Read NQAARIIT NE ROOG A lim ale 11 Bible Online

A lim ale 11 - NQAARIIT NE ROOG bible

A lim ale 11

¹Xeet faa a ñuxmatilooxa, too yaa o Yaal oxe a nanuuna, a feƭar’aan lool. Fuux um a dalfooxa o biltoox, fiɗel um a damit a ndeer den soo a raaɓ cat ke no saŋe ne.

²Xeet faa a mbuuqooxa a Moyiis, soo ta xeɗoox o Yaal oxe, too fiɗel le a riima.

³O mbiñ onqaaga a ne’’ate Taberaa, tekitna «o dox», yaam ne fiɗel le no Yaal oxe a kaƥit’ina maaga a ndeer den.

⁴Wiin jaree tus waa mbog’eerna no Ii-isra’el we too a ndeeƭu a ndeer den, a maya fo a yaaw boo Ii-isra’el we sax a ndefahin no loolaa, a layaa yee: «A tegeƴ i mbugu!

⁵Yiif in oxey no liƥ ke i ñaamoogna no saax laa Misira, too i ñakoogee o fiftin, a gomaa xa qaal axe fo a naajo ke fo pooro ke fa soble fee fa laaj ke ndefna maaga.

⁶Ndiiki koy, kaa i ŋeesooxaa, yaam dara jegee mene, a refangee maan fene watna a in xus!»

⁷Maan fee kaa nandtoogu xa kak ndaxar naa ne’eena koryaandar, soo a yaay nen bedelyum.

⁸Xeet fee a pictoorooga ndax da ngurdan. A mokandtoogaan a ƥil a unir mbaat da unan no faƥ. A njawoogaan na kaleera soo a mbi’aa teen xa kaf xa ƭembetu. Kaa safoogu nen o gaf olaa jegna diwliin.

⁹Maan fee a fudooxooga no saŋe ne kam a liim ale yenoogna o yeng ole.

¹⁰Moyiis a nana xeet fee looloogna, ƥasil nuu refna a fod no don-maax ƭiif um. Fuux le no Yaal oxe a biltooxa, too Moyiis itam a gooy’a lool.

¹¹A laya o Yaal oxe yee: «Xar taxu o naqadilaam, mi fee o paɗ of? Xar taxu o xañaam yirmande of soo gadnaam xeet fene fop?

¹²Ndax mi fudu xeet fene? Ndax mi rimu a den bo o layaxam ee um ɓop a den ne o ƥasil a ɓoptaa o roɓtatin? Ndax mi waru o gadoox a den, boo no saax laa daaɓooxoona fo daan in ee xan o cooxin a in?

¹³Mam um xotitkaa a tegeƴ akaa cooxuuma xeet fene fop na loolaa paam es, a seraxam ee: ‹Cooxi a in a tegeƴ akaa i ñaamna.›

¹⁴Mi soom waagiim o gadoox xeet fene fop, yaam kaa meɗ dis na mi.

¹⁵O naagangaam o doonkaa keene, mexe xeɗang o waraam, ndax ga’katiim naqad feene, a soƥangaa yee daawaam yirmande of.»

¹⁶O Yaal oxe a laya a Moyiis ee: «Fokatanaam goor qarɓeen ɓetuu ɗik no maak we Isra’el, no we andoona da ndef maak too a njeg sañ-sañ na xeet fee. Ɓisi a den no Ƭiif ne um xetteel, mi o Yaal oxe, too fat a ndef maaga fa wo.

¹⁷Xam fudooxiid, lay fa wo maaga. Xam xot no Yiif le fudnuuma took of, doonin took den, ndax da ngadoortong xeet fene refna a toq a maak boo gadooxkino wo soom.

¹⁸Fat o lay xeet fee yee: ‹Nqoolandooxyo ndeer mene fo o feet, too yaaga xan nu ñaam a tegeƴ, yaam o Yaal oxe a nana a ñuxmatilax nuun, ye nu layna yee: ‹A tegeƴ i mbugu!›, ndoon teen ee: ‹I nqenoox’a no saax laa Misira.› Ten taxu, xan o Yaal oxe a coox a nuun a tegeƴ akaa nu ñaamna.

