Read NQAARIIT NE ROOG Amos 9 Bible Online

Amos 9 - NQAARIIT NE ROOG bible

Amos 9

¹Cinj kaaga, ga’aam o Yaal oxe a geenoox took o sadaxand ole, soo a layaam ee: «Xawi a tayil ale, a toodook ake a yen, o ɓaƈit a qoox den, den fop. Oxuu xoneerna no njom neene, xam pattin laƥ. O leng ƴufkee, a daɗ.

²A njaɓnookangaa jaaniif sax, xam suqtit a den maaga, da ŋaay na asamaan, um fudniid a den.

³A njaɓnookangaa no jul olaa Karmel, xam waaƭik a den, suqtiid a den, da ƭasik no xooɗ laa no maag olaa, um hebil fangool ta ŋat a den.

⁴A ngooknooxangaa mbaambir no fañ den, a njaɓ o ndefik faɗ ndax mbarkaand, xam hebil fañ we da lakan a den laƥ ke. Boo a kid es a ndoonooxna took den, paax taxiran, ƭomu soom taxun.»

⁵O Yaal oxe na refkaa boo faw Hupna fop, kaa doonaa nqol um took lanq ke, fop a yo’noox, adna fa muum a njaañoox, lanq ke a kuf-kufin nen o maag o riñu, a ŋiisin nen o xuluɓ ole Misira.

⁶Kaa sip ngenand um na asamaan, a fi kuul ne ta yooroox lanq ke, soo ta xoy poofi ke no maag ole, a picit a den took lanq ke. Ten o mat ne’e o Yaal oxe.

⁷«Nuun we xa taan Isra’el, ndax kaa nu ndefiraam nen Kuukuus we? Ndax kaa suttiim a nuun Misira, ne sutit’uuma Fiifilista we no saax laa Kaftoor, Aa-araam we um sutit a den Kiir? Mi o Yaal oxe a layun.

⁸Mi o Yaal oxe na refkaa boo faw fuuliim, a kid es kaa ndoonoox took saax leene na fi’aa cageer, ten taxu xam moocandin na adna, ndaa koy moocandkiim tak mbind Yakoob. Mi o Yaal oxe layun.

⁹Xam hebil mbind Isra’el a pasarel ndeer qeet ke, ne kaaf a mbiɗteel, too o ngac o leng yuurkee.

¹⁰Baabakaad we na xeet es fop, xan laƥ a fand a den, boo no we na layaa yee: ‹O njakad garkee too dalkee o leng na in.› »

¹¹«A koom koy, xam difi o ɗaakaand ole Dawid, yoɗin, ke gefna teen, um xendandin, boo ta dakoox naa ta reeƭna,

¹²ndax ta pokook we yoqna na Edoom fo na saax ake gon es a ƴufginooroogeena. Mi o Yaal oxe layun, too xam fadnin.

¹³Ñaal ke o qooxoox oxe a bugko kamasaa o saasaxad oxe, owey ngaraa. Kaam ee ñaal ke oxe na niraa fo xe na duufaa a mbugko kamasraa, owey a ngaraa. Maaga, xan o naat ee picit kam saax le, xa coong axe a neƥaa fo o ngoon. Mi o Yaal oxe layun.

¹⁴A koom, xam nomtiid a Isra’el, xeet es fee ndefik’ina faɗ, da maxatin teeru ke ngefeena, a ngen a den. Xan a njimbatin a ƭing taxar biiñ den, da ndef muud den, a ƭing den a neqatin, xa tim axe a ndef muud den itam.

¹⁵Xam dalnatin a den no saax le lasuuma a den, too sutooxkatiran. O Yaal oxe Roog of layun.»