suk ke na ngaraa.

³Fiɗel laa na raaɓaa adooxanun, soo aal laa na sooynaa a fodin a cinj. Saax le kaa ref mbaambir um nen a ƭing ale Edeen, soo a suurangaa, ta ref nen a koƥ-a-ƥor alaa naagna halit, too dara daɗee a den.

⁴O ga’angaan ee pis, nen naar-koor kaa mbaaslooxna.

⁵O nanangaan ee ɗuuɗ a sareet-xire kaa na mboolaa took xa cul axe na xa coong axe, a ratataa nen ƈulfaan fiɗel laa na raaɓaa boob. O ga’angaan ee xeet fa njegu doole faa jagandooxanna a ñoq.

⁶Qeet ke kaa sendaa mbaambir den, a mboor a kid, den fop.

⁷Kaa ƈuftaa nen a salma-koor, a mbooltaa saŋe ke nen xir say, oxuu refna a xot mbaambir um too ɗapkee.

⁸O leng na den fiiqilkee o lakas oxe, yaam oxuu refna kaa xotaa a ƭat xoox um. Kaa nquusaa a ndeer ƥonax ke da ndeɓeel too ƭegkee o qod ole.

⁹Kaa songaa teeru fee, a mboolaa saŋe ke, a ndokaa kam pind ke, a ñoomaa na xa palangteer axe nen guuɗ.

¹⁰Lanq ke kaa sendaa mbaambir den, asamaan fee a yo’noox, njeeƈ ne fo o nqool onqe a nuk, soo xa qoor axe a ñak a qoolaand den.

¹¹O Yaal oxe xe fangnaa o ñuxur um mbaambir xiixire um. A yaj um kaa magin lool, we na mbadnaa fa lay um a njeg doole. Ñaal ne no Yaal oxe kaa magin too a saɗarnoox. Ndi, an na waagkan o haŋ?

¹²O Yaal oxe kaa tee: «Nomtooxiidyo me mi na qeeñ nuun fop, yaam a waagooxa boo fa ndiik. Ngooryo, lool soo ƭomatoox.»

¹³Ba nu mbaar toki nuun, ndaa mbaaryo a qeeñ nuun soo nomtooxiid no Yaal oxe Roog nuun, yaam kaa yirmaa, a laabiir, a muñantaa, a may fo o paaxel too kaa ricooxaa taamaala ke ta heblitiidna.

¹⁴Xeƈa xan o Yaal oxe Roog nuun a supit a qalaat soo a barke duufe le nuun. Maaga, xan nu mbaagahinin o ƥisiid sadax tuufe-duufe fa sadax biiñ.

¹⁵Njibinyo a tuluɓ kam Siyoŋ, simit koor soo nqoyit o xet o tedu.

¹⁶Mbokatyo xeet fee, mbi mbokatax tedu. Kolityo maak we, mbokat xa caaƈ axe boo na xa qeq axe maadna o numaa sax. Fat o kor-no-kulook oxe a sutooxiid a ndok um, o kulook oxe a sutooxiid me ta wegeena.

¹⁷Fat saasadax we na njalanaa o Yaal oxe a lool kam Mbind Roog ne ndeer begax ne fo o sadaxand ole soo a nqeɗooxin ee: «O Yaal oxe, wuusi a in, in we xeet of! Ba o ci a in gaci, boo a tax qeet lakas ke a nqaadnooxaa a in. Xar na taxkaa ta layeel a ndeer a saax ake yee: ‹Taa Roog den?› »

¹⁸O Yaal oxe a jegata o liir no saax um, a yirim xeet um.

¹⁹Maaga, a jaaɓa xeet um ee: «Xam ci’ahin a nuun bele fa biiñ fa diwliin, bo ta dey sik! Ɓoxotkatiim a nuun no fo nqaadnax ne, qeet lakas ke a nqaadnooxaa a nuun.

²⁰Xam rax koƭu fañ we nuun inoortiidna no ɓemb-roog o janoon, pasar a den farna fo lanq beeru koroŋ kaa mbootna. Xam joor xiixire we den mbodna mbaambir kam o maag o Xanju le, soo we mbalakna, um deɓ a den kam o maag ole Mediterane. Xa tal den xan a nqooñaa, tuñ peleer a ngat na den. Neene we mbi’oogna a nuun paaxeer keene fop a moocitkaa.»

²¹Lanq ke, ba nu saɗar dara. Ndefyo no ɗaay too mbelakinoox, yaam o Yaal oxe a fi’a tig magnu.

²²Nuun muumeen-a-koƥ ke, ba nu saɗar dara, yaam xa suufand axe na koƥ-a-ƥor ale we suuƴniidaa, too taxar ke we morolaa. Ndun ne fo ndaxar biiñ ne owe ndima boo a ƭooqaa.

²³Nuun we ngenna Siyoŋ, ndefyo no ɗaay too mbelakinoox no Yaal oxe Roog nuun, yaam a ci’a a nuun a teƥ a paax. A fudnaniida a nuun puyaam ke, a teƥ a sarandam ake fo a seeseek ake nen yaaga.

²⁴Cukand ke xan a may muut fo pep, xa nirir axe a caarooxaa fa biiñ fa diwliin.

²⁵O Yaal oxe kaa tee: «Xam rafooxan a nuun xa kiid axe soƈ ke fo xa benq axe fo tooroog ke fo kusax ke a ñaamna, xiixire mayu we mi hebliid’uuma took nuun.

²⁶Xan nu ñaam boo naang tem, simat gon es, mi o Yaal oxe Roog nuun fi’anna a nuun com’andtu, too nu ndefkatee na gaci boo muk, nuun we xeet es!

²⁷Xan nu and ee mexey a ndeer Isra’el, mi o Yaal oxe Roog nuun, too fa lakas jegee. Nu ndefkatee na gaci boo muk, nuun we xeet es.»