Read NQAARIIT NE ROOG Amos 4 Bible Online

Amos 4 - NQAARIIT NE ROOG bible

Amos 4

¹Moxolaare ke Samari, naangna suquƈ nen xa pi naak axe Basan, nuun we na ñagadilaa we toroxna, jegeer we nu ngefaa den, soo ngeleeroox, lay gor nuun ee: «Langinyo xa moon axe i yer!»

²Keeke mat o Yaal oxe na refkaa boo faw a layu na nuun, a daaɓoortin o tedel um: «Ñaal ke nu sutkeel saate nuun, lokeel nen liƥ no jaar, nuun fo xa ƥiy nuun, owey a ngaraa,

³too a koom nu ñoƴ o gur, oxuu refna a waaƭaa ndaɗand ndaa nu ndaɗkee. Mi o Yaal oxe layun.»

⁴«A soƥangaa yee bakaad nu mbosooxu, xar yaqanu nu ndet Betel[13]. Kaam ee, nu ndet mbakaadtik Gilgal, ta moƴ o faaxaƭar feek ten nu mbugu. Sadaxityo nqes nuu refna, cooxaa a Roog a seek xarɓaxayandeer ale no ñaal ndadkandeer nuu refna.

⁵Ƥoxotyo sadax fa ngidmir, yoonandtin poɗaxnir! Kaam ee nu yegnit sadax ke nu mbi’aa, yaam keene refu ke nu mbugna, nuun we xa taan Isra’el. Mi o Yaal oxe na refkaa boo faw layun.»

⁶«Ten taxu um roxan a nuun biim na teeru fuu refna, mbind oo mbind, um lup maaga o ñak ngaak, ndaa dara teen taxee nu naang cook nomtooxiid me mi. Mi o Yaal oxe na refkaa boo faw layun.

⁷Doonaam teen xañ a nuun a teƥ boo a qool a tadak no ndiig, deɓan saax, xuur le ta detoorna, o qol a deɓel, ole ta detoorna a ga’aƭar o ndoq, duufe um fop a weer.

⁸Fi’aanum boo a saax a ƭak bo na tadak a ƥunik no saax jan, too nga’ee kaa xeƴna a den, ndaa dara teen taxee nu naang cook nomtooxiid me mi. Mi o Yaal oxe layun.

⁹Xawtaam a nuun xa ƥuus fo xa qomb, tooroog ke a yen na xa qol nuun fo na ƭing nuun, ndaa dara teen taxee nu naang cook nomtooxiid me mi. Mi o Yaal oxe layun.

¹⁰Yoɗaam piste, pictin a ndeer nuun, ne fi’it’anuuma no saax laa Misira, warnoor mbes ke nuun na xire, pis nuun a njaɓel, xa tal no yoon nuun a mbat a nuun xus nen ƈaq, ndaa dara teen taxee nu naang cook nomtooxiid me mi. Mi o Yaal oxe layun.

¹¹Gal’andaam a nuun nen a Sodoom fa Gomoor we gef’uuma tuƈ, nu mucit nen o rukit o suudte na fiɗel, ndaa dara teen taxee nu naang cook nomtooxiid me mi. Mi o Yaal oxe layun.

¹²Wo Isra’el, keene mat taxu um doonkang leng kut ke. Neene deŋ o ɓay es a doonoorkaa took of. Yaaga boog, wo Isra’el, jagandooxi xetiid fa mi fee Roog of,

¹³yaam oxe sakna xa coong axe fo nqeñ ne too a feeñlaa o kiin a qalaat um, kaam ee, oxe na suptaa mbeet ne, a fi’in o niɓaan, too a ñaaƴaa took xa coong axe, gon um refu o Yaal oxe Roog fee Hupna fop.»