¹⁹Refkee yee ñaal leng soom nu ñaamkan mbaat ñaal ƭik mbaat ñaal ƥetik mbaat ñaal xarɓaxay mbaat ñaal qarɓeen ƭik,

²⁰ndaa o nqool o muum, boo yaa ta bugko yuurtaa na xa ñis nuun, a wat a nuun xus. Keene na dalkaa a nuun, yaam kaa nu ndeɓ o Yaal oxe refna a ndeer nuun soo loolaa mbaambir um ee: ‹Ndi xar taxu bo i sutoox Misira!› »

²¹Moyiis a laya o Yaal oxe yee: «Xeet feeke widaxama a jega goor cuni teemeed ɓetuu fa leng waa mbaagna o ndet na xire, soo o layik ee xan o coox a den a tegeƴ akaa da ñaamaa boo o nqool o muum.

²²A nqirsan’ange a ked ake fop fo xa siir axe fop, taxkoogee da ndeyƭoox. A mbaalan’ange liƥ ke no maag ole fop sax, ndeyƭooxkoogee.»

²³O Yaal oxe a doona a Moyiis ee: «Ndax a jega kaa xoxaxama? Ndiiki o ga, ndax ke layoonga xan a jeg mbaat jegkee.»

²⁴Moyiis a sutooxa too a daawna xeet faa xa ƭelem axe no Yaal oxe. A fokata goor qarɓeen ɓetuu ɗik no maak we na xeet fee too a widin a den Ƭiif ne.

²⁵O Yaal oxe a fudoorta kam eel le soo a lay fa Moyiis. A xota no Yiif le reeƭna took Moyiis soo a doonin took maak qarɓeen ɓetuu ɗik we. Ndak fo ndak, yaa Yiif le a fudooxna took den, a ndalfooxa o njo’tanan. Taa mbaambir naa koy, kaaga xew’atee na den.

²⁶A jeg’a no goor qarɓeen ɓetuu ɗik weene ɗik waa yoq’ina no saŋe naa, a mbañ o ndet no Ƭiif naa, o leng oxe Eldad a ne’’e, o lakas oxe a ne’el Medad. Yaqanee koy, Yiif le Roog a fudoox’a took den, too a njo’tanoogaan.

²⁷O fes a ƴufa a yegnik a Moyiis ee: «Eldad fa Medad owaay a njo’tanaa a Roog no saŋe naa.»

²⁸Yosuwe fee o ƥiy Nun, reeƭna o tiidimle Moyiis no kaa xotitna no ndeƥandoong um, a kafa fa lay faa too a lay ee: «Moyiis, o yaal es, reti hartoox a den!»

²⁹Moyiis a doonaan ee: «Ndax kaa o naalaxam! Um waag’angaan xeet fee no Yaal oxe fop a tapoor, a ndef duleer, yaam o Yaal oxe a fudin Yiif um took den.»

³⁰Maaga, Moyiis fo maak we Isra’el a nomtooxa no saŋe naa.

³¹O Yaal oxe a heblitiida no maag ole nqeñ, ta fudniid a ceɓel kam saŋe ne, da muur lanq ke boo ngap meetar took no ke xotitna no saŋe ne fo me widuuna fop boo kaa waageena o ñaaƴ ñaal muum.

³²No ñaal naaga fo no yeng olaa fop fo no feet olaa, xeet fee a ndamooga na ceɓel ake. Oxe moƴ’ina o neewiɗ no ke ta dam’ina a jeg’a cuni leng-leng. Me widna saŋe ne fop, kaa liil’el a ceɓel.

³³Kaa koy, ye Ii-isra’el we a ngelko fo ƈaxaa a tegeƴ akeene fop, o Yaal oxe a fuuxana a den, a xawit a den taamaala fa maak, boo mayu na den a nqon.

³⁴O mbiñ onqaaga a ne’’ate Qibroot-Hatawa, tekitna «poy ke na yaaw ale», yaam maaga wiin we na xeet fee a yuxum den a adin’ina, a ngas’e.

³⁵Ii-isra’el we a inoora Qibroot-Hatawa, a ndet Haseroot soo a sip maaga saŋe ne den.