Read NQAARIIT NE ROOG Amos 7 Bible Online

Amos 7 - NQAARIIT NE ROOG bible

Amos 7

¹Bes, cinj ye o maad oxe a saxadaneena boo a ƴut, ye daaƭ[16] le a saxatinaa, o Yaal oxe na refkaa boo faw a lalaxam keeke: O Yaal oxe a dalfooxa o yoɗ tooroog,

²tooroog ke a inoox, a yen took ke na saxatinaa, a ñaamin bo tee tak. Naaga dalfooxaam o lay ee: «O Yaal oxe na refkaa boo faw, kaaga hupa jeg fe! Waagiro wuus a Yakoob? Tooroog ke a ñaamangaa fop, xar a ñoowitkaa koy too o ndoole reefiran?»

³Maaga, o Yaal oxe a laya yee: «Waasaam ke yuuɓ’uuma.»

⁴O Yaal oxe na refkaa boo faw a dakooxaxam o feeñil keeke, a layaam ee xan a xawit fiɗel we na mbi’aa njofaƭar, fiɗel le a ŋeerin poofi ke no qooƭ ke na juwaam fee, soo a raaɓ xa qol axe.

⁵Naaga, dakooxaanum o lay ee: «O Yaal oxe na refkaa boo faw, a hupa jeg, yaam yaaga mbind Yakoob ne neewna doole bo mbaagkee o muc.»

⁶Maaga, o Yaal oxe na refkaa boo faw a dakooxa o lay ee: «Waasaam ke yuuɓ’uuma.»

⁷O Yaal oxe a dakooxaxam o feeñil kene: Kaam ga’in, ten fa xoox um, ta ŋaay no tabax, soo a deegoox o ƥaak o fodrandir.

⁸Naaga, o Yaal oxe a layaxam ee: «Amos! Xar ga’o?» Um doonin ee: «O ƥaak o fodrandir.» Ta layaam ee: «Xam dalin o ƥaak o fodrandir kam Isra’el fee xeet es, too yaaga a baasan es fa den a faaf.

⁹A koom koy xan a ñaang a sadaxand ake no mbind Isaak a ngefel, pind roog ke Isra’el a njiƭtel, um inooxan mbind Yerobowam fo laƥ.»

¹⁰Maaga, o saasadax oxe ne’eena Amatsiya kam Betel a lultiida me Yerobowam fee o maad Isra’el ee: «Amos oxe fuulandaa ƭool of kam ee kam mbind Isra’el sax, too saax le mbaagatee o muñ ke ta layaa fop,

¹¹yaam kaa lay ee: ‹Xan Yerobowam a wartel laƥ, Ii-isra’el we a ndefik faɗ no saax jan.› »

¹²Amatsiya a geleerooxa itam, a lay a Amos ee: «Wo o yaal peeñil ke, ƴufi, nomtoox no saax laa Yudaa, moof maaga, yegnitaa ke o xoyaa peeñil Roog, jegtaa teen kaa o ñaamaa.

¹³Ba o yegnitat tig Betel, yaam mene mbind roog ne no maad oxe a refu, mbind sadaxand ne no maat ne.»

¹⁴Ye ta layna neene, Amos a doonaan ee: «Nduleer refee calel es, too fogiim no we nduleer a inna[17]. A refangee ngaynaak fo a cimb paƭat yaakaariim lakas.

¹⁵O Yaal oxe a andaan, too yaqanee ta xottaam na las ake no paal ke, a layaam ee: ‹Inooxi ret yegnitik fa lay es ndeer Ii-isra’el we xeet es.›

¹⁶Ten taxu, wo Amatsiya fee layna yee ba o jo’it a Isra’el mbaat mbind Isaak, nan-gilooxi ke o Yaal oxe a layoonga:

¹⁷Keeke o Yaal oxe a layu: ‹Xan o teef a jaga’ik kam teeru fee, xa ƥeef a mbartel laƥ, o qol of a ɗegrel, wo fa xoox of o xontik a koƥ, Ii-isra’el we a ndefik faɗ no saax jan.› »