Read NQAARIIT NE ROOG Amos 2 Bible Online

Amos 2 - NQAARIIT NE ROOG bible

Amos 2

¹Keeke o Yaal oxe a layu: «Felaam o jaf no Moomowaab we a caf a tadak boo na nahak sax, ta dak no paaxeer. Kaa ut xa kiiƈ axe no maad oxe Edoom, a ndox[6] a den bo dee riw. Ten taxu o ɓay es ole yoɗooxna waagee ñak o dal:

²Xam fudin fiɗel took Mowaab, ta raaɓ pind no maad ke Keriyot, Mowaab a duutel kam combol, a mooc ndeer xa buuq xire, yaa a luuƥ ale a jibkaa.

³Xam saŋik o kaahate xe[7] genna Mowaab, war aa-adax we ngeennuuna fop.» Keene o mat o Yaal oxe a layu.

⁴Keeke o Yaal oxe a layu: «Felaam o jaf no Yuuyudaa[8] we a caf a tadak boo na nahak sax, ta dak no paaxeer. Kaa sib kebil ke no Yaal oxe, a mbañ o ndeef ke ta dalinna, soo a ndeefaa ke daan den a mbaɗooxoogna, a softin a Roog, tefee ndigil keene da njuurooxoogna. Ten taxu o ɓay es ole yoɗooxna waagee ñak o dal:

⁵Xam fudin fiɗel took Yudaa, ta raaɓ pind no maad ke Yeerusaleem.»

⁶Keeke o Yaal oxe a layu: «Felaam o jaf no Ii-isra’el we a caf a tadak boo na nahak sax, ta dak no paaxeer. Kaa sofit o ñis no cofu xe xaaliis, o ndool onqe da ndoomin no peer xa ñaaƭ. Ten taxu o ɓay es ole yoɗooxna waagee ñak o dal:

⁷Kaa mbi we neewna doole takir, wargal no toroxu da ndakin, a suuraa. Kaam ee, kaa faap fo o ƥeem a nqetaa no toog o leng, a pi den fop a maasandaa gon tedu le mi.

⁸Mbaambir o sadaxand oluu refna pay tayle’te soom a ƭaapaa, a yertaa biiñ fee da suqtitna no we saqanna a den o lad me da njuurooraa.

⁹Yaag oo toox de mi saŋku Aa-amori we na kid nuun, Aa-amori we mbodtoogna taxar seedar yaam a njigid, too a moƴ’u saƭik ngariñ. Ndax kaa fuuriim a paƴ den, ɓoor xa tim den na kid nuun!

¹⁰Ƭeetyo me nu ndeefna, too um sutit’u a nuun Misira, ɗox a nuun xa kiid qarɓeen nahik na koƥ-a-ƥor alaa ndax nu njeg saax le no Aa-amori we,

¹¹doon teen sutit na xa ƥiy nuun duleer, xa taan nuun a ndef we nqaƴna fop a ƥoxotoox na mi. Ndax refee ndigil? Layaamoo, nuun we xa taan Isra’el! Mi o Yaal oxe layun.

¹²Ii, soo nu yernaa biiñ we nqaƴna fop a ƥoxotoox na mi! Kaam ee, yaaga boog xar taxu nu coox duleer we kebil ne na xañtaa da yegnit ke da mbeeñleena?

¹³Ten taxu xam duguñ a nuun boo nu mok rip nen oxaa a sareet alaa sufna boo a qiicaa, a dakna.

¹⁴O ƴiƴ sutkee teen o leng, doole ne’aand, njambaar a jalan.

¹⁵O ƭana xe, a qali um mucilkiran, oxe felna o faaɗ daɗkee, o ŋaaŋaay o say ne’aand.

¹⁶Oxe moƴna ref jambaar no xiixire we o ƥor a godkaa o joor a koom. Mi o Yaal oxe layun.»