Read NQAARIIT NE ROOG Yoona 1 Bible Online

Yoona 1 - NQAARIIT NE ROOG bible

Yoona 1

¹Keeke refu fa lay fee o Yaal oxe a daawinna a Yoona fee o ƥiy Amitay:

²«Inooxi, ret Niniif[1], na teeru fa maak faa, too maƭooxin, yaam kañaan um a fadiida boo me mi.»

³Kaa koy, Yoona a inooxa ndax ta ƴuf Tarsis maa goƭna o Yaal oxe. A reta Yope, too a soƥa maaga a kaal alaa retoogna Tarsis. A rabda njootin ne, a rok na kaal ale, ndax ta yoon fo we ndetoogna Tarsis, maa goƭna o Yaal oxe.

⁴Maaga, o Yaal oxe a fi’a a qeñ a maak took o maag ole, too a und a maak a jumbanda o maag ole boo a kaal ale a bug o gef.

⁵Maamaag we a ndiid’a lool, too oxuu refna na den kaa ƴufginooxoogu a roog um, soo a njooraa kam o maag ole tikoorik ke ndeeƭna kam a kaal ale, ndax da yelefandin. Yoona o mat a fudooxa boo a lanq-ee-lanq ale na kaal ale, a wondoox maaga, soo a naag hanq a ɗaan.

⁶Maaga, o aa-adax oxe na kaal ale a matiidaan, a layin ee: «Ndi an oo xene na ɗaanaa? Inooxi, ƴufginoox a roog of! Xeƈa yiif um xan a gom a in, too yaaga i saŋkooxkee.»

⁷Maamaag we a layrooga a ndeer den ee: «Ngaryo i mbanjang, ndax i and oxe taxna i mbug o saŋkoox.» A mbanjanga, too a yena took Yoona.

⁸Maaga, a layaan ee: «Layi in oxe taxna taamaala feeke a dalaa a in. Xar refu calel of? Mam inooro sax? Mam geno? No qeet olum fogo?»

⁹Yoona a doona a den ee: «O Hebre refum, saɗar o Yaal oxe refna Roog fee na asamaan, sakna o maag ole fa jeeri fee.»

¹⁰Cinj kaaga, Yoona a yegna a den ke xew’ina fo ten. Maamaag we a ndiid’a lool, yaam a and’a yee Yoona kaa ƴufaa mbaambir no Yaal oxe, too a laya a Yoona yee: «Ndi xar taxu o fi keene?

¹¹Xar i mbi’kang ndax o maag ole a riim?» Yaam o maag ole kaa moƴ’u o jumbaa rek.

¹²A doona a den ee: «Njangaamoo, njooraam kam o maag ole, too xan a riim, yaam andaam ee mi gartu a und a maak aleeke.»

¹³Maamaag waa a lafooga ndax da teer na tambando fee, ndaa koy mbaag’iran, yaam o maag ole kaa moƴ’u o jumbaa rek.

¹⁴Maaga, a ƈufginooxa o Yaal oxe, too a lay ee: «O Yaal oxe, koo ba o saŋik a in yaam o koor oxene, too fat o ɓog a in na fa nqon no xene fi’eerna a in tus. O Yaal oxe, i anda koy o mat ee kaa o fi’aa ke bugoona.»

¹⁵Cinj kaaga, a njanga a Yoona, a njoorin kam o maag olaa. Maaga, a und alaa a dalfooxa o riim.

¹⁶Ye da nga’na kaaga, a saɗar’ata o Yaal oxe lool, a ƥoxotaan sadax, soo a ndegoor fo ten.