Read NQAARIIT NE ROOG Amos 3 Bible Online

Amos 3 - NQAARIIT NE ROOG bible

Amos 3

¹Nuun we xa taan Isra’el, o Yaal oxe a laya yee nu nan-giloox ke ta layna took nuun, nuun we ta sutitna no saax laa Misira.

²Kaa tee: «Kaam ɗeet a nuun ndeer qeet adna, jil a nuun. Ten taxu xam xaw a nuun a qaw alaa moƴna o ɗom yaam njofaƭar nuun.»

³«Ndax wiin ɗik a mbaaga o yoon, too nanooree?

⁴Ndax njogoy a naaga bumbaa kam o joc, too ga’ee mbuufuɗag? Kaam ee, ndax njogoy njanglax a naaga ŋuuraa no nqanq um, too pokooxee dara?

⁵Ƭeetyo boo nga ndax ndiiƭ a waaga saayoox no siind, too tax ndeefiran mbaat o quusi! Ndax mbog a waaga o wegoox, too tig piriran?

⁶Ndax jiin a waaga o jeg no saax, too tig xewee? Ndax sabab a waaga o xew na teeru, too o Yaal oxe yoonee teen?[9]

⁷Kaam ee, o Yaal oxe na refkaa boo faw mosee fosoox tig, too feeñliran duleer we dag um.

⁸Njogoy naa na bumbaa, an a diidlandeeru? Layangaamoo! Neene mat a reftu, o Yaal oxe na refkaa boo faw a layangaa, a feeñlin duleer um, an na den yegnitkeeru ke fosooxeena?»

⁹Mbalalooxyo kam pind no maad ke Asdod fo ke Misira, lay fop ee: «Ndetyo mbokatoor na xa coong axaa Samari, nga ritiɓ faa ta fi’na, ñagadil ke yee gañ a ndeer um.

¹⁰We na njuumaa no pind mosu ke den kalal ke no we da mbarna fo kuuɗe, andee a pi o cofel. Mi o Yaal oxe layun.»

¹¹Ten taxu o Yaal oxe na refkaa boo faw a laya a Samari yee: «Xan fañ a mbidong o kurul-keƥ, a sañit ke reeƭna doole of, pind ke saŋe a yetooxaa o mosel den fop a ngefel.»

¹²Keeke o Yaal oxe a layu: «Ne o kaynaak a suqtitaa yoqatin mbaal um no don njogoy, ta ref a caf ake mbaat nof, neene mat a muc no Ii-isra’el we ngenna Samari a nandkaa, den weene na mbondooxaa no xeeñ njong, a mudaa no cong moku.»

¹³Mi o Yaal oxe na refkaa boo faw, ref Roog fee Hupna fop, kaam ee: «Nan-gilooxaamoo, too nu njo’it we no mbind Yakoob a ƭelem es:

¹⁴No ñaal naa o loq es a dalkaa took Isra’el, yaam um fel o jaf um, ta dak no paaxeer, xan a dal itam took xa sadaxand axe Betel[10], xa can axe da lupna took den a ƥoloox, a yen a lanq.

¹⁵A koom xam luƈit xa ƭaakaand[11] axe fo pind cosaan ke, luƈit ke mosandteena a ñiiñ fa ñiig[12] pind maak ke fop a mooc. Mi o Yaal oxe layun.»