Read NQAARIIT NE ROOG Yoona 2 Bible Online

Yoona 2 - NQAARIIT NE ROOG bible

Yoona 2

¹O Yaal oxe a hebliida liƥ maak ta ɗuud a Yoona, too Yoona a jeg’a ñaal tadik fo xa yeng den kam o fud ole no liƥ ne.

²Ye Yoona a refna kam o fud ole no liƥ ne, a xeɗa o Yaal oxe Roog um,

³a lay ee: «O Yaal oxe, ye refuuma no njaaxɗataan, ƴufginooxaaxoong, too jaɓaxamo. No duf-ee-duf laa jaaniif, falalooxaaxoong, too nanaa o ñuxur es.

⁴Deɓaxamo kam o maag ole, no xooɗ-ee-xooɗ le no foofi le. A yaand ake wo fop owe mbidaxam, a yag-ee-yag ake wo a palaƈaa took es.

⁵Kaam layoogatu yee: O Yaal oxe, raxeem maa goƭoonga, ndaa yaakaaraam o ga’ahin Mbind tedu of.

⁶Poofi ke kaa laxaaɓ’aam. Kaam ee o maag ole kaa ɗuud’aam boo salquƈ, xeet a laxasooxaam no xoox.

⁷Kaam ɗuuɗoox’u ɗuga xa coong axe, soo a kinglir ake jaaniif a mbegooraam boo kili. Kaa koy, wo o Yaal oxe Roog es, wo o mat ɗuqtitiidaxam fo o ñoow no duf-ee-duf laa jaaniif.

⁸O Yaal oxe, ye yoqɗooruuma fa nqon, wetandooxaaxoong, too ke xeɗoonga, a fadiida boo me wo, no Mbind tedu of.

⁹We na mbaɗooxaa pangool ke, kaa mbes a cinj a Roog fee waagna o mucil a den.

¹⁰Mi o mat, xam ɓoxotong sadax, yoonandtin a kim a kidmir, soo fadin ke regoonga boo ƴut, yaam a muc na wo a hataa, wo o Yaal oxe.»

¹¹Naaga, o Yaal oxe a laya fo liƥ ne, too a xuqa a Yoona na jeeri fee.