Read NQAARIIT NE ROOG A lim ale 10 Bible Online

A lim ale 10 - NQAARIIT NE ROOG bible

A lim ale 10

¹O Yaal oxe a laya a Moyiis ee:

²«Xawni a luuƥ a ƭak xaaliis. Den na mbugko nqoyteel mbokatax ne, soo a yegnaa a yaj a pogreer ake yee a tet a fada.

³Boo a luuƥ a ƭak akeene a njibnandooreena, fat fop a mbokatoor paam of, no ndokand ne no Ƭiif ne um xetteel, mi o Yaal oxe.

⁴Kaa koy, a luuƥ a leng a luuƥange, fat gelwaar we Isra’el ndefna aa-adax no xiixire juni a mbokatoor paam of.

⁵Boo nu luuƥna yoonandtin xa buuq, fat we ndalna no batand a ndet.

⁶Nu ndakooxangaa o luuƥ jaf ɗikandeer, yoonandtin xa buuq, fat we ndalna no ɓemb-roog o ñamaak a ndet. A luuƥ alaa yoonitna xa buuq na bugko yegnititeel a tet ale,

⁷ndaa boo nu mbugna o nqoy mbokatax ne, nu yoonanditkee a luuƥ ale xa buuq.

⁸Saasadax we soom, ndefna xa taan Aaroon, ci’e o luuƥtaa a luuƥ akeene. Keene xan a ref kebil naa na refkaa boo faw na nuun fo na xa taan nuun.

⁹Kam saax nuun, boo nu nqire’kaa fo fañ nuun waa mbugna o ñoxor fa nuun, fat nu njibin a luuƥ akeene, yoonandtin xa buuq. Maaga, xam wetandoox a nuun, mi o Yaal oxe Roog nuun, mucil a nuun no fañ nuun.

¹⁰No qumbaare ke nuun fo no qew ke nuun fo na bat ale no nqool onquu refna, fat nu njibin a luuƥ akeene, yaa nu ƥoxotaa sadax toxel ke nuun fo sadax camsa’oor ke nuun. Keene xan a tax um wetandoox a nuun. Mi refu o Yaal oxe Roog nuun.»

¹¹No ñaal qarɓeen ƭikandeer ne no nqool o ƭikandeer onqe no hiid o ɗikandeer ole cinj a sutax alaa Misira, eel le a dalfooxa o yoɗoorit took Ngenand ne singoogna arka ne no ngiɓoor ne.

¹²Ii-isra’el we a inoora na koƥ-a-ƥor alaa Sinayi, a ƭisoorit ne da ngeblit’eena o ten. Eel le a reta, a geenoox na koƥ-a-ƥor alaa Paaraan.

¹³Keene reeƭu a ƭisax a eetaand den a cinj ye o Yaal oxe a hebilna a den ne da mbarna o ndetit, a reefandin na Moyiis.

¹⁴We mbogna na carind ale Yudaa fo we ndal’ina fa den o mbiñ o leng eet’u o ƭisoox, a yoon fo a yaj den. Naason fee o ƥiy Aminadab adooxan’u a yaj ale na carind ale Yudaa,

¹⁵Netanel fee o ƥiy Suwar a adooxan we na carind ale Isakaar,

¹⁶soo Eliyab fee o ƥiy Heelon a adooxan we na carind ale Sabulon.

¹⁷Ngenand ne a bayte, soo xa taan axe Geerson fo axe Merari a ndet, a saqin.

¹⁸We mbogna na carind ale Ruben fo we ndal’ina fa den o mbiñ o leng ndeef’u took den, a yoon fo a yaj den. Elisuur fee o ƥiy Sede’uur adooxan’u a yaj ale na carind ale Ruben,

¹⁹Selumi’el fee o ƥiy Surisaday a adooxan we na carind ale Simewon,

²⁰soo Eliyasaf fee o ƥiy Dewel a adooxan we na carind ale Gaad.

²¹Cinj weene, Leelewi we ndefna xa taan Kehat saqoogna tikoorik ke moƴna o ted a ndeta. Ngenand ne koy, a war’e o geenin bo da ngelko fo mbadiidaa.

²²We mbogna na carind ale Efrayim fo we ndal’ina fa den o mbiñ o leng ndeefan’u Keekehat we, a yoon fo a yaj den. Elisama fee o ƥiy Amihud adooxan’u a yaj ale na carind ale Efrayim,

²³Gamali’el fee o ƥiy Pedasuur a adooxan we na carind ale Manaase,

²⁴soo Abidan fee o ƥiy Gidoni a adooxan we na carind ale Bensame.

²⁵We mbogna na carind ale Dan fo we ndal’ina fa den o mbiñ o leng mbalak’u o ƭisooxaa, a yoon fo a yaj den. Ahiyeseer fee o ƥiy Amisaday adooxan’u a yaj ale na carind ale Dan,

²⁶Pagi’el fee o ƥiy Okran a adooxan we na carind ale Aseer,

²⁷soo Ahira fee o ƥiy Enaan a adooxan we na carind ale Neftali.

²⁸Neene mat a yaj ake no Ii-isra’el we a ndeepatirit’u, ye da nqotna a ƭat.

²⁹Moyiis a laya a Hobab fee o ƥiy no seemir um Rewel[3], o Maamajan oxe yee: «In we ndetaa no mbiñ onqe o Yaal oxe a layna yee: ‹Xam cooxin a nuun.› Gari yoon fa in, too xan o jeg a las no paax ke o Yaal oxe a regna a Isra’el.»

³⁰Hobab a doonaan ee: «Retkiim muk! Kaam bug o nomtoox no saax es fo no fog es.»

³¹Moyiis a layaan ee: «Mexe xeɗang o fañ o waas a in, yaam wo andu fo mbiñ ne i mbaagna o ndalaa kam a koƥ-a-ƥor ale. Koo refi o ƭooɗox in!

³²Boo andoona yee yoonaa fa in koy, xan i ƭaaynoorong no paax ke o Yaal oxe a ci’kaa a in.»[4]

³³Ii-isra’el we a inoora no joong ole no Yaal oxe, too a ñaaƴayo ñaal tadik. No arka ne no ngiɓoor ne no Yaal oxe a ƭeetoogu no ñaal tadik keene, yaam ten laloogu a den me da mbar’ina o ndal.

³⁴A mbanuu da inooxoogna me da ndal’ina, a soƥooga eel le no Yaal oxe a yooroox a den.

³⁵Boo arka ne a retoogna, Moyiis kaa layoogu yee: «O Yaal oxe, naagi daket, ndax fañ we wo a pasaroor, soo we na ñoxoraa fa wo a ngod o joor.»

³⁶Boo arka ne a diƈoogeena koy, Moyiis a layooga yee: «O Yaal oxe, nomtooxiidi, moof a ndeer in, in Ii-isra’el we mbaagaandeena o lim.»