Read NQAARIIT NE ROOG Yoona 3 Bible Online

Yoona 3 - NQAARIIT NE ROOG bible

Yoona 3

¹O Yaal oxe a daawnahina a Yoona fa lay um na xa ƭelem axene:

²«Inooxi, ret Niniif, na teeru fa maak faa, too lambin ke hebloonga.»

³No jaf laaga koy, Yoona a nanan’a o Yaal oxe no ke ta hebil’uuna. A inooxa, a ret Niniif me o Yaal oxe a tox’uuna. Niniif koy teeru fa maak a reeƭu. O bug’angaan o xaañ, xan o jeg ñaal tadik.

⁴Yoona a ñaaƴa ñaal leng kam teeru faa, a yegnitaa yee: «Ndeer mene fo ñaal qarɓeen nahik, xan Niniif a gefel tuƈ.»

⁵A koom sax, we ngenna na teeru faaga fop, a ngimu na Roog. A lambna yee koor a wara o jeg. Oxuu refna, a xotit no wiin maak we boo no fo mboƭomsogor ne, a deroox o saaku, ndax ta lalit ee a ricooxa.

⁶Yaa o maad oxaa Niniif a nanna ke xew’ina, a inooxa no uum-maamaad le ten, a wol lori um, a deroox o saaku, a moof no ndaw, ndax ta lalit ee a ricooxa.

⁷Maaga, o maad oxe fo we ndeefanuuna a ngeblita ta lambnel kam teeru faa yee: «Wiin we fo cegel ke baa ñaam tus, too baa yer.

⁸Fat wiin we fo cegel ke a nderoox xa saaku. Fat oxuu refna a ƴufginoox a Roog, a fes a cinj a pesoorooƭ a paaxeer um fo a pi a yednu ke ta fi’taa xa ƥay um.

⁹Neene, xeƈa xan Roog a supit pexey, a waas fuux maak le ten, soo a fañ o warnoor a in.»

¹⁰Roog a ga’a ne wiin we Niniif a mbesoorna, too a ga’a yee a mbesa a pi a paaxeer ake den a cinj. A ricooxa paaxeer ke ta bug’ina o fi a den, soo a waasan a den.