Read NQAARIIT NE ROOG Amos 8 Bible Online

Amos 8 - NQAARIIT NE ROOG bible

Amos 8

¹O Yaal oxe na refkaa boo faw a dakooxaxam o feeñil a ƭamba laa yipna xa tim xa pooru

²soo a layaam ee: «Amos, xar ga’o?» Um doonin ee: «A ƭamba laa yipna xa tim xa pooru.» O Yaal oxe a layaxam ee: «A saxad ale mi took Isra’el fee xeet es a fadiida de, yaam a baasan es fo ten a faafa.

³A koom a kim ake no mbind sadaxand ne xan a suptoox xa paɗax. Muu refna xan xa tal a mbondnel, fop ee yereŋ. Mi o Yaal oxe na refkaa boo faw layun.»

⁴«Ndiiki koy, nuun we na toroxandaa o ndool onqe, toroxu we nu mbaltaa onqe da njegna, nan-gilooxaamoo!

⁵Kaa nu layaa yee: ‹Ndi mban muus fee no nqool onqe a faafkaa boo i mbaag o njikook bele fee in? Ndi mban bes fee na ñootnax ale a faafkaa, boo i mbaag o ndok no tap in? Xan i mbañ eedir ke, njigand ne i ƥaatin, yaq balaas fee boo mbaag o ñaam jiijik we.

⁶Xan i njik toroxu we, rool we a ndefik faɗ in, yaam peer xa ñaaƭ ne da ndawitna na in, too mbaagiran o ndabid, ke samitna no taaraar ke, i njikoortin nen a pep a paax.› »

⁷Ten taxu o Yaal oxe a daaɓoorit a xoox um[18] ee: «Weeckiim a leng na pi ake den.

⁸Ndax kaa a pesoorooƭ den akeene taxee saax le a gefkeel, mbind oo mbind a ndef no xaaraand? Xan saax le a kuf-kufin nen o maag o riñu, kaam ee xan a ruf-rufin, a ŋiisin nen o xuluɓ ole Misira.

⁹A koom, xam fi njeeƈ ne a mud yaa ta fodna ndeer xoox, o niɓaan a joot took lanq ke njoloor o mbuc. Mi o Yaal oxe na refkaa boo faw layun.

¹⁰A koom, xan toofeen nuun a suptel njaañ, a kim baneex nuun a ndef xa paɗax, oxuu refna a deroox o saaku, fop a nduusoox a ƥula yaam naqad. Kaam ee, a koom saax le a mbi nen kaa mbind oo mbind a nqoniɗ o dimbaane, fop a muukoor nen ñaal o njombe.

¹¹Ñaal ke um fudinkaa biim took saax le owey a ngaraa, refee koy biim le na riñaa o kiin no homaa ñaamel, joqooyooxaa maa foofi farna, ndaa biim le na riñaa no homaa fa Lay fee no Yaal oxe fo hoɗomel o nan paru no ten. Mi o Yaal oxe na refkaa boo faw layun.

¹²A koom da mbidaa lanq ke, a njoqooyooxaa a ndetaa no kaa xotitna no ɓemb-roog o janoon boo no batand, ndeer o maag fo o gend um, a mbaaƭaa maa da nanitna fa Lay fee no Yaal oxe ndaa njegkiran.

¹³Kaam ee, a koom roog mosaan we fo mbes ke a nqon fo a koɗom,

¹⁴yaam kaa ndaaɓoortaa bakaad fee Samari yee: ‹Ndeer es fo xe na faɗooxeel Dan![19]› fo ‹Ndeer es fo o Cegu doole xe Beer-Seeba!› Ten taxu xan da yen, too inooxkatee muk.»