Read NQAARIIT NE ROOG Yoona 4 Bible Online

Yoona 4 - NQAARIIT NE ROOG bible

Yoona 4

¹Kaaga a feƭar’a a Yoona lool, too a fuuxa.

²Keeke refu ke ta xeɗ’ina o Yaal oxe: «O Yaal oxe, keene o mat saɗaroogum, ye maad’uuma o refaa no saax es, too ten taxu um ñof’u o ƴufaa farna fa Tarsis. Andaam koy ee Roog fa laabiiru fa mayu yirmande refo. Kaa o muñ, may fo o paaxel, too kaa o ricooxaa paaxeer ke yuuɓoona.

³Ndiiki koy, o Yaal oxe, xuufi o ñoow es, yaam fa nqon moƴanataxam o ñoow.»

⁴O Yaal oxe a doonaan ee: «Jegiro kaa fuuxoona!»

⁵Yoona a sutooxa teeru faa, a moof no batand naa Niniif. Maaga, a geenna ƭiif, a moof no yook naa, a cungaa o ga ke na xewkaa kam teeru fee.

⁶O Yaal oxe Roog a saxna mbatarpooli ta yooroox a Yoona, a yookan, too a ɓoosdand fuux um. Yoona a ɗaay’a lool no mbatarpooli naaga.

⁷Kaa koy, no feet olaa, yaa a kid akaa a nqooliidaa, Roog a hebliida ngusax ta ŋereñ mbatarpooli ne, too a weera.

⁸Ye njeeƈ ne a watna, Roog a wuuɗiida mbooyo sumu ta hatiid no batand. Njeeƈ ne a xawa a Yoona no xoox boo ta yisat. Fa nqon doŋ a xeɗoogatu, a layaa yee: «Fa nqon sax moƴanataxam o ñoow.»

⁹Roog a laya a Yoona yee: «Ndax jegaa kaa fuuxantoona mbatarpooli nene?» Yoona a doonin ee: «Jegaanum moos, waraam o fuux boo na fa nqon!»

¹⁰Maaga, O Yaal oxe a dakooxaan o lay ee: «Nan-gilooxi! Mbatarpooli nene cooxirang calel leng, refee yee wo saxnun. No yeng o leng kut a maaku, soo no xaa took um ta xon. Yaag oo toox de, yirim’aano.

¹¹Ii, soo o bug’u um fañ o yirim a Niniif, teeru fa maak fee saqna kaa hupna mboƥ cuni teemeed fo mboƥ cuni qarɓeen ƭik naa mbaageerna o anddirand a ñamaak den fo a canoon den, ne’atiim cegel mayu!»