Read NQAARIIT NE ROOG A lim ale 1 Bible Online

A lim ale 1 - NQAARIIT NE ROOG bible

A lim ale 1

¹O Yaal oxe a laya fa Moyiis no Ƭiif ne ta xetteel kam a koƥ-a-ƥor alaa Sinayi no ñaal eetaand ne no nqool o ƭikandeer onqe no hiid o ɗikandeer ole a cinj a sutax alaa den no saax laa Misira. A layaan ee:

²«Limyo mbokatax ne no Ii-isra’el we fop, ndeefandin na qaw den fo ƥasil den, o koor oo koor, nu mbind gon um.

³Wo fa Aaroon, limyo goor we njegna xa kiid qarɓeen ƭik a jof took fop, too a mbaag o ndet na xire, ndeefandin na yaj no xiixire den.

⁴Fat o leng no yaal pind ke na carind aluu refna a dimle a nuun.

⁵Keeke ndefu a kon ake no goor we na ndimle’kaa a nuun: Na carind ale Ruben: Elisuur fee o ƥiy Sede’uur,

⁶na carind ale Simewon: Selumi’el fee o ƥiy Surisaday,

⁷na carind ale Yudaa: Naason fee o ƥiy Aminadab,

⁸na carind ale Isakaar: Netanel fee o ƥiy Suwar,

⁹na carind ale Sabulon: Eliyab fee o ƥiy Heelon,

¹⁰na carind ale Efrayim fee o ƥiy Yoseef: Elisama fee o ƥiy Amihud, na carind ale Manaase fee o ƥiy Yoseef itam: Gamali’el fee o ƥiy Pedasuur,

¹¹na carind ale Bensame: Abidan fee o ƥiy Gidoni,

¹²na carind ale Dan: Ahiyeseer fee o ƥiy Amisaday,

¹³na carind ale Aseer: Pagi’el fee o ƥiy Okran,

¹⁴na carind ale Gaad: Eliyasaf fee o ƥiy Dewel,

¹⁵na carind ale Neftali: Ahira fee o ƥiy Enaan.»

¹⁶Weene ndeeƭu we njileena no mbokatax ne Isra’el, ndax da ndefan a carind faap den fo aa-adax no xiixire juni.

¹⁷Moyiis fa Aaroon a nqota goor weene a kon den a ne’’eena,

¹⁸soo a mbokat Ii-isra’el we, no ñaal eetaand ne no nqool o ƭikandeer onqe. Fop we njeg’ina xa kiid qarɓeen ƭik a jof took a mbind’e o leng o leng, a reefandel na qaw den fo no ƥasil den.

¹⁹Moyiis a lima a den, den fop kam a koƥ-a-ƥor alaa Sinayi, ne o Yaal oxe a heblit’uuna o ten.

²⁰Na carind aluu refna na carind ake Isra’el, goor we njeg’ina xa kiid qarɓeen ƭik a jof took too a mbaag o ndet na xire, a mbind’e a reefandel na qaw ake fo no ƥasil ke den. A carind ale Ruben fee taaw Isra’el eetit’e. Neeke we mbind’eena a mbod’u: na carind ale Ruben: cuni qarɓeen nahik fo cuni ɓetuu fa leng fo teemeed ƥetik, na carind ale Simewon: cuni qarɓeen ƥetik fo cuni ɓetuu nahik fo teemeed tadik, na carind ale Gaad: cuni qarɓeen nahik fo cuni ƥetik fo teemeed ɓetuu fa leng fo qarɓeen ƥetik, na carind ale Yudaa: cuni qarɓeen ɓetuu ƭik fo cuni nahik fo teemeed ɓetuu fa leng, na carind ale Isakaar: cuni qarɓeen ƥetik fo cuni nahik fo teemeed nahik, na carind ale Sabulon: cuni qarɓeen ƥetik fo cuni ɓetuu ƭik fo teemeed nahik, na carind ale Efrayim fee o ƥiy Yoseef: cuni qarɓeen nahik fo teemeed ƥetik, na carind ale Manaase fee o ƥiy Yoseef itam: cuni qarɓeen tadik fo cuni ƭik fo teemeed ƭik, na carind ale Bensame: cuni qarɓeen tadik fo cuni ƥetik fo teemee(...)

⁴⁴Neene we mbind’eena a mbod’u. Moyiis fa Aaroon fo goor xarɓaxay fo ɗik we ndefan’ina a carind ake Isra’el mbind’u a den.

⁴⁵We lim’eena no Ii-isra’el we, a njeg xa kiid qarɓeen ƭik a jof took, too a mbaag o ndet na xire, a reefandel no ƥasil den,

⁴⁶a ndeeƭa cuni teemeed ɓetuu fa leng fo cuni tadik fo teemeed ƥetik fo qarɓeen ƥetik.

⁴⁷We mbogna na carind ale Lewi mbog’ee na lim aleene,

⁴⁸yaam o Yaal oxe kaa lay’u a Moyiis ee:

⁴⁹«Ba o fokat a carind ale Lewi no bind le, too ba o limandoor a den fo Ii-isra’el lakas we.

⁵⁰Fat o doxin a den Ngenand ne singna arka ne no ngiɓoor ne, doxin a den itam ƥaxañ ke ndefna teen fop fo fop ke jegeena teen. Den na mbugko saqaa Ngenand ne fo ƥaxañ ke njegeena teen fop, a mbadnaa teen o far den soo a ndalaa me widuuna.

⁵¹Leelewi we na mbugko tasaa Ngenand ne, yaa ta bugeena o ɗis. Den na ngeeninkan itam, yaa nu mbugna o ndal o mbiñ o lakas. Oxuu o ɓay um a duqna teen too fogee na den, fat a warel.

⁵²Fat Ii-isra’el lakas we a ndal kam saŋe ne, a reefandel na carind den, wuu ndefna paam a laay a anddiloor den.

⁵³Leelewi we o mat, fat a ndal me widna Ngenand ne singna arka ne no ngiɓoor ne, a topatooxan, a mbadnaa teen o far den, ndax fuux es yenkee took Ii-isra’el we.»

⁵⁴Neene deŋ Ii-isra’el we a mbi’toogun, ne o Yaal oxe a heblit’uuna a Moyiis